Jơnau Pơnđik 30 - Sră Goh 2018

Jơnau pơnđik mơ jơnau hòi dan Agur dê

¹ Jơnau Agur dê, kòn klau Jake, Jơnau pơnđik mơ cau hơ̆ neh đơs mơ Ithiel mơ Ukan in.

² Di ngan añ la cau tùl gơla rlau mơ jơh ală cau ndai, Añ ò gơs bơta àng loh ndròm mơ dô nă cau.

³ Añ ò bơtê bơta jak chài, mơ kung ò geh bơta git jak Bơtau Sàng Goh dê.

⁴ Ñcau neh guh hơđang trồ, lồc behơ̆ mù wơl taih? Ñcau neh tơrgòm càl tòm kơndồm tê he taih? Ñcau neh bơ̆ dà tòm ào he taih? Ñcau neh bơtào gơs ală nhàr plai ù taih? Ñchi sơnđan mat khai, mơ ñchi sơnđan mat kòn klau khai taih? Dilah mê git đơs tĕ.

⁵ Ală jơnau Yàng Tom Trồ dê neh lơh cơng song ngan; Kơnràñ la khèl đo cau lơi dòn kơnòm di Kơnràñ.

⁶ Bañ bơtơl bơta lơi tòm jơnau Kơnràñ, rngòt Kơnràñ lah pơrhơng mê, mơ mê kòl kòp la dô nă cau đơs blac.

⁷ Añ neh dan mơ Yàng bàr bơta; bañ pơndang sang lài mơ tŭ añ chơt:

⁸ Dan tơngài bơh añ jơnau blac pơrlồm mơ bơta ma blac; bañ lòi añ rƀah lơòi, hala pas sơm; ròng siam tĕ añ tơl ală phan ngui sa.

⁹ Rngòt tŭ hòm lai añ pơndang sang Yàng, mơ lah: Yàng Jehôwa la ñcau taih? Mơ pơrlơ̆ wơl dilah añ rƀah lơòi, gen ntung kơñau, mơ lơh ƀơ̆ iơh sơnđan Yàng Tom Trồ añ jê sơl.

¹⁰ Bañ đơs iơh cau dong broă cau mơ cau tòm khai dê, rngòt khai srat rma mê, mơ mê gơkòl glài.

¹¹ Gơs dô jơi bơtiàn srat rma bèp he, kung ò ai lơngai mè he in.

¹² Gơs dô jơi bơtiàn kơlôi sơnơng he la sàng goh, mơya òhềt geh rào goh bơh bơta ƀơ̆ ƀơl he.

¹³ Gơs dô jơi bơtiàn muh mat lơh be tòm, gơs ală cau gơs mat pơnhừ să!

¹⁴ Gơs dô jơi bơtiàn gơs gơnèng be đào, ală sề be pềs, nàng kap crè ală cau dồn sa klàs bơh ù, mơ ală cau rƀah lơòi klàs bơh jơi kòn mơnus

¹⁵ Dô nơm blu gơs bàr nơm kòn ùr, gơ hòi driau lah: “Ai tĕ! Ai tĕ!” Gơs pe bơta ò gơs tŭ lơi tơl, mơ poan bơta ò tŭ lơi đơs lah: “Tơl rau, tơl rau!”

¹⁶ Hơ̆ la lơgar làng ƀồc, cau ùr kơnền, ù tiah ò bềng tơl dà, mơ ồs ò tŭ lơi đơs lah: “Tơl rau!”

¹⁷ Gar mat dơñŏ tơnhial bèp he, sền òsơp bơta dòn bơr gơwèt mơ mè he, ală kơnđà tòm thòng rơp kwĕ gar mat hơ̆, mơ ală klàng bung rơp sa coh khai.

¹⁸ Gơs pe bơta lơh crih crài ngan añ in, mơ poan bơta mơ añ ò rgơi git wă:

¹⁹ La gùng klàng bung par hơđang trồ; gùng dô nơm bơs wìn hơđang pơnai lŭ; gùng ơhò lòt tòm dàlềng, mơ gùng bic bal cau ùr mơ cau klau dê.

²⁰ Nùs nhơm cau ùr dri tơlàr kung behơ̆ sơl; khai sa, gen khai jùt kơmbùng, mơ đơs lah: “Añ ò lơh tìs glài.”

²¹ Gơs pe bơta lơh plai ù in gơlơnggơr, mơ poan bơta, gơ kong ò jai;

²² Cau dĭ gơna tòm tŭ gơlik gơs cau bơtau; Cau tùl gơla tòm tŭ geh hòm lai phan sa;

²³ Dô nă cau ùr ò gơs cau kòñ gơboh tòm tŭ gơs hìu nhă, mơ dô nă cau ùr ơm dĭ tòm tŭ pơrdòn gơnoar broă cau ùr tòm he dê.

²⁴ Gơs poan nơm phan dềt rhền hơđang plai ù, mơya gơ ngan la jak chài:

²⁵ Jơi ngòñ bulah la jơi lơbơn lơño, git rcang phan sa he tòm kơnhai prang;

²⁶ Jơi tơrpài brê bulah la jơi ò gơs pràn, bơt bơtào tiah ơm he tòm trồm lŭ;

²⁷ Jơi srah nting bulah ò gơs kwang bơtau at bồ, jơh mpồl lòt bal jat tap sèng;

²⁸ Dô nơm cơldĕ cau rgơi ai tê kup geh, kư̆ ơm tòm gơlang bơtau.

²⁹ Gơs pe jơi phan cơnđòa lòt niam mơnĕ, mơ poan jơi cơnđòa lòt ryŭ ryơm;

³⁰ Klìu triă, pràn rlau jơh tòm ală jơi phan poan jơng, ò ruc wơl di đap ală jơi ndai;

³¹ Dô nơm ơseh ngac kơt mơ che kèp; dô nơm be dam, mơ dô nă cau bơtau ò gơs cau lơi geh tòmdră jai.

³² Dilah mê neh tùl gơla mơ yò tơngguh is să, mơ dilah mê gơs bơta kơlôi sơnơng iơh, ai tĕ tê he cang kơmbùng he,

³³ Bơh pat dà toh lơh gơlik gơs dơngi dà toh, mơ pòng di muh gen lơh nsoac mhàm; Kung behơ̆ sơl tòm bơrcek bal gơlik bơta tòmpìt tòmhà.