Lik Ejiptơ 30 - Sră Goh 2018

Cơnòng chu kơlhô

¹ Lơh tĕ dô nơm cơnòng mơ chi sitim nàng chu kơlhô.

² Gơ rơp gơs poan gah ring bal, jòng poan jơt pram sentimet, ơnàng poan jơt pram sentimet, mơ jơnhoa sin jơt sentimet; gơs poan nơm ngke gơtòmđềt bal mơ poan mum cơnòng.

³ Ƀềp tĕ màh ngan gùt dar đah hơđang bal mơ ală ngke, mơ tep tĕ dô dang che màh gùt dar gơ.

⁴ Lơh tĕ ală dơwàng màh cơnòng hơ̆ in hơđơm che tep hơ̆, bàr nơm đah do mơ bàr nơm đah ne nàng tơmut mơng tùng gơ.

⁵ Mòn tĕ ală mơng tùng mơ chi sitim mơ ƀềp gơ mơ màh.

⁶ Ơn tĕ cơnòng hơ̆ di đap bài kơrnìng, hơ̆ la di đap Đài Bơta Cơng Tàng mơ bơnap bơta tơwài glài hơđang Đài Bơta Cơng Tàng la tiah Añ rơp tìp mat mơ mê.

⁷ Kòp àng drim, Arôn pal chu kơlhô hơđang cơnòng hơ̆ tòm tŭ khai rcang ồs đèng.

⁸ Khai pal chu tai kơlhô hơđang cơnòng hơ̆ tòm tŭ khai chu ồs đèng tòm trồ mho nàng kơlhô rơp chu sùm sùm di đap Yàng Jehôwa tus di ală rài tơnơ̆.

⁹ Bañ chu kơlhô lơi ndai hơđang cơnòng do, hala ơn phan ơn mơ kòi mbo, mơ bañ tuh phan ơn pơdơng hơđang hơ̆.

¹⁰ Kòp nam dô dơ̆, Arôn rơp ơn phan tơwài glài hơđang ală ngke gơ dê. Bơta ơn phan tơwài glài kòp nam pal lơh gơs mơ mhàm phan ơn tơwài glài dê jơl tus di ală rài tơnơ̆. Gơ la sàng goh rlau jơh Yàng Jehôwa in.

Jền tơwài glài

¹¹ Gen Yàng Jehôwa đơs mơ Môise lah:

¹² “Tŭ lơi mê kòp khà làng bol Israel nàng cih tòm sră, gen kòp nă pal ơn Yàng Jehôwa in jền tơwài bơta kis khai dê tòm tŭ khai geh kòp. Behơ̆ ò gơs bơta pluh plàng gơtơntus bol khai in tòm tŭ mê kòp khà bol khai.

¹³ Kòp nă cau neh mut tòm mpồl cau neh geh kòp rau gen pal ơn nggùl sieklơ, jat sieklơ tiah sàng goh dê, kơnjơ̆ bàr jơt gera. Nggùl sieklơ do, la phan ơn Yàng Jehôwa in.

¹⁴ Jơh ală cau neh geh kòp, hơ̆ la ală cau bàr jơt nam hala rlau mơ hơ̆, pal ơn phan ơn Yàng Jehôwa in.

¹⁵ Tòm tŭ ơn phan Yàng Jehôwa in nàng tơwài bơta kis he, gen cau pas sơm ò ơn rlau mơ nggùl sieklơ, mơ cau rƀah lơòi kung ò ơn dô êt rlau mơ hơ̆.

¹⁶ Mê dòp tĕ jền tơwài glài làng bol Israel dê mơ ngui jền hơ̆ tòm broă Sàl Tòm Mat dê. Gơ rơp la dô bơta kah kirsơnre làng bol Israel in di đap Yàng Jehôwa, ơn phan tơwài bơta kis bol khai dê.”

Thùng dà nàng rào goh

¹⁷ Lồc behơ̆, Yàng Jehôwa đơs wơl mơ Môise lah:

¹⁸ “Mê lơh tĕ dô nơm thùng mơ kòng, gơs jơng thùng kung mơ kòng sơl ngui nàng rào goh. Ơn tĕ gơ digùl Sàl Tòm Mat mơ cơnòng ơn phan duh khoai, mơ tuh dà tòm dơlam gơ.

¹⁹ Arôn bal mơ ală kòn klau khai dê rơp rào tê jơng bol khai dê mơ dà tòm hơ̆.

