Jơnau Pơnđik 31 - Sră Goh 2018

Jơnau mè bơtau Lemuel dê bơto tơngkah kòn klau he

¹ Jơnau bơtau Lemuel dê, ală sèng pơnđik mơ mè khai dê bơto khai in.

² Ơ kòn, añ rơp đơs ñchi taih? Ơ kòn mơ hìu kòn añ neh đung, Ơ kòn bơh bơta ho pơgon añ jê, Añ pal đơs bơta lơi mơ kòn taih?

³ Bañ phi bơta pràn kòn cau ùr in, bañ kis jat gùng dà lơh tơnroh cau kwang bơtau in.

⁴ Ơ Lemuel, ò di pal ală cau bơtau in, ò di pal ală cau bơtau in ñô alak tơrnòm, hala ală cau kwang at bồ kòñ phan ñô bơñul;

⁵ Rngòt bol khai ñô, hŭi bơta boh lam, mơ lơh rkwet rkwe bơta cahrña cau dồn sa in sơl.

⁶ Ai tĕ phan ñô bơñul cau roh rui in, mơ alak tơrnòm cau in gơs nùs sràt bơtang:

⁷ Bol khai ñô tĕ, mơ hŭi bơta rƀah rƀừp he, ò kah wơl bơta bòl glar he dê tai.

⁸ Pò tĕ bơr he dong tò cau kloat, bơta gơrềng tus di ală cau gơkòl sang lòi.

⁹ Pò tĕ bơr kòn cahrña dô bă song ring, mơ cahrña cau moat jrùng mơ cau rƀah lơòi in.

Jòng ro cau ùr jak chài mơ chài rgơi

¹⁰ Dô nă cau ùr jak chài mơ chài rgơi ñcau rơp jòi bàn taih? Bơta kas màng khai dê rlau mơ lŭ màng.

¹¹ Nùs bau klau khai dòn kơnòm di khai, khai rơp ò siơ̆u cồng nha.

¹² Jơl jơh rài kis khai lơh bau klau khai in geh cồng nha, ò tŭ lơi gơs bơta roh gơcoh.

¹³ Khai rcang jòi sơnò belàt mơ che brài dơmài, chò hòp ai tê he mơ lơh broă,

¹⁴ Khai tòm toh be ală ơhò kă bro, bơh di tiah ngài khai pơdiang phan sa.

¹⁵ Khai guh bơh bic tŭ trồ gam jơngo, tòmpà phan sa cau tòm hìu nhă khai in, mơ jào broă ală cau dĭ ùr he dê.

¹⁶ Khai kơlôi sơnơng bơh dô bă ƀlàng sre, gen blơi geh gơ; kơnòm di cồng nha bàr đah tê, khai tam dô nơm suơn ño.

¹⁷ Khai kơt but bơta pràn kơldang, mơ lơh bàr đah tơwòr tê he gơlik gơs pràn kơldang.

¹⁸ Khai đal git broă lơh he dê geh cồng nha; trồ mang ồs khai ò chơt.

¹⁹ Khai ơn tê di jrong pơdar; mơ ală kòn tê khai at pơrnồt che.

²⁰ Khai pò tơlik tê khai dê dong kòl cau rƀah, pò tê he dong kòl cau siơ̆u siar.

²¹ Khai ò rngòt cau tòm hìu nhă khai kòl noat mrềt, bơh jơh hìu nhă geh soh ào mơ sơnò belàt ñòm phồng.

²² Khai lơh is ală ồi tơ̆; ồi ào khai mơ che brài dơmài lơbơn dà gur.

²³ Ơm di mpồng ƀòn bau klau khai geh oă cau git, tŭ nggui bal mơ ală cau kwang kra tòm lơgar.

²⁴ Khai kơlôi mơ lơh ào soh tòm dơlam mơ tac gơ; kung tac che but ală cau kă bro in.

²⁵ Khai soh is bơta pràn mơ ryŭ ryơm, Tòm tŭ kơlôi sơnơng bơh tŭ tơngai rơp tus, gen khai ñŏ chò hòp.

²⁶ Khai pò bơr dô bă jak chài, mơ bơta bơto mơ bơta lơbơn niam ơm di lơmpiat khai.

²⁷ Khai sền gàr ală gùng dà hìu khai dê, ò tŭ lơi sa ƀañ bơta lơh ơlah dê.

²⁸ Kòn sau khai ñă ntào, mơ sơnđan khai la cau geh lơngai; bau klau khai kung ñă ntào, mơ jòng ro khai lah:

²⁹ “Gơs oă cau ơruh lơh broă dô bă jak chài, mơya ai la jak rlau mơ jơh ală cau hơ̆!”

³⁰ Bơta hèr niam la ma blac, bơta hàng mơnĕ la roh lơm; mơya cau ùr lơi duh rngòt di Yàng Jehôwa rơp geh Jòng ro.

³¹ Ai tĕ khai in plai đo tê khai dê: lòi tĕ ală broă khai dê jòng ro khai di mpồng ƀòn.