I Samuel 19 - Sră Goh 2018

Sol jòi gùng nàng tơnchơt Dabit

¹ Sol đơs mơ Jônathan kòn klau khai dê bal mơ jơh ală cau duh broă khai dê tơnchơt Dabit. Mơya Jônathan kòñ gơboh đềt mềr di Dabit.

² Jônathan yal Dabit in lah: “Sol bèp añ kòñ tơnchơt mê; gen tàng kơrhia tĕ tòm drim ngai hìng, ơm tòm tiah ndơp ndơr mơ pồn să mê tềng hơ̆.

³ Añ rơp lik lòt mơ ntào di gah bèp añ tòm ƀlàng di tiah mê ơm. Añ rơp đơs mơ khai bơh mê mơ añ rơp yal mê in bơta lơi añ git.”

⁴ Behơ̆ Jônathan đơs niam bơh Dabit mơ Sol bèp khai dê lah: “Cau bơtau bañ tìs glài tòmdră mơ Dabit; tài bơh khai ò lơh tìs tòmdră mơ bơtau; mơ bơh broă khai neh lơh la nàng duh broă niam bơtau dê.

⁵ Khai neh phi bơta kis khai dê tòm tŭ khai tơnchơt Gôliat. Yàng Jehôwa neh ai Israel in bơta pha lin rlau dờng ngan, bèp neh gŏ bơta hơ̆ mơ hòn chò. Behơ̆, ñchi bơh tài bèp lơh tìs kòñ tơnchơt dô nă cau ò gơs glài la Dabit taih?”

⁶ Sol iat jơnau Jônathan mơ srat să ho lah: “Di ngan kung be Yàng Jehôwa kis sùm, Dabit rơp ò kong tơnchơt.”

⁷ Behơ̆, Jônathan hòi Dabit mơ yal wơl khai in jơh ală jơnau neh tòmbơhbơr digùl khai mơ Sol. Khai lam Dabit tus hơ Sol mơ Dabit ơm bal mơ Sol kung be lài òr.

Mikal dong Dabit dô klàs bơh Sol

⁸ Gơs bơta kơlìn gơtoă dô dơ̆ tai, Dabit lik lòt tòmlơh mơ làng bol Philistin. Khai tòmlơh pràn kơldang lơh bol khai in chơt oă ngan, tian gơs bol khai ntoat dô bơh di đap khai.

⁹ Gen Yàng Jehôwa sồr dô nơm hwềng iơh tus hơđang Sol, khai nggui tòm hìu at tà tòm tê, tòm tŭ Dabit pĕ kơñi.

¹⁰ Sol kòñ ai tà tơng Dabit pơng di dơrñang; mơya Dabit pleh klàs, behơ̆ tà gơ tơng di dơrñang. Tòm mang hơ̆ Dabit dô mơ pleh klàs.

¹¹ Sol sồr cau lòt tus di hìu Dabit nàng kơp mơ tơnchơt khai tòm àng drim hìng. Mơya Mikal, bau Dabit dê yal tơngkah khai in lah: “Dilah mê ò dô pleh tòm mang do gen tòm ngai hìng mê rơp kong tơnchơt.”

¹² Behơ̆ Mikal tơmù Dabit bơh mpồng dềt, khai dô mơ geh klàs.

¹³ Gen Mikal ai dô nơm rùp ràk, mơ ơn gơ hơđang cơnòng bic, tơntơ̆ mơ ồi ào mơ ơn dô êt sơnò be di bồ.

¹⁴ Tòm tŭ Sol sồr cau tus nàng kup Dabit, gen Mikal đơs lah: “Khai bic kòp.”

¹⁵ Gen Sol sồr cau rê wơl nàng sền Dabit mơ nting bol khai lah: “Cèng tĕ khai ơm bic hơđang cơnòng tus hơ añ nàng añ tơnchơt khai.”

¹⁶ Mơya tòm tŭ ală cau mut tòm hìu, bol khai gŏ dô nơm rùp ràk ơm hơđang cơnòng, di bồ gơ gơs dô êt sơnò be.

¹⁷ Sol đơs mơ Mikal lah: “Ñchi bơh tài ai neh pơrlồm añ behơ̆ mơ lòi cau sò tơm di añ lòt tian gơs khai neh dô klàs taih?” Mikal ho Sol lah: “Khai neh đơs mơ añ lah: ‘Lòi tĕ añ in lòt, dilah ò añ rơp tơnchơt ai!’”

Dabit tìp Samuel tòm Rama

¹⁸ Tòm tŭ Dabit dô mơ geh klàs, khai lòt tus hơ Samuel tòm Ramah mơ yal jơh ală bơta Sol neh lơh khai in. Lồc behơ̆, khai mơ Samuel lòt tus hơ Naiôt mơ ơm tềng hơ̆.

¹⁹ Gơs cau yal Sol in lah: “Dabit ơm tòm Naiôt tòm Rama.”

²⁰ Behơ̆ Sol sồr cau lòt kup Dabit; mơya tòm tŭ bol khai gŏ dô mpồl cau gơnoar hwơr ơm đơs hwơr, gơs Samuel ntào tềng hơ̆ at bồ mpồl hơ̆; gen Hwềng Yàng Tom Trồ dê mù hơđang ală cau Sol neh sồr, mơ bol khai kung đơs hwơr.

²¹ Cau yal Sol in bơta hơ̆, gen khai sồr cau ndai tai, mơ bol khai kung đơs hwơr sơl. Sol sồr cau dơ̆ pe tai mơ bol khai kung đơs hwơr.

²² Lồi dut, să tòm Sol lòt hơ Ramah, mơ tus di tơrlung dờng tòm Seku. Khai lùp lah: “Ntềng đah Samuel mơ Dabit taih?” Gơs cau ho lah: “Ne bol khai ơm tòm Naiôt tòm Ramah.”

²³ Behơ̆ khai lòt tus hơ Naiôt tòm Ramah. Mơya Hwềng Yàng Tom Trồ dê kung mù hơđang khai sơl, khai lòt bal mơ đơs hwơr jơl tus di tŭ khai tus tòm Naiôt.

²⁴ Khai hồ ală ào khai dê mơ đơs hwơr di đap Samuel, khai bic kuh behơ̆ jơh dô ngai mơ dô mang hơ̆. Gen tàng làng bol đơs lah: “Sol kung ơm tòm mpồl ală cau gơnoar hwơr sơl ơ?”