I Samuel 29 - Sră Goh 2018

Akis bơtrơh Dabit rê wơl hơ Jiklak

¹ Tŭ hơ̆ cau Philistin pơjum jơh ală mpồl ling bol khai dê tòm Aphek, mơ cau Israel lơh sàl di gah dà croh tòm Jejreel.

² Tòm tŭ ală kwang at bồ cau Philistin lòt bal mơ ală mpồl rbô rhiang ling bol khai dê, gen Dabit mơ ală cau khai dê lòt đah ngkòi bal mơ Akis.

³ Ală kwang at bồ ling cau Philistin dê lùp lah: “Ñchi ală cau Hebrơ lơh tềng do taih?” Akis ho lah: “Do ò di la Dabit cau duh broă Sol bơtau Israel dê ò ơ? Bơh di tŭ khai ơm bal mơ añ rlau dô nam jơl tus tŭ do añ ò bàn dô bơta tìs lơi tòm khai.”

⁴ Mơya ală kwang at bồ mpồl ling Philistin dê gơjrañ di khai mơ đơs lah: “Sồr tĕ cau do rê wơl hơ tiah mơ bơtau neh jào khai in. Khai ò di lòt bal mơ bol he tòm bơta tòmlơh, rngòt khai gơlik gơs cau sò tơm di bol he tòm tŭ tòmlơh. Bơh mbe khai rgơi lơh gơtòmsòr wơl mơ cau tòm khai dê taih? Dilah ò kơnòm di bồ ală cau bol he dê tềng do ơ?

⁵ Ò di la bơh Dabit do mơ bol khai neh đơs chò tòm tŭ tòmya lah: ‘Sol neh tơnchơt oă rbô, mơ Dabit neh tơnchơt hơđang jơt rbô’ ò ơ?”

⁶ Behơ̆ Akis hòi Dabit mơ đơs mơ khai lah: “Di ngan kung be Yàng Jehôwa kis, mê la dô nă cau rgơi dòn kơnòm, mơ añ niam nùs gơs mê duh broă bal mơ añ tòm mpồl ling. Bơh di ngai mê tus mơ añ jơl tus di ngai do, añ ò bàn dô bơta tìs lơi tòm mê, bulah behơ̆ ală kwang at bồ ò dòp rò mê.

⁷ Behơ̆, rê wơl tĕ mơ lòt lơngap lơngai, bañ lơh bơta lơi ò niam nùs ală kwang at bồ ling Philistin dê.”

⁸ Dabit lùp lah: “Mơya ñchi bơta añ neh lơh taih? Ñchi bơta bơtau neh bàn di cau duh broă bơtau dê bơh di ngai añ neh tus mơ bơtau jơl tus di ngai do, mơ añ ò geh lòt tòmlơh mơ cau sò tơm cau tòm añ jê la bơtau taih?”

⁹ Akis ho lah: “Añ git lah mê ò lơh bơta tìs lơi di đap mat añ kung be dô nă cau gơnrơh Yàng Tom Trồ dê, bulah behơ̆, ală kwang at bồ ling cau Philistin dê neh đơs lah: ‘Khai ò di lòt bal mơ bol he tòm bơta tòmlơh.’

¹⁰ Tŭ do ñă tĕ gòñ bal mơ ală cau duh broă cau tòm mê dê neh tus bal mơ mê, mơ lòt tus hơ tiah mơ añ neh sơnio mê in, kung be bơh ală jơnau yal wơl iơh, bañ ơn jơnau hơ̆ tòm nùs, bơh mê neh lơh bơta niam di đap añ. Sơntòm tĕ gòñ bơh rìng àng mơ lik lòt gòñ kàr lơi nggòc mê in kàr hơ̆.”

¹¹ Behơ̆ Dabit mơ ală cau khai dê guh gòñ bơh drim rê wơl hơ ù tiah cau Philistin, mơya cau Philistin neh guh hơ Jejreel.