²⁰ Tŭ lơi bol khai mut tòm Sàl Tòm Mat, bol khai rơp rào goh mơ dà tồ bol khai in klàs chơt. Bol khai kung rơp lơh behơ̆ sơl tŭ lơi bol khai tus rềp di cơnòng ơn phan duh khoai nàng duh broă, hơ̆ la ơn phan ơn chu mơ ồs Yàng Jehôwa in.

²¹ Bol khai pal rào goh tê mơ jơng bol khai dê tồ bol khai in klàs chơt. Hơ̆ la dô jơnau sồr gam sùm sùm Arôn in mơ jơi bơtiàn khai tus di ală rài tơnơ̆.”

Mơñà bong

²² Yàng Jehôwa đơs tai mơ Môise lah:

²³ “Ai tĕ ală phan ƀô bơlhu niam rlau jơh be tơnơ̆ do: prau kơr cài trŭ dà; pe kơr kơmbuh kwĕ, chi ƀô niam pe kơr;

²⁴ prau kơr kơmhò kwĕ, jat rnoas Tiah Sàng Goh, mơ poan lit mơñà ôlibe.

²⁵ Ai tĕ jơh ală phan hơ̆ mơ lơh gơs mơñà ơn is sàng goh, la mơñà ƀô bơlhu lơh gơs bơh cau chài lơh mơñà ƀô bơlhu. Gơ rơp la mơñà ơn is sàng goh nàng bong.

²⁶ Ai tĕ mơñà hơ̆ mơ bong Sàl Tòm Mat bal mơ đài Bơta Cơng Tàng,

²⁷ cơnòng ơn phan duh khoai mơ jơh ală phan ngui bal mơ gơ, jơng đèng mơ jơh ală phan ngui bal mơ gơ, cơnòng chu kơlhô,

²⁸ Cơnòng ơn phan duh khoai chu pơrguc mơ jơh ală phan ngui bal mơ gơ, mơ thùng dà bal mơ jơng gơ dê.

²⁹ Mê rơp ơn is sàng goh ală phan hơ̆ tồ bol gơ in gơlik sàng goh rlau jơh, mơ phan lơi gơtup di gơ gen rơp geh gơlik sàng goh.

³⁰ Bong mơñà tĕ Arôn in mơ ală kòn klau khai dê, ơn is bol khai gơlik sàng goh nàng bol khai lơh gơs ală cau gơnoar ơn phan duh khoai duh broă Añ jê.

³¹ Đơs tĕ mơ làng bol Israel lah: ‘Mơ Añ, do rơp la mơñà ơn is sàng goh tus di ală rài tơnơ̆.

³² Bañ tuh mơñà do hơđang să jan cau dê, mơ kung bañ lơh gơs mơñà lơi ndai tòm toh jat be ală phan neh ngui lơh gơs mơñà do. Gơ neh geh ơn is sàng goh, mơ bol mê pal sền gơ la neh geh ơn is sàng goh.

³³ Dilah cau lơi lơh gơs dô bơta mơñà tòm toh kung be mơñà do, mơ dilah cau lơi bong gơ hơđang cau lơi ndai ò di la cau gơnoar ơn phan duh khoai, gen cau lơh bơta hơ̆ pal kong tă tơlik bơh digùl làng bol.’”

Kơlhô chu

³⁴ Gen Yàng Jehôwa đơs mơ Môise lah: “Ai tĕ ală sơnơm ƀô bơlhu, hơ̆ la «tô hiệp hương», «loa yểm hương», «phong chi hương», bal mơ cài trŭ, kơr ring bal kòp bơta,

³⁵ tòmbơcă bal jat sơnoa rnoas cau chài lơh gơs kơlhô chu mơ lơh gơs dô bơta kơlhô chu. Tĕ boh gơ in ƀă, sàng mơ sàng goh.

³⁶ Ai tĕ dô êt gơ mơ piah tơnlề gơlik be kơmbuh, mơ ơn gơ di đap đài Bơta Cơng Tàng tòm Sàl Tòm Mat, la tiah Añ rơp tìp mat mơ mê. Gơ rơp la sàng goh rlau jơh gơwèt mơ mê.

³⁷ Bañ lơh gơs kơlhô lơi mê in jat tòm toh kung be bơta lơh gơs kơlhô do; kòp tĕ gơ la dô bơta sàng goh Yàng Jehôwa in.

³⁸ Dilah cau lơi lơh gơs kơlhô tòm toh behơ̆ nàng ƀô gơ gen cau hơ̆ rơp kong tă tơlik bơh làng bol Israel.”