Jơnau Pơnđik 22 - Sră Goh 2018

¹ Sơnđan geh tiơng pơnro geh sac rwah mơ jền priă phan mơna oă; mơ bơta nđàc màng rlau mơ màh hala priă.

² Cau pas mơ cau rƀah tìp bal; Yàng Jehôwa neh crơng gơs bàr đah.

³ Cau jak chài gŏ bơta rung rài, mơ pồn să he; mơya cau tùl gơla kư̆ lòt tơn, mơ gơkòl tơmut tòm bơta rung rài hơ̆.

⁴ Phan bàn bơta pìn pơndêt să dê mơ bơta duh rngòt Yàng Jehôwa, hơ̆ la bơta pas gơs, bơta jòng màng mơ bơta kis.

⁵ Tòm gùng cau rkwet rkwe gơs lò mơ dă; cau git kơrhia rơp pleh ngài bơh gơ.

⁶ Bơto tĕ kòn dềt in dô nơm gùng di khai pal jat; bulah tŭ khai neh kra, kung ò tŭ lơi sang lòi gơ.

⁷ Cau pas at bồ cau rƀah; cau lơi càn la dĭ gơna cau ai càn dê.

⁸ Cau lơi sih bơta ò song ring rơp toès bơta rung rài; mơ gai mơng bơta gơjrañ dờng khai dê rơp kong tơrpă.

⁹ Cau lơi gơs nùs dờng ơnàng rơp geh lơngai; bơh khai ai piang lă he cau jơgloh rƀah in.

¹⁰ Bơtrơh tĕ cau bơrsèl tơnhial, gen bơta tòmlah tòm pơndang kung rơp thit; bơta tòmlah mơ bơta dơñŏ tơnhial rơp jơh.

¹¹ Cau lơi mềr gơboh nùs sàng goh, mơ gơs bơr sơndồi lơbơn niam, rơp geh cau bơtau lơh yô.

¹² Mat Yàng Jehôwa sền gàr cau gơs bơta git wă; mơya Kơnràñ tuh tơlup jơnau cau rkwet rkwe dê.

¹³ Cau lơh alah đơs: Gơs dô nơm klìu triă ơm bơdìh; añ rơp kòl tơnchơt tòm gùng.

¹⁴ Bơr cau ùr rềs àr bơrnàn la dô nơm cìr jrô; cau lơi kong Yàng Jehôwa gơjrañ rơp gơdùh tòm hơ̆.

¹⁵ Bơta bơrngơl gơla neh kơt tòm nùs kòn dềt; mơya mơng pù tơmàl rơp lơh bơta hơ̆ lik ngài.

¹⁶ Cau lơi rồn bơklơn cau rƀah nàng lơh khai in pas gơs; mơ cau lơi ai cau pas gơs in mìng lơh khai in gơmut tòm bơta siơ̆u siar.

Jơnau cau jak chài

¹⁷ Wèt tồr iat tĕ jơnau cau jak chài, Wèt nùs kòn kơlôi bơh jơnau añ bơto.

¹⁸ Kòn rơp chò nùs dilah kòn prap gàr gơtòm nùs kòn, mơ ơn gơtòm bơr sơndồi kòn.

¹⁹ Ngai do añ neh bơto kòn in git wă ală bơta hơ̆, nàng kòn gơs nùs dòn kơnòm di Yàng Jehôwa.

²⁰ Añ ngan neh ò cih kòn in pe jơt jơnau pơnđik bơh bơta jak chài mơ bơh bơta git wă ơ?

²¹ Nàng kòn in git ñchi lơi song ring mơ song ngan, tồ kòn in ai jơnau song ngan mơ ho wơl mơ ală cau sồr kòn?

²² Bañ tòmpìt kơñau phan cau rƀah, tài bơh bol khai rƀah, kung bañ rồn bơklơn cau dồn sa rƀah di mpồng ƀòn.

²³ Bơh Yàng Jehôwa rơp dong tò jơnau tò să bol khai, mơ tă tơlik bơta kis cau neh kơñau sơmbrơt bol khai.

²⁴ Bañ lơh yô mơ cau jak gơjrañ; bañ ring lơngai mơ cau rhung rhang,

²⁵ Rngòt kòn bơtê jat gùng dà khai, mơ hwềng soàn kòn gơkòl yar dă mòn.

²⁶ Bañ lơh dô bă bal mơ ală cau ơn tê tòm bơta ai phan bơrkòl dồs, hala cau dòp leng ala kong dồs:

²⁷ Dilah kòn ò gơs phan lơi tơm, ñchi bơh tài cơnòng bic kòn dê gơtă bơh hơđơm kòn taih?

²⁸ Bañ ntròn ală tềl nhàr yau, mơ ồng pàng kòn neh bơtào.

²⁹ Kòn gŏ gơs cau lơi ngac ngar tòm broă lơh he dê sơl? Cau hơ̆ ngan rơp duh broă ală cau bơtau, mơ ò di duh broă cau làng òs.