I Ală Bơtau 9 - Sră Goh 2018

Yàng Jehôwa tơlik mat mơ Salômôn tai

¹ Tòm tŭ Salômôn neh bơt sir hìu duh khoai Yàng Jehôwa dê, gơlang mơ jơh ală bơta khai kòñ bơt,

² Yàng Jehôwa tơlik mat dơ̆ bàr mơ Salômôn, be Kơnràñ neh tơlik mat mơ khai tòm Gabaôn.

³ Yàng Jehôwa đơs mơ khai lah: “Añ neh iat jơnau hòi dan rac dan mê dê di đap Añ; Añ neh ơn is sàng goh hìu duh khoai do mơ mê neh bơt, mơ ơn sơnđan Añ tềng hơ̆ sùm sùm; mat mơ nùs Añ jê rơp ơm tềng hơ̆ sùm sùm.

⁴ Ai mê, dilah mê rơp lòt di đap Añ, be Dabit, bèp mê neh lòt, ai nùs song ngan mơ song ring lơh jat jơh ală bơta Añ neh nting sồr mê, mơ prap gàr ală bơta boh lam mơ gơnoar sồr Añ jê,

⁵ gen Añ rơp bơtào kơ̆ sơbàn bơtau mê dê hơđang Israel jơl sùm sùm, be Añ neh ho mơ Dabit, bèp mê lah: ‘Mê rơp ò siơ̆u dô nă cau pơrdòn hơđang sơbàn Israel.’

⁶ Mơya dilah mê mơ kòn sau bol mê wơlke bơh Añ, ò prap gàr ală bơta sồr lam mơ bơta boh lam mơ Añ neh ơn di đap mê; mơya lòt duh broă ală yàng ndai mơ duh khoai bol gơ,

⁷ gen Añ rơp tă tơlik Israel bơh di ù tiah Añ neh ai bol khai in, mơ rơp tă tơlik bơh di đap mat Añ hìu mơ Añ neh ơn is sàng goh sơnđan Añ in, mơ Israel rơp gơlik gơs jơnau đơs pơnđik mơ bơta dơñŏ tơnhial digùl jơh ală làng bol.

⁸ Hìu duh khoai do, rơp gơlik dô gơnru tơrlah tơrlơm, kòp nă lòt gan kung ai lơh krơi, sền òsơp mơ đơs lah: ‘Ñchi bơh tài Yàng Jehôwa neh lơh bơta be do gơwèt mơ lơgar do mơ hìu duh khoai do taih?’

⁹ Gen bol khai rơp đơs lah: ‘Tài bơh bol khai neh sang lòi Jehôwa Yàng Tom Trồ bol khai dê, la bơtau neh cèng ồng pàng bol khai dê lik klàs bơh lơgar Ejiptơ; bol khai neh koar ală yàng ndai, duh khoai ală yàng hơ̆, mơ duh broă bol gơ; gen tàng, Yàng Jehôwa neh cèng bơta rung rài do hơđang bol khai.’”

¹⁰ Tŭ lồi dut bàr jơt sơnam, Salômôn bơt sir bàr nơm hìu, hơ̆ la hìu duh khoai Yàng Jehôwa dê mơ gơlang bơtau,

¹¹ gen bơtau Salômôn pà gòi Hiram in bơtau Tirơ, bàr jơt nơm ƀòn dờng tòm Galile; bơh Hiram neh ai Salômôn in chi pơnàng, chi nho rề, mơ màh jat nùs khai kòñ.

¹² Mơya tòm tŭ Hiram bơh Tirơ tus nàng sền ală ƀòn dờng mơ Salômôn neh ai khai in, ală ƀòn hơ̆ ò niam nùs khai,

¹³ khai đơs lah: “Ơ bi, ală ƀòn mơ bi ai añ in hơ̆ la mbe lơi taih?” Behơ̆ khai sơnđan ală ƀòn hơ̆ la Kabul (gơtha la sang gòi, ò kwơ dô êt lơi), gam sơnđan behơ̆ jơl tus di ngai do.

¹⁴ Mơya, Hiram neh pơyoa ai Salômôn in dô rhiang bàr jơt talơng màh.

Ală broă ndai Salômôn dê

¹⁵ Do la bơta cih wơl ală cau lơh broă bòl glar mơ Salômôn neh kup nàng bơt bơtào hìu duh khoai Yàng Jehôwa mơ gơlang khai dê, Silô mơ dơrñang Jerusalem, Hajor, Megidô mơ Gejer.

¹⁶ (Pharaôn, bơtau Ejiptơ neh lòt tus tòmpìt Gejer, chu gơ, mơ tơnchơt ală cau Kanaan ơm tòm ƀòn dờng, mơ khai ai gơlơh phan pơnjat kòn ùr khai in, la bau ùr Salômôn.)

¹⁷ Behơ̆, Salômôn bơt wơl ƀòn Gejer, Bet Hôrôn đah hơđơm,

¹⁸ Baalat, mơ Tamar, tòm ƀlàng ngềt ngơt đah dơlam lơgar;

¹⁹ bơtau kung bơt ală đam jàr ƀòn dờng Salômôn dê, ală ƀòn dờng ơn rơndeh ơseh, ală ƀòn ling hào ơseh in, mơ jơh ală bơta Salômôn kòñ bơt bơtào tòm Jerusalem, tòm Liban mơ tòm jơh lơgar ơm hơđơm gơnoar khai dê.

²⁰ Jơh ală cau gam wơl tòm làng bol Amôrit, cau Hetit, cau Pherijit, cau Hebit, mơ cau Jebusit, ò gơrê bal mơ cau Israel,

²¹ hơ̆ la ală kòn sau bol khai dê gam ơm wơl tòm lơgar mơ la ală cau mơ Israel ò rgơi tơnroh jơh, gen Salômôn kup dĭ lơh broă jơl tus di ngai do.

²² Mơya Salômôn ò kup làng bol Israel lơh dĭ; bol khai la ală cau ling, bol khai la cau kwang duh broă khai dê, cau kwang at bồ, cau kwang ling at bồ mpồl ling, kwang at bồ ală cau at rơndeh, mơ kwang at bồ cau ling hào ơseh khai dê.

²³ Do la ală cau kwang dờng geh pồ bơtào nàng sền gàr ală broă Salômôn dê, ntum khà la pram rhiang pram jơt nă; la ală cau at bồ làng bol lơh broă tùng ơnòng.

²⁴ Mơya kòn ùr Pharaôn neh guh bơh ƀòn dờng Dabit tus hơ gơlang mơ Salômôn neh bơt khai in; gen Salômôn bơt bơtào Milô.

²⁵ Pe dơ̆ tòm dô nam, Salômôn òs ơn phan ơn chu pơrguc mơ phan ơn bơta ring lơngai hơđang cơnòng duh khoai mơ khai neh bơt Yàng Jehôwa in, mơ chu kơlhô di đap Yàng Jehôwa. Behơ̆ khai neh bơt bơtào sir hìu duh khoai.

Bơta kă bro Salômôn dê

²⁶ Bơtau Salômôn kung rcang dô mpồl ơhò tòm Ejiôn Geber, rềp Elôt, di gah Dàlềng Pơrhê, tòm ù tiah Edôm dê.

²⁷ Hiram sồr ală dĭ gơna khai dê, tus bal mơ mpồl ơhò hơ̆; la ală cau chài at ơhò tòm dàlềng, nàng ơm bal mơ ală dĭ gơna Salômôn dê.

²⁸ Bol khai lòt tus hơ Ôphir mơ cèng bơh hơ̆ poan rhiang bàr jơt talơng màh jào bơtau Salômôn in.