Khà Làng Bol 9 - Sră Goh 2018

Bơta pơjum sa Lòt Gan

¹ Yàng Jehôwa đơs mơ Môise tòm ƀlàng ngềt ngơt Sinai tòm kơnhai dùl nam dơ̆ bàr tơnơ̆ mơ tŭ bol khai neh lik lòt bơh di Ejiptơ, Kơnràñ đơs lah:

² “Sồr tĕ cau Israel pơjum sa Ngai Lòt Gan tòm tŭ tơngai neh lơh nền.

³ Pơjum sa tĕ di di tŭ tơngai neh lơh nền, hơ̆ la tòm mho ngai jơt poan kơnhai do, tòm toh jat be jơh ală sơnoa rnoas mơ ală bơta sồr lam gơ dê.”

⁴ Behơ̆ Môise sồr ală cau Israel pơjum sa Ngai Lòt Gan,

⁵ mơ bol khai lơh jat behơ̆ tòm ƀlàng ngềt ngơt Sinai tòm mho ngai jơt poan kơnhai dùl dê. Ală cau Israel lơh jơh ală bơta tòm toh jat be jơnau Yàng Jehôwa neh sồr Môise.

⁶ Mơya gơs cau ƀà tòm bol khai ò rgơi pơjum sa Ngai Lòt Gan tòm ngai hơ̆ tài bơh bol khai neh gơlik ò goh bơh gơs cau chơt. Behơ̆ tòm ngai hơ̆ bol khai lòt tus mơ Môise mơ Arôn

⁷ mơ đơs lah: “Bol hi neh gơlik ò goh bơh gơs cau chơt, mơya ñchi bơh tài bol hi pal kong bơkơ̆u ơn phan duh khoai Yàng Jehôwa in bal mơ ală cau Israel ndai tòm tŭ tơngai neh lơh nền taih?”

⁸ Môise ho bol khai lah: “Dan ơm gơn jơl tus di tŭ Añ jòi git ñchi jơnau Yàng Jehôwa sồr bơh bol mê.”

⁹ Gen Yàng Jehôwa đơs mơ Môise lah:

¹⁰ “Đơs tĕ mơ cau Israel lah: Tòm tŭ cau lơi tòm bol mê hala kòn sau bol mê dê gơlik ò goh tài bơh gơs cau chơt hala gam lòt gùng, bol khai rgơi pơjum sa Ngai Lòt Gan Yàng Jehôwa dê.

¹¹ Bol khai rơp pơjum sa Ngai Lòt Gan tòm ngai jơt poan kơnhai bàr tòm trồ mho. Bol khai rơp sa belàt kòn bal mơ piang lă ò gơs kañ mơ ală biap bơtang.

¹² Bol khai ò di lòi wơl dô êt lơi tòm ală phan hơ̆ jơl tus di drim hìng hala dơrkă ntìng lơi gơ dê. Tòm tŭ bol khai pơjum sa Ngai Lòt Gan, bol khai pal lơh jat jơh ală bơta sồr lam.

¹³ Mơya dilah dô nă cau neh geh goh, mơ ò di la cau gam lòt gùng mơ ò pơjum sa Ngai Lòt Gan, gen cau hơ̆ pal kong tă sang bơh di làng bol khai dê tài bơh khai ò ơn phan ơn Yàng Jehôwa in di di tŭ tơngai neh lơh nền. Cau hơ̆ pal kong bơta lơh glài bơh tồi glài khai dê.

¹⁴ Dô nă cau làng bơdìh ơm kis digùl bol mê kòñ pơjum sa Ngai Lòt Gan gen pal lơh tĕ tòm toh jat be ală sơnoa rnoas mơ ală bơta sồr lam gơ dê. Mê pal gơs ală bơta sồr lam bal cau làng bơdìh mơ cau làng tòm in.”

Mhwal hơđang Hìu Ing Duh Khoai

¹⁵ Tòm ngai Hìu Ing Duh Khoai hala Sàl Tòm Mat geh bơtào gen gơs mhwal jơm gòm gơ. Bơh trồ mho jơl tus àng drim hìng mhwal hơđang Hìu Ing Duh Khoai sền gơlơh kung be ồs.

¹⁶ Gơ kư̆ pơnjat gơlik gơs behơ̆; mhwal jơm gòm gơ, mơ tòm trồ mang gơ sền gơlơh be ồs.

¹⁷ Tŭ lơi mhwal guh bơh hơđang Sàl Tòm Mat, ală cau Israel lik lòt; tiah lơi mhwal ơm wơl, ală cau Israel ơm wơl.

¹⁸ Jat jơnau Yàng Jehôwa sồr ală cau Israel lik lòt mơ jat jơnau sồr Kơnràñ dê bol khai ơm wơl. Mhwal ơm hơđang Hìu Ing Duh Khoai jŏ kàr lơi gen bol khai ơm wơl tòm sàl kàr hơ̆.

¹⁹ Tòm tŭ mhwal ơm wơl jŏ hơđang Hìu Ing Duh Khoai gen ală cau Israel lơh jat jơnau sồr Yàng Jehôwa dê mơ ò lik lòt.

²⁰ Dơ̆ dơ̆ mhwal ơm wơl hơđang Hìu Ing Duh Khoai mìng dô êt ngai lơm; jat jơnau sồr Yàng Jehôwa dê mơ bol khai bơtào sàl ơm, lồc behơ̆ jat jơnau sồr Kơnràñ dê mơ bol khai lik lòt.

²¹ Dơ̆ dơ̆ mhwal gơ ơm wơl mìng bơh trồ mho jơl àng drim, mơ tòm tŭ gơguh hơđang tòm àng drim gen bol khai lik lòt. Bulah tòm trồ ngai hala trồ mang, tŭ lơi mhwal guh hơđang gen bol khai lik lòt.

²² Dilah mhwal gơ ơm wơl hơđang Hìu Ing Duh Khoai tòm bàr ngai, tòm dô kơnhai hala tòm dô nam, ală cau Israel kư̆ ơm wơl tòm sàl mơ ò lik lòt; mơya tòm tŭ gơguh hơđang gen bol khai lik lòt.

²³ Jat jơnau sồr Yàng Jehôwa dê mơ bol khai bơtào sàl ơm wơl, mơ jat jơnau sồr Yàng Jehôwa dê mơ bol khai lik lòt. Bol khai lơh jat jơnau sồr Yàng Jehôwa dê, tòm toh jat be Kơnràñ neh kơnòm di Môise mơ sồr.