Jơnau Pơnđik 14 - Sră Goh 2018

¹ Cau ùr jak chài bơt bơtào hìu he; Ai cau tùl gơla ai tê he sòr tơnroh gơ.

² Cau lơi lòt jat bơta song ngan duh rngòt Yàng Jehôwa; Ai cau lơi lơh lòt rkwet rkwe sền òsơp di Kơnràñ,

³ Tòm bơr cau tùl gơla gơs mơng pù lơh bơta pơnhừ să khai; Mơya sơndồi cau jak chài sền gàr khai.

⁴ Tiah lơi ò gơs kơnrồ, tềng hơ̆ bòng ñhơt soh gòi; Mơya cồng nha oă bơh pràn kơnrồ dam mơ gơs.

⁵ Cau lơh cơng dòn song ò tŭ lơi đơs blac; Ai cau lơh cơng blac ngui jơnau lac lèo.

⁶ Cau dơñŏ tơnhial jòi ò bàn bơta jak chài; Mơya bơta git jak ai lơh ƀuơn soh cau àng loh in.

⁷ Pleh ngài tĕ bơh cau tùl gơla, Kòn rơp ò jòi bàn sơndồi jak chài di khai.

⁸ Bơta chài rgơi cau jak chài dê, hơ̆ la wă loh gùng dà he; Mơya bơta lu sơnrang cau tùl gơla dê la bơta blac pơrlồm.

⁹ Cau bơrngơl gơla dơñŏ tơnhial tồi glài; Mơya cau song ngan hòn chò bơta niam nùs Yàng Tom Trồ dê.

¹⁰ Bơta sràt bơtang kòp nùs đal git is; Cau ndai ò geh tòmpà bơta chò hòp mơ khai.

¹¹ Hìu cau iơh bơsak rơp kong pòng tơrlah; Mơya sàl cau song ngan rơp geh bơtoah bơtoài

¹² Gơs dô nơm gùng sền gơlơh be di pal jơi kòn mơnus in; Mơya tus di lồi dut gơ gơlik gơs gùng bơta chơt.

¹³ Bulah tòm tŭ ñŏ kơnhơl nùs gam moat jrùng; Mơ lồi dut bơta chò hòp, hơ̆ la bơta rac ròc.

¹⁴ Cau ò dòn song dòp cồng nha broă khai dê; Ai cau niam geh phan ƀàn di pal.

¹⁵ Cau bơrngơl gơla dòn jơh ală jơnau; Mơya cau chài rgơi sền sơwì ală cơnđòa he dê.

¹⁶ Cau jak chài rngòt mơ pleh klàs di bơta iơh; Mơya cau tùl gơla pơnhừ să, mơ ò git kơrhia.

¹⁷ Cau duh nùs lơh lu lơh sơnrang; Mơ cau bơtào kai gơrmơ̆i kong gơjrañ.

¹⁸ Cau tùl gơla geh bơta lu sơnrang lơh gơs sre brê; mơya cau jak chài geh tơndau sơgơn bơtau mơ bơta git jak.

¹⁹ Cau iơh cùn khoai di đap cau niam; mơ cau bơsak rơp ơm kơp di mpồng cau song ring.

²⁰ Cau rƀah bulah cau gơp ƀòn kung sang lòi; mơya cau pas gen oă ngan bơyô.

²¹ Cau lơi sền òsơp cau gơp ƀòn he, la ală cau tìs glài; Lơngai cau lơi in nđàc sơngit cau dồn sa rƀah.

²² Cau jòi kai iơh ngan ò tìs nrah ơ? Ai cau jòi bơta niam gen dòp leng bơta kơ̆ dơn mơ bơta dòn song.

²³ Lơh broă cèng cồng nha; Mơya mìng đơs lơm lam tus bơta siơ̆u siar.

²⁴ Sơgơn bơtau cau jak chài dê la bơta pas gơs; Ai cau lu sơnrang wan che bơka di ngko la lu sơnrang.

²⁵ Cau lơh cơng song ngan dong klàs bơta kis oă cau; Mơya cau lơi đơs blac la cau pơrlơ̆ dră.

²⁶ Ală cau duh rngòt Yàng Jehôwa gơs tiah gơn kơnòm kơ̆ cê; Kơnràñ rơp la tiah kìng crŭ ală kòn sau bol khai in.

²⁷ Bơta duh rngòt Yàng Jehôwa ngan la dô nơm tồ bơta kis, Nàng cau in rgơi pleh klàs bơh dă bơta chơt.

²⁸ Làng bol oă ngan hơ̆ la bơta gơklŏ cau bơtau dê; Làng bol gơs dô êt, cau kwang kong ơlah.

²⁹ Cau òbat gơhào gơjrañ gơs bơta àng jak dờng; Mơya cau lơi jak gơhào nùs yò tơlik bơta kroă sơnrang.

³⁰ Nùs ring lơngai la bơta kis să jan dê; Ai bơta gơjrañ mañ la bơta ồm lề ntìng dê,

³¹ Cau rồn bơklơn cau rƀah sền òsơp Bơtau crơng gơs he; Ai cau lơi nđàc sơngit cau rƀah rƀừp sền dờng màng di Kơnràñ.

³² Cau iơh kong tuh tơlup tòm bơta iơh bơsak he; Mơya cau song ring gam gơs tiah gơn kơnòm, bulah tòm tŭ chơt.

³³ Bơta jak chài ơm tòm nùs cau àng loh; Mơya tòm nùs cau tùl gơla gen ò rgơi jòi bàn gơ.

³⁴ Bơta song ring lơh lơgar in ryŭ ryơm; Mơya tồi glài la bơta ƀàssìl ƀàsso lơgar in.

³⁵ Dô nă dĭ gơna lơh lòt jak chài niam nùs bơtau; Mơya bơta gơjrañ dờng bơtau dê dùh hơđang cau lơh lòt ƀàssìl.