I Pier 2 - Sră Goh 2018

Yàng Jesu Krist la lŭ mum hìu

¹ Behơ̆ oh mi sang lòi tĕ jơh ală bơta iơh bơsak, ală bơta lac lèo, ală bơta ma blac, nùs ƀoah gơjrañ, mơ jơh ală đơs bơrsèl tơnhial.

² Kòñ gơboh tĕ di dà toh sàng goh đah hwềng, be ală kòn dềt pa deh, tồ oh mi in kơnòm di bơta hơ̆ nàng gơlik gơs dờng mơ geh dong klàs,

³ dilah oh mi neh git làm bơta kơ̆ dơn Yàng dê.

⁴ Tus tĕ hơ Kơnràñ la pơnai lŭ kis, neh cau sang lòi, mơya geh Yàng Tom Trồ sac rwah mơ màng ngan.

⁵ Oh mi kung be lŭ kis gen bơt bơtào gơs tĕ hìu đah hwềng, lơh gơs cau gơnoar ơn phan duh khoai sàng goh, nàng ơn phan duh khoai đah hwềng, kơnòm di Yàng Jesu Krist tồ geh Yàng Tom Trồ dòp.

⁶ Bơh Sră Goh neh cih lah: “Do, añ ơn tòm Siôn dô nơm pơnai lŭ bồ mum hìu neh geh sac rwah mơ màng ngan, Cau lơi dòn di lŭ hơ̆ rơp ò gơs ƀàssìl.”

⁷ Behơ̆ gơwèt mơ oh mi la cau dòn, gen Kơnràñ la màng ngan; mơya gơwèt mơ ală cau ò dòn gen “Pơnai lŭ mơ ală cau bơt hìu neh sang lòi, Lŭ hơ̆ neh gơlik gơs lŭ bồ mum hìu,”

⁸ mơ la “Dô nơm pơnai lŭ gơtup jơng, Dô nơm pơnai lŭ lơh gơtup tìs.” Bol khai gơtup jơng tài bơh ò dòn jat jơnau Yàng, jat be bơta neh lơh nền lài bol khai in rau.

⁹ Mơya oh mi la jơi bơtiàn geh sac rwah, la cau gơnoar ơn phan duh khoai cau bơtau dê, la làng bol sàng goh, la làng bol is Yàng Tom Trồ dê, tồ oh mi in yal tơlik ală broă crih crài ngan Kơnràñ dê, la Bơtau neh hòi oh mi lik klàs bơh tiah klam jơngo mơ tus hơ tiah àng gơcrà krơi is Kơnràñ dê.

¹⁰ Bơh yau òr oh mi ò di la dô nơm làng bol, mơya tŭ do la làng bol Yàng Tom Trồ dê, lài ò geh kòñ nđàc, mơya tŭ do neh geh kòñ nđàc rau.

Cau dĭ gơna Yàng Tom Trồ

¹¹ Ơ ală cau kòñ gơboh, oh mi be cau nac crih mơ be cau ơm ing, añ bơto tơngkah oh mi pal ơt tĕ ală bơta hàm kòñ is poac să dê, la ală bơta gơtòmlơh mơ hwềng soàn.

¹² Pal lơh lòt dô bă di pal digùl ală cau làng bol bơdìh, nàng bulah bol khai òs dơñŏ tơnhial di oh mi be cau lơh iơh, mơya bol khai rơp gŏ broă niam oh mi dê mơ jòng ro Yàng Tom Trồ tòm ngai Yàng tus.

Cau dòn gơwèt mơ ală kwang bơtau

¹³ Tài bơh Yàng, oh mi dòn duh tĕ jơh ală bơta boh lam kòn mơnus neh bơtào gơs, gơwèt mơ cau bơtau la cau dờng rlau jơh,

¹⁴ hala ală cau kwang đơng lơgar la ală cau mơ bơtau neh sồr lòt nàng lơh glài ală cau lơh iơh mơ jòng ro ală cau lơh niam.

¹⁵ Bơh nùs kòñ Yàng Tom Trồ dê la oh mi lơh broă niam nàng tơmềm bơr bơrngơl ală cau tùl gơla dê.

¹⁶ Lơh lòt tĕ be cau khat gơboh, mơ bañ ngui bơta khat gơboh hơ̆ lơh kơrnìng kìng bơta iơh bơsak, mơya pal lơh lòt be cau dĭ gơna Yàng Tom Trồ dê.

¹⁷ Sền màng ryŭ tĕ di jơh ală cau, kòñ gơboh tĕ di ală oh mi, duh rngòt tĕ di Yàng Tom Trồ, dòn duh tĕ cau bơtau.

Broă tòm ală cau dong broă dê

¹⁸ Ơ ală cau dong broă, dòn duh tĕ cau tòm he dê mơ jơh nùs ki ngàm di khai, ò di mìng gơwèt mơ cau tòm kơ̆ dơn lơbơn niam lơm ò, mơya gơwèt mơ cau tòm gơs nùs nhơm kalke kung behơ̆ sơl.

¹⁹ Dilah gơs cau lơi tài bơh dòp git Yàng Tom Trồ mơ kong jai bơta bòl glar jê sồt dô bă oàn jàn, hơ̆ la dô bơta nđàc.

²⁰ Dilah oh mi lơh tìs, kong cau pù lơh mơ oh mi kong ơt, gen ñchi bơta jòng ro oh mi geh taih? Mơya dilah oh mi lơh niam, mơ kong jai bơta bòl glar jê sồt, gen hơ̆ la bơta nđàc Yàng Tom Trồ ai.

²¹ Oh mi neh geh hòi sac tus hơ bơta hơ̆, tài bơh Bơtau Krist kung neh kong bòl glar jê sồt ala oh mi nàng lòi wơl ală oh mi in dô nơm krơh, tồ ală oh mi lòt jat tềl jơng Kơnràñ dê.

²² “Kơnràñ ò tìs glài, Tòm bơr Kơnràñ ò gơs bơta lac lèo.”

²³ Tòm tŭ Kơnràñ kong cau lah sơrpah, gen Kơnràñ ò lah sơrpah wơl; tòm tŭ kong bòl glar jê sồt, gen ò đơs pơhìn, mơya Kơnràñ kư̆ jào phi să tòm Kơnràñ dê Bơtau cahrña dô bă song ring.

²⁴ Să tòm Kơnràñ neh àñ ơnòng tồi glài bol he dê tòm să jan Kơnràñ hơđang chi pơng, nàng bol he in chơt gơwèt hơ tồi glài mơ kis gơwèt hơ bơta song ring. Bơh kơnòm di ală tềl sồt Kơnràñ dê mơ oh mi neh geh sơmbòi.

²⁵ Bơh oh mi kung be belàt neh lòt tìs nrah, mơya tŭ do neh rê wơl hơ Bơtau Ê Belàt mơ Bơtau sền gàr hwềng soàn oh mi dê.