I Kôrintô 14 - Sră Goh 2018

Jơnau đơs ndai mơ bơta đơs hwơr

¹ Ting jat tĕ bơta kòñ gơboh, kung jơh nùs kơp kòñ ală bơta ai gòi đah hwềng, sơnròp ngan la bơto yal jơnau Yàng Tom Trồ dê.

² Bơh cau lơi đơs jơnau đơs ndai, ò di đơs mơ kòn mơnus, mơya đơs mơ Yàng Tom Trồ; ò gơs cau lơi git wă, bơh hơ̆ la cau bơh Yàng Hwềng mơ đơs ală bơta ndơp ndơr.

³ Mơya cau lơi đơs hwơr gen đơs mơ cau nàng geh bơt bơtào, bơto tơngkah mơ pơndòm pơniang.

⁴ Cau lơi đơs jơnau đơs ndai la bơt bơtào să tòm he in, mơya cau lơi đơs hwơr la bơt bơtào Hìu Jum Goh in.

⁵ Añ kòñ jơh ală oh mi đơs jơnau đơs ndai, mơya añ kòñ rlau tai oh mi đơs hwơr. Cau đơs hwơr la dờng rlau mơ cau đơs jơnau đơs ndai, mìng dilah gơs cau sơpơ̆bơr, nàng bơt bơtào Hìu Jum Goh in.

⁶ Ơ oh mi, dilah añ tus hơ oh mi mơ đơs jơnau đơs ndai, mơ ò ngui bơta yal tơlik jơnau ndơp, hala bơta git jak, hala jơnau đơs hwơr, hala bơta bơto sồr mơ đơs, gen ñchi kwơ ală oh mi in taih?

⁷ Bulah ală phan ò gơs nhơm kis mơ lơh ntas, kung be tơliă hala kơñi pĕ mơ tê, dilah ò cah is ntas gen mbe git ñchi tơnggume cau uh hala pĕ taih?

⁸ Bơh dilah uh kơlwòk sơlồng sơlàng, mbe cau git rcang nàng lòt tòmlơh taih?

⁹ Oh mi kung behơ̆ sơl, dilah lơmpiat oh mi đơs jơnau ò ƀuơn wă, gen mbe cau git ñchi oh mi đơs taih? Hơ̆ la oh mi đơs lềng làng lơm.

¹⁰ Tòm dunnia gơs oă jơnau đơs, mơya ò gơs jơnau lơi la ò gơs jơnau gơtha.

¹¹ Behơ̆ dilah añ ò git jơnau gơtha jơnau đơs hơ̆, gen cau đơs jơnau hơ̆ rơp sền añ la cau lơgar ndai, mơ añ rơp sền khai la cau lơgar ndai sơl.

¹² Oh mi kung behơ̆ sơl, bơh oh mi jơh nùs kơp kòñ bơta ai gòi đah hwềng, gen jòi tĕ tồ geh tơngkah tơngkañ nàng bơt bơtào Hìu Jum Goh.

¹³ Behơ̆ cau lơi đơs jơnau đơs ndai, gen hòi dan tĕ nàng geh bơta ai gòi rgơi sơpơ̆bơr tai sơl.

¹⁴ Bơh dilah añ hòi dan mơ jơnau đơs ndai gen hwềng nùs añ hòi dan, mơya dơngoh kơlôi añ jê ò geh cồng nha lơi.

¹⁵ Mbe lơh taih? Añ rơp hòi dan mơ hwềng nùs, mơ kung hòi dan mơ dơngoh kơlôi sơl; añ rơp đơs chò mơ hwềng nùs, mơ kung đơs chò mơ dơngoh kơlôi sơl.

¹⁶ Dilah ò behơ̆, dilah mê mìng ai hwềng nùs mơ ưnngài, gen cau nggui tềng hơ̆ ò git wă jơnau mê đơs la ñchi, gen mbe khai git wă jơnau ưnngài mê dê mơ đơs “Amen” taih?

¹⁷ Ngan jơnau ưnngài mê dê la niam mơya cau ndai ò geh bơt bơtào.

¹⁸ Añ ưnngài Yàng Tom Trồ, añ đơs oă jơnau đơs ndai rlau mơ ală oh mi,

¹⁹ mơya tòm Hìu Jum Goh añ kòñ đơs pram jơnau rgơi wă mơ dơngoh kơlôi nàng bơto sồr ală cau ndai la niam rlau mơ rbô jơnau đơs mơ jơnau đơs ndai.

²⁰ Ơ oh mi, tòm bơta kơlôi sơnơng bañ gơs be cau kơnòm dềt; mơya tòm bơta bih khih iơh bơsak, gen gơs tĕ be kơnòm dềt, ai tòm bơta git wă gen gơs tĕ be cau dờng.

²¹ Tòm bơta boh lam neh cih lah: “Yàng đơs lah: Añ rơp kơnòm di ală cau gơs jơnau đơs ndai, Mơ bơr ală cau crih mat dê, nàng đơs mơ làng bol do; bulah behơ̆ bol khai kung ò bài iat Añ.”

²² Behơ̆, ală jơnau đơs ndai la tềl sơnio, ò di cau dòn Yàng in mơya cau ò dòn in; mơya jơnau đơs hwơr la tềl sơnio, ò di cau ò dòn in mơya cau dòn Yàng in.

²³ Behơ̆, dilah Hìu Jum Goh pơjum bal dô bă, mơ jơh ală cau đơs jơnau đơs ndai, mơ gơs cau ò git jơnau hơ̆ hala cau ò dòn mut pơjum, gen bol khai ò di đơs oh mi la cau sơnrang ò ơ?

²⁴ Mơya dilah jơh ală cau đơs hwơr, mơ gơs cau ò dòn hala cau bơdìh mut pơjum, gen bol khai rơp dòp git tồi glài bol khai dê. Bol khai rơp kong cahrña bơh jơh ală bơta bol khai kơno.

²⁵ Bơta ndơp ndơr tòm nùs bol khai geh ràng tơlik, gen bol khai rơp blup mat mơ duh khoai Yàng Tom Trồ mơ đơs lah: “Ngan gơs Yàng Tom Trồ digùl oh mi.”

Bơta rơndap tòm tŭ pơjum

²⁶ Ơ oh mi, mbe pal lơh taih? Tòm tŭ oh mi pơjum, cau lơi gơs bơta đơs crih, bơta bơto sồr, bơta yal tơlik jơnau ndơp, jơnau đơs ndai hala bơta sơpơ̆bơr, gen lơh tĕ jơh ală bơta nàng geh bơt bơtào Hìu Jum Goh.

²⁷ Dilah cau lơi đơs jơnau đơs ndai, mìng bàr nă hala pe nă lơm, pal đơs jat bơta rơndap, mơ pal gơs dô nă cau sơpơ̆bơr.

²⁸ Dilah ò gơs cau sơpơ̆bơr, gen cau hơ̆ pal ơm mŏ mŏ tòm Hìu Jum Goh; khai mìng đơs mơ să tòm he mơ đơs mơ Yàng Tom Trồ lơm.

²⁹ Dilah gơs cau đơs hwơr gen lòi mìng bàr nă hala pe nă đơs lơm, ai ală cau ne pal sền sơwì.

³⁰ Mơya dilah gơs dô nă cau ndai nggui tềng hơ̆ mơ gơs bơta yal tơlik jơnau ndơp, gen cau đơs sơnròp pal ơm mŏ mŏ.

³¹ Bơh jơh ală oh mi geh gơnoar đơs hwơr pơnjat dơ̆ dô nă dô nă, tồ kòp nă geh bơtê, mơ geh chồl bơtrut.

³² Hwềng nùs cau gơnoar hwơr pal dòn duh cau gơnoar hwơr,

³³ bơh Yàng Tom Trồ ò di la Yàng Tom Trồ lơh sơlồng sơlàng, mơya la Yàng Tom Trồ bơta ring lơngai. Jat be òs tòm jơh ală Hìu Jum Goh ală cau sàng goh dê.

³⁴ Gen ală cau ùr pal ơm mŏ mŏ tòm tiah pơjum, bơh ò gơs gơnoar đơs tềng hơ̆, mơya pal dòn duh kung be bơta boh lam cau Juda bơto.

³⁵ Dilah bol khai kòñ bơtê jơnau lơi, gen lùp tĕ bau klau tòm hìu, bơh cau ùr đơs digùl Hìu Jum Goh la ƀàssìl.

³⁶ Hĕ! Jơnau Yàng Tom Trồ dê bơh oh mi mơ gơlik ơ? Hala mìng tus hơ oh mi lơm ơ?

³⁷ Dilah cau lơi kơlôi is să he la cau gơnoar hwơr Yàng Tom Trồ dê hala gơs bơta ai gòi đah hwềng, gen git tĕ ală jơnau añ cih oh mi in do la jơnau sồr Yàng dê.

³⁸ Mơya dilah cau lơi sền òsơp bơta hơ̆, gen kư̆ lòi khai behơ̆.

³⁹ Behơ̆, ơ oh mi jơh nùs tĕ kơp kòñ đơs hwơr, mơ kung bañ bơkơŭ đơs jơnau đơs ndai.

⁴⁰ Mơya pal lơh jơh ală bơta dô bă niam mơ jat bơta rơndap tap sèng.