I Tesalônika 4 - Sră Goh 2018

Ală jơnau bơto sồr ( 4:1 – 5:28 ) Kis niam nùs Yàng

¹ Lồi tơnơ̆, ơ oh mi, be oh mi neh bơtê bơh bol hi pal lơh lòt be lơi tồ niam nùs Yàng Tom Trồ, ngan be oh mi lơh lòt tŭ do, gen bol hi ơm tòm Yàng Jesu mơ dan bơto tơngkah oh mi kư̆ lơh behơ̆ sơlo ngai sơlo rlau tai.

² Bơh oh mi git bơta bơto sồr lơi mơ bol hi neh ai oh mi in tòm gơnap gơnoar Yàng Jesu dê.

³ Bơh nùs kòñ Yàng Tom Trồ dê, hơ̆ la oh mi gơlik gơs sàng goh, bañ tìs glài rềs àr bơrnàn.

⁴ Kòp nă tòm oh mi pal git kơrmap gàr să he tòm bơta gơlik gơs sàng goh mơ màng ryŭ,

⁵ ò di jat nùs gơboh iơh bơta hàm kòñ is dê, be làng bol bơdìh la cau ò dòp git Yàng Tom Trồ,

⁶ bañ gơs cau lơi lơh tìs mơ lơh iơh mơ oh mi he tòm broă hơ̆, tài bơh Yàng la Bơtau sal wơl jơh ală bơta hơ̆, kung be bol hi neh đơs lài mơ neh lơh cơng oh mi in rau.

⁷ Bơh Yàng Tom Trồ ò di hòi bol he tus hơ bơta ngkòr ngkàc ò, mơya tus hơ bơta gơlik gơs sàng goh.

⁸ Gen tàng cau lơi sang lòi bơta do gen ò di sang lòi cau ò, mơya hơ̆ la sang lòi Yàng Tom Trồ la Bơtau ai Yàng Hwềng Goh Kơnràñ dê oh mi in.

⁹ Bơh bơta kòñ gơboh bal oh mi dê, gen ò càng cau lơi cih oh mi in, bơh să tòm oh mi neh geh Yàng Tom Trồ bơto lah pal kòñ gơboh bal mơ gơp;

¹⁰ ngan oh mi lơh behơ̆ gơwèt mơ jơh ală oh mi tòm làm Masedoan rau. Mơya, ơ oh mi, bol hi bơto tơngkah oh mi sơlo ngai pal kòñ gơboh sơlo oă tai.

¹¹ Bơtê tĕ lơh lòt dô bă ring ngềt, rcang broă tòm he dê, ai tê tòm he lơh broă, be bol hi neh nting sồr oh mi,

¹² tòm bơta do oh mi rơp geh ki ngàm digùl ală cau ò dòn, mơ oh mi ò lơh pơnjê di cau lơi.

Bơta kis wơl cau dòn tòm ngai Yàng tus

¹³ Ơ oh mi, bol hi ò kòñ oh mi ò git bơh cau neh bic, tồ oh mi in ò moat jrùng be cau ndai ò gơs bơta gơn kơnòm.

¹⁴ Bơh dilah bol he dòn Yàng Jesu neh chơt mơ kis wơl, gen Yàng Tom Trồ kung rơp cèng ală cau bic tòm Yàng Jesu tus bal mơ Kơnràñ sơl.

¹⁵ Do la bơta bol hi kơnòm di jơnau Yàng mơ yal oh mi in lah bol he la cau kis, gam ơm wơl jơl tus di tŭ Yàng tus wơl, gen ò gơs tŭ lơi lòt lài mơ ală cau neh bic ò.

¹⁶ Bơh să tòm Yàng rơp mù bơh đang trồ bal mơ jơnau driau sồr mơ jơnau hòi cau gơnrơh dờng rlau jơh dê, bal mơ ntas kơlwòk Yàng Tom Trồ dê, gen ală cau chơt tòm Bơtau Krist rơp kis wơl lài.

¹⁷ Gen bol he la cau kis mơ gam ơm wơl rơp geh guh bal mơ ală cau hơ̆ tòm mhwal nàng tìp mơ Yàng hơđang pah gòi. Behơ̆ bol he rơp ơm bal mơ Yàng sùm sùm.

¹⁸ Behơ̆ gen, oh mi ai tĕ jơnau hơ̆ nàng pơndòm pơniang bal mơ gơp.