I Pier 4 - Sră Goh 2018

Rài kis geh tòmgơl pa

¹ Behơ̆, bơh Bơtau Krist neh kong bòl glar jê sồt tòm poac să, gen oh mi kung pal ai bơta kơlôi sơnơng behơ̆ be phan tòmlơh, bơh cau lơi neh kong bòl glar jê sồt tòm poac să gen neh geh gơltac bơh tồi glài,

² nàng tòm ală ngai gam kis tòm poac să gen ò jat tai ală bơta hàm kòñ is kòn mơnus dê, mơya jat nùs kòñ Yàng Tom Trồ dê.

³ Bơh lài òr oh mi neh sang tŭ tơngai lơh tơl ală bơta be cau làng bol bơdìh kòñ lơh, hơ̆ la kis tòm bơta bung jang, hàm kòñ jat poac să, bơñul lơmbè, sơlồng sơlàng, gơlềng gơlàng mơ duh rùp ràk cù kìr.

⁴ Bol khai gŏ oh mi tŭ do ò jat bol khai lơh bơta gơlềng gơlàng ală alai hơ̆, gen bol khai ai lơh krơi mơ đơs iơh di oh mi,

⁵ mơya bol khai pal yal broă mơ Bơtau neh rcang sir nàng cahrña cau kis mơ cau chơt.

⁶ Tài bơh bơta hơ̆ mơ Jơnau Niam kung neh geh bơto yal cau chơt in, tơnơ̆ mơ tŭ neh kong cahrña đah poac să jat be kòn mơnus, nàng bol khai geh kis đah hwềng jat be Yàng Tom Trồ.

Kơrmap gàr ală bơta nđàc

⁷ Bơta lồi dut jơh ală phan neh rềp rau, behơ̆ ngac mat tĕ, mơ drơng kơp tòm bơta hòi dan.

⁸ Lài ngan, kòñ gơboh tĕ bal mơ gơp dô bă đềt mềr, bơh bơta kòñ gơboh jơm ndơp ò git nđò bơta tồi glài.

⁹ Wă rò sơrmah sơrmài tĕ bal mơ gơp, bañ yoam.

¹⁰ Kòp nă ai tĕ bơta ai gòi he neh dòp geh nàng duh broă bal mơ gơp, kung be cau at bồ hìu dô bă niam dòn song tòmpà bơta nđàc lìu làc Yàng Tom Trồ dê.

¹¹ Dilah gơs cau lơi bơto, gen bơto tĕ be bơto yal jơnau Yàng Tom Trồ dê; dilah gơs cau lơi duh broă, gen duh tĕ broă kơnòm di pràn Yàng Tom Trồ ai, nàng Yàng Tom Trồ geh àng sơnđan tòm jơh ală bơta kơnòm di Yàng Jesu Krist. Dan bơta gơklŏ mơ gơnap gơnoar gơrê bal mơ Kơnràñ sùm sùm ò lồi. Amen.

Kong bòl glar jê sồt bơh Bơtau Krist

¹² Ơ ală cau kòñ gơboh, tòm tŭ bơta gơlòng bòl glar gơtơntus kung be ồs nàng lòng oh mi, gen oh mi bañ ai lơh mơp dơl be he tìp dô nơm broă krơi is.

¹³ Mơya oh mi gơs pơnah tòm bơta bòl glar jê sồt Bơtau Krist dê kàr lơi, gen hòn chò tĕ kàr hơ̆, tồ tus di ngai bơta gơklŏ Kơnràñ dê geh ràng tơlik, gen oh mi kung geh hòn chò ò git lơh.

¹⁴ Dilah oh mi bơh sơnđan Bơtau Krist mơ kong bơtat bơtròh, gen oh mi geh lơngai, tài bơh Hwềng gơklŏ Yàng Tom Trồ dê ơm hơđang oh mi.

¹⁵ Tòm oh mi bañ gơs cau lơi kong bòl glar jê sồt be cau tơnchơt cau, be cau ntung kơñau, be cau lơh tìs bơta boh lam, hala cau lơh be tòm tòm broă cau ndai dê.

¹⁶ Pơrlơ̆ wơl, dilah gơs cau lơi tài bơh geh sơnđan la cau dòn jat Bơtau Krist mơ kong bòl glar jê sồt, gen bañ ƀàssìl; mơya bơh sơnđan hơ̆ mơ jòng ro tĕ Yàng Tom Trồ.

¹⁷ Bơh tŭ tơngai cahrña neh tus, sơntòm bơh di hìu Yàng Tom Trồ dê; mơ dilah sơntòm bơh di bol he, gen bơta lồi dut ală cau ò dòn jat Jơnau Niam Yàng Tom Trồ dê rơp gơlik gơs mbe lơi taih?

¹⁸ Mơ “dilah cau song ring kung kalke geh dong klàs, gen ală cau ò duh rngòt mơ ală cau glài rơp gơlik mbe lơi taih?”

¹⁹ Behơ̆, gen ală cau kong bòl glar jê sồt jat nùs kòñ Yàng Tom Trồ dê kư̆ lơh tĕ bơta niam mơ jào hwềng soàn he Bơtau crơng gơs in, la Bơtau dòn song.