Khà Làng Bol 3 - Sră Goh 2018

Ală cau Lebi

¹ Do la sră cih ală sơnđan hìu nhă Arôn mơ Môise tòm tŭ Yàng Jehôwa đơs mơ Môise hơđang mơnơm Sinai.

² Sơnđan mat ală kòn klau Arôn dê la Nadap, kòn tơnhoa, pơnjat Abihu, Eleajar mơ Ithamar.

³ Hơ̆ la sơnđan mat ală kòn klau Arôn dê, la ală cau gơnoar ơn phan duh khoai neh geh bong mơñà mơ pồ bơtào lơh gơs cau gơnoar ơn phan duh khoai.

⁴ Bulah behơ̆, Nadap mơ Abihu neh gơpừ chơt di đap Yàng Jehôwa tòm tŭ bol khai ơn dô nơm phan ơn duh khoai mơ ồs ò geh gơnoar ngui nàng ơn di đap Kơnràñ tòm ƀlàng ngềt ngơt Sinai dê. Bol khai ò gơs kòn klau; behơ̆ mìng Eleajar mơ Ithamar gơs cau gơnoar ơn phan duh khoai duh broă tòm rài Arôn la bèp bol khai dê.

⁵ Yàng Jehôwa đơs mơ Môise lah:

⁶ “Cèng tĕ jơi bơtiàn Lebi mơ ơn bol khai di đap Arôn cau gơnoar ơn phan duh khoai nàng bol khai dong kòl Arôn.

⁷ Broă tòm bol khai dê la duh broă Arôn in mơ jơh dô mpồl jơnum in tòm Sàl Tòm Mat bơh ală broă lơh tòm Sàl Ing Duh Khoai dê.

⁸ Bol khai pal rcang gàr bơh jơh ală phan ngui tòm Sàl Tòm Mat dê, lơh wil tơl ală broă tòm Hìu Duh Khoai mơ cau Israel pal lơh.

⁹ Jào tĕ ală cau Lebi Arôn in mơ ală kòn klau khai dê; bol khai neh geh sac bơh digùl làng bol Israel mơ jào Arôn in.

¹⁰ Mê pồ bơtào tĕ Arôn mơ ală kòn klau khai dê gơs cau gơnoar ơn phan duh khoai nàng duh broă; cau lơi ndai tus rềp di tiah sàng goh gen pal kong tơnchơt.”

¹¹ Yàng Jehôwa kung đơs mơ Môise lah:

¹² “Añ neh ơn is ală cau Lebi bơh digùl ală cau Israel nàng lơh ala kòn klau tơnhoa kòp nă cau ùr Israel in. Ală cau Lebi gơrê bal mơ Añ,

¹³ bơh jơh ală kòn klau tơnhoa gơrê bal mơ Añ. Tòm tŭ Añ tơnchơt ală kòn klau tơnhoa cau Ejiptơ dê, Añ neh ơn is să tòm Añ in kòp nă kòn klau tơnhoa tòm Israel, bulah la kòn mơnus hala phan poan jơng. Bol khai gơrê bal mơ Añ. Añ la Yàng Jehôwa.”

¹⁴ Yàng Jehôwa đơs mơ Môise tòm ƀlàng ngềt ngơt Sinai lah:

¹⁵ “Kòp khà tĕ cau Lebi jat hìu nhă bol khai dê mơ mpồl hìu nhă bol khai dê. Kòp khà tĕ ală cau klau gơs dô kơnhai hala dờng rlau.”

¹⁶ Behơ̆ Môise kòp khà bol khai jat be jơnau Yàng Jehôwa neh sồr khai.

¹⁷ Do la sơnđan ală kòn klau Lebi dê: Gersôn, Kôhat mơ Merari.

¹⁸ Do la sơnđan ală cau tòm mpồl hìu nhă Gersôn dê: Lipni mơ Simei.

¹⁹ Mpồl hìu nhă Kôhat gơs: Amram, Ijar, Hebrôn mơ Ussiel.

²⁰ Mpồl hìu nhă Merari gơs: Mali mơ Musi. Hơ̆ la ală mpồl hìu nhă Lebi jat ală hìu nhă bol khai dê.

²¹ Lipni mơ Simei la bơtiàn gơrê bal mơ Gersôn; hơ̆ la ală cau tòm ală mpồl hìu nhă Gersôn dê.

²² Ntum khà jơh ală cau klau gơs dô kơnhai hala dờng rlau neh kòp la poh rbô pram rhiang nă.

²³ Ală mpồl hìu nhă Gersôn dê pal bơtào sàl ơm hơ đah mattơngai mut, đah ngkòi Hìu Ing Duh Khoai.

²⁴ Cau at bồ ală hìu nhă Gersôn dê la Eliasap kòn klau Lael.

²⁵ Tòm Sàl Tòm Mat kòn sau Gersôn gơs broă tòm rcang gàr Hìu Ing Duh Khoai mơ sàl, ală blah ồi dơp hơđang sàl, bài kơrnìng di mpồng mut tòm Sàl Tòm Mat,

²⁶ ală bài kơrnìng ƀlàng jơng gùng, bài kơrnìng di mpồng mut hơ ƀlàng jơng gùng gùt dar Hìu Ing Duh Khoai mơ cơnòng ơn phan duh khoai, mơ ală che kơt, mơ jơh ală phan ndai pal ngui bal mơ ală phan hơ̆.

²⁷ Mpồl hìu nhă cau Amram, Ijar, Hebrôn mơ Ussiel gơrê bal mơ jơi bơtiàn Kôhat; do la jơi bơtiàn Kôhat dê,

²⁸ Ntum khà jơh ală cau klau gơs dô kơnhai hala dờng rlau la phàm rbô prau rhiang nă; ală cau Kôhat gơs broă tòm rcang gàr tiah sàng goh.

²⁹ Ală mpồl hìu nhă cau Kôhat pal bơtào sàl đah đơm Hìu Ing Duh Khoai dê.

³⁰ Cau at bồ ală mpồl hìu nhă Kôhat dê la Elisaphan kòn klau Ussiel.

³¹ Bol khai gơs broă tòm rcang gàr Đài Bơta Ho Bal, cơnòng ơn piang lă, jơng đèng, ală cơnòng ơn phan duh khoai, ală phan ngui nàng duh broă tòm tiah sàng goh, bài kơrnìng, mơ jơh ală phan ngui ndai gơrê bal mơ ală phan hơ̆.

³² Cau gơnoar dờng at bồ ală cau Lebi la Eleajar kòn klau Arôn, cau gơnoar ơn phan duh khoai. Khai geh pồ bơtào hơđang ală cau gơs broă tòm rcang gàr tiah sàng goh.

³³ Cau Mali mơ cau Musi gơrê mơ mpồl hìu nhă Merari; hơ̆ la ală mpồl hìu nhă cau Merari.

³⁴ Ntum khà ală cau klau gơs dô kơnhai hala dờng rlau neh geh kòp khà la prau rbô bàr rhiang nă.

³⁵ Cau at bồ ală hìu nhă tòm mpồl hìu nhă Merari dê la Juriel kòn klau Abihail; bol khai pal bơtào sàl ơm hơ đah đang Hìu Ing Duh Khoai dê.

³⁶ Cau Merari geh pồ bơtào rcang gàr ală phan bơt Hìu Ing Duh Khoai, hơ̆ la ală dra, ală jrong, ală mơnàng dơrñang gơ dê, mơ jơh ală phan ndai ngui bal mơ ală phan hơ̆,

³⁷ bal mơ ală jrong gùt dar ƀlàng jơng gùng mơ mơnàng gơ dê, ală gai kơlnĕ kơt sàl mơ ală che kơt gơ dê.

³⁸ Môise mơ Arôn mơ ală kòn klau khai dê pal bơtào sàl di đap Hìu Ing Duh Khoai đah mattơngai lik; di đap Sàl Tòm Mat dê, wèt hơ đah mattơngai lik. Bol khai gơs broă tòm ala mat làng bol Israel rcang gàr tiah sàng goh. Cau lơi tus rềp di tiah sàng goh pal kong tơnchơt.

³⁹ Ntum khà cau Lebi jơh ală neh geh kòp jat jơnau Yàng Jehôwa sồr Môise mơ Arôn jat ală mpồl hìu nhă bol khai dê, kòp bal jơh ală cau klau gơs dô kơnhai hala dờng rlau la bàr jơt bàr rbô nă.

⁴⁰ Yàng Jehôwa đơs mơ Môise lah: “Kòp tĕ jơh ală kòn klau tơnhoa Israel dê gơs dô kơnhai hala dờng rlau mơ cih sơnđan mat bol khai dê.

⁴¹ Ơn is tĕ ală cau Lebi Añ in nàng ala jơh ală kòn tơnhoa cau Israel dê, mơ mpồl phan poan jơng cau Lebi dê nàng ala jơh ală kòn tơnhoa mpồl phan poan jơng cau Israel dê. Añ la Yàng Jehôwa.”

⁴² Behơ̆ Môise kòp jơh ală kòn tơnhoa cau Israel dê jat be jơnau Yàng Jehôwa neh sồr khai.

⁴³ Ntum khà ală kòn klau tơnhoa gơs dô kơnhai hala dờng rlau neh cih sơnđan la bàr jơt bàr rbô bàr rhiang poh jơt pe nă.

⁴⁴ Yàng Jehôwa đơs mơ Môise lah:

⁴⁵ “Ơn is tĕ ală cau Lebi nàng ala jơh ală kòn klau tơnhoa cau Israel dê, mơ ală phan poan jơng cau Lebi dê nàng ala mpồl phan poan jơng cau Israel dê. Ală cau Lebi rơp gơrê bal mơ Añ. Añ la Yàng Jehôwa.

⁴⁶ Nàng tơwài wơl bàr rhiang poh jơt pe nă kòn klau tơnhoa cau Israel dê la lin rlau mơ ntum khà cau Lebi,

⁴⁷ gen dòp tĕ pram sieklơ dô nă, jat sieklơ ngui tòm tiah sàng goh, kòp sieklơ kơr geh bàr jơt gera.

⁴⁸ Ai tĕ jền priă hơ̆ nàng tơwài wơl ală cau Israel oă rlau Arôn in mơ ală kòn klau khai dê.”

⁴⁹ Behơ̆ Môise dòp jền priă tơwài wơl bơh di ală cau tòm mpồl rlau mơ ntum khà cau Lebi.

⁵⁰ Bơh di ală kòn tơnhoa cau Israel dê khai dòp geh dô rbô pe rhiang prau jơt pram sieklơ priă jat sieklơ tiah sàng goh dê.

⁵¹ Môise ai priă tơwài wơl Arôn mơ ală kòn klau khai in jat be jơnau Yàng Jehôwa neh sồr khai.