I Tesalônika 5 - Sră Goh 2018

Ngai Yàng dê pal drơng kơp

¹ Ơ oh mi, bơh tơngai mơ kơnhai sơnam gen ò càng cih oh mi in ò;

² bơh să tòm oh mi git loh ngan lah ngai Yàng dê rơp tus be cau kơñau tòm trồ mang.

³ Tòm tŭ cau đơs: “Ring lơngai mơ lơngap lơngai,” gen bơta tơnroh nisơna tus hơđang bol khai be bơta jê deh gơtơntus cau ùr bun in, mơ bol khai ngan ò geh pleh klàs ò.

⁴ Mơya, ơ oh mi, oh mi ò di ơm tòm bơta klam jơngo ò, tian gơs ngai hơ̆ nisơna gơtơntus hơđang oh mi be cau kơñau.

⁵ Bơh oh mi jơh tơl nă la cau gơrê bal tòm bơta àng mơ trồ ngai. Bol he ò di bal mơ trồ mang, kung ò di bal mơ bơta klam jơngo.

⁶ Behơ̆, bol he bañ bic be cau ndai, mơya pal drơng kơp mơ ngac mat.

⁷ Bơh cau bic la bic trồ mang, cau bơñul la bơñul trồ mang.

⁸ Mơya bol he la cau neh bal mơ trồ ngai, gen tàng ngac mat tĕ, dòp soh bơta dòn mơ nùs kòñ gơboh kung be ào lòs, ai bơta gơn kơnòm bơh bơta dong klàs lơh gơs kung be sơgơn lòs.

⁹ Bơh Yàng Tom Trồ ò di lơh nền lòi bol he kong bơta gơjrañ dờng ò, mơya tồ dòp geh bơta dong klàs bơh Yàng Jesu Krist bol he dê,

¹⁰ la Bơtau neh chơt bơh bol he, tồ bol he in bulah kis hala chơt, geh kis bal mơ Kơnràñ.

¹¹ Gen tàng oh mi pơndòm pơniang bal mơ gơp, bơt bơtào bal mơ gơp, kung be oh mi òs lơh.

Jơnau bơto tơngkah ndai

¹² Ơ oh mi, bol hi rac dan oh mi ki ngàm tĕ dê ală cau kong bòl glar lơh broă digùl oh mi, la cau lam bồ mơ bơto tơngkah oh mi tòm Yàng.

¹³ Ai tĕ nùs kòñ gơboh mơ sền dờng màng di bol khai tài bơh broă lơh bol khai dê. Ơm tĕ gơtòmsòr bal mơ gơp.

¹⁴ Bol hi jơh nùs dan oh mi lah, bơto tơngkah tĕ ală cau ală alai, chồl bơtrut ală cau ò khin cha, dong kòl ală cau lơbơn lơño, kong ơt gơwèt mơ tơl nă cau.

¹⁵ Kơrhia tĕ, bañ gơs cau lơi ai bơta iơh bơsak sal wơl bơta iơh bơsak, mơya jòi jat tĕ sùm bơta niam gơwèt bal mơ gơp hala gơwèt mơ tơl nă cau.

¹⁶ Hòn chò tĕ sùm sùm.

¹⁷ Hòi dan tĕ ò dơh.

¹⁸ Bulah tòm broă lơi kung pal ưnngài Yàng Tom Trồ, bơh nùs kòñ Yàng Tom Trồ dê tòm Yàng Krist Jesu gơwèt mơ oh mi la behơ̆.

¹⁹ Bañ tơnchơt ồs Yàng Hwềng Goh dê.

²⁰ Bañ sền òsơp di jơnau đơs hwơr.

²¹ Lòng tĕ jơh ală broă, bơta lơi niam gen prap gàr tĕ.

²² Pleh tĕ di jơh ală bơta gơlơh be iơh bơsak.

²³ Dan să tòm Yàng Tom Trồ la Bơtau ai bơta lơngap lơngai lơh oh mi in gơlik gơs sàng goh wil tơl, mơ dan hwềng nùs, hwềng soàn mơ să jan oh mi dê geh prap gàr wil tơl, ò gơs tiah geh lah pơrhơng tòm tŭ Yàng Jesu Krist bol he dê tus wơl.

²⁴ Bơtau neh hòi sac oh mi la Bơtau lơh jat jơnau ho Kơnràñ dê, să tòm Kơnràñ rơp lơh broă hơ̆.

²⁵ Ơ oh mi, hòi dan tĕ bol hi in ƀà.

²⁶ Ai tĕ bơta còp să sàng goh mơ còp să jơh ală oh mi.

²⁷ Añ ai sơnđan Yàng mơ nting sồr oh mi sền tĕ sră pơyoa do jơh ală oh mi in iat.

²⁸ Dan bơta nđàc Yàng Jesu Krist bol he dê ơm bal mơ oh mi.