I Ală Bơtau 8 - Sră Goh 2018

Pơjum ơn hìu duh khoai. Jơnau hòi dan Salômôn dê

¹ Gen Salômôn pơjum ală cau kwang kra Israel, jơh ală cau at bồ jơi bơtiàn, mơ ală cau at bồ hìu nhă tòm Israel tus mơ khai, nàng cèng Đài Bơta Ho Bal Yàng Jehôwa dê bơh ƀòn Dabit, hơ̆ la Siôn.

² Jơh ală làng bol tòm Israel tus pơjum mơ bơtau Salômôn tòm bơta pơjum sa, di kơnhai Ethanim, hơ̆ la kơnhai dơ̆ poh.

³ Mơ ală kwang kra Israel neh tus, ală cau gơnoar ơn phan duh khoai tùng Đài Bơta Ho Bal Yàng Jehôwa dê.

⁴ Behơ̆ bol khai cèng Đài Yàng Jehôwa dê, Sàl Tòm Mat, bal mơ jơh ală phan ngui sàng goh neh ơn tòm sàl ing; ală cau gơnoar ơn phan duh khoai mơ cau Lebi cèng ală phan hơ̆ tus.

⁵ Bơtau Salômôn mơ jơh mpồl jơnum Israel, la ală cau neh pơjum bal di đap khai, bal mơ khai di đap Đài, oă ngan phan ơn duh khoai, ală belàt, ală kơnrồ dam, tian gơs bol khai ò rgơi kòp.

⁶ Gen ală cau gơnoar ơn phan duh khoai cèng Đài Bơta Ho Bal Yàng Jehôwa dê tus di tiah gơ dê, tòm dơlam hìu duh khoai, tòm Tiah Sàng Goh Ngan, hơđơm ală pơnđar ceruƀim dê.

⁷ Bơh ală ceruƀim lì pơnđar gơ dê hơđang tiah ơn Đài, nàng ceruƀim jơm hơđang Đài mơ ală mơng tùng.

⁸ Ală mơng tùng jòng cau rgơi sền gŏ bồ mơng tùng bơh di Tiah Sàng Goh di đap Tiah Sàng Goh Ngan; mơya bol khai ò rgơi gŏ gơ bơh đah bơdìh; gam tềng hơ̆ tus ngai do.

⁹ Tòm Đài mìng gơs bàr nơm mpàn lŭ mơ Môise neh ơn, di mơnơm Hôrep, tềng hơ̆ Yàng Jehôwa neh bơtào bơta ho bal mơ làng bol Israel, tòm tŭ bol khai lik bơh lơgar Ejiptơ.

¹⁰ Tòm tŭ ală cau gơnoar ơn phan duh khoai lik bơh di Tiah Sàng Goh, gen gơs mhwal bềng lìu tòm hìu duh khoai Yàng Jehôwa dê,

¹¹ tian gơs ală cau gơnoar ơn phan duh khoai ò rgơi ntào tềng hơ̆ nàng duh broă tài bơh mhwal; bơh bơta gơklŏ bềng lìu hìu duh khoai Yàng Jehôwa dê.

¹² Gen Salômôn đơs lah: “Yàng Jehôwa neh đơs lah: Kơnràñ ơm tòm tiah klam jơngo cik ngan.

¹³ Añ neh bơt dô nơm hìu duh khoai ryŭ ryơm Kơnràñ in, dô bă tiah Kơnràñ in ơm sùm sùm.”

Jơnau đơs Salômôn dê

¹⁴ Gen bơtau sền gùt dar, mơ ai lơngai mpồl jơnum Israel in. Tòm tŭ jơh mpồl jơnum Israel ntào.

¹⁵ Khai đơs lah: “Pal jòng ro Jehôwa Yàng Tom Trồ Israel dê, bơh tê Kơnràñ neh lơh gơlik wil tơl ală bơta Kơnràñ ho mơ Dabit