I Tesalônika 1 - Sră Goh 2018

Jơnau còp să

¹ Pol, Silbanus, mơ Timôthe pơyoa Hìu Jum Goh cau Tesalônika in tòm Yàng Tom Trồ la Bèp, mơ tòm Yàng Jesu Krist: Dan oh mi in geh bơta nđàc mơ bơta lơngap lơngai.

Bơta gơtòmklac bal Hìu Jum Goh Tesalônika dê Gơwèt mơ ală cau gơnoar bơto dờng ( 1:2 – 3:13 ) Bơta lơh lòt cau dòn Yàng tòm Tesalônika dê

² Bol hi òs bơh jơh ală oh mi mơ ưnngài Yàng Tom Trồ, mơ kah oh mi sùm tòm tŭ hòi dan;

³ bơh di đap Yàng Tom Trồ la Bèp bol he dê, bol hi kah sùm bơh tơngai broă bơta dòn dê, bơta kong bòl glar lơh broă nùs kòñ gơboh dê, mơ ntào kơ̆ tòm bơta gơn kơnòm oh mi dê tòm Yàng Jesu Krist bol he dê.

⁴ Ơ oh mi la cau geh Yàng Tom Trồ kòñ gơboh, bol hi git oh mi neh geh sac rwah,

⁵ bơh Jơnau Niam bol hi dê neh bơto yal oh mi in, ò di mìng bơh jơnau đơs lơm, mơya kung bơh gơnap gơnoar, bơh Yàng Hwềng Goh mơ bơh oă bơta dòn nền cê wil tơl sơl, kung be oh mi git bol hi ơm digùl oh mi la mbe lơi; bơta hơ̆ la niam oh mi in.

⁶ Gen oh mi neh đòm jat bol hi mơ kung đòm jat Yàng sơl, ai bơta hòn chò Yàng Hwềng Goh dê mơ dòp jơnau Yàng dê digùl oă bơta jê sồt bòl glar,

⁷ tian gơs oh mi gơlik gơs krơh niam jơh ală cau dòn jat in ơm tòm Masedoan mơ Acai.

⁸ Bơh jơnau Yàng bơh oh mi neh gơpơnro ò di mìng tòm Masedoan mơ Acai lơm, mơya bơta dòn oh mi dê tòm Yàng Tom Trồ kung neh pơnro làm jơh ală tiah, tian gơs bol hi ò càng đơs jơnau lơi tai.

⁹ Bơh să tòm bol khai yal wơl mbe lơi bol hi tus digùl oh mi, mơ mbe lơi oh mi neh sang rùp ràk mơ rê wơl hơ Yàng Tom Trồ, nàng duh broă Yàng Tom Trồ gam kis sùm mơ song ngan,

¹⁰ mơ kơp gơn Kòn Kơnràñ dê tus bơh đang trồ, la Yàng Jesu mơ Yàng Tom Trồ neh hòi kis wơl bơh bơta chơt, hơ̆ la Bơtau dong tă bol he klàs bơh bơta gơjrañ dờng rơp tus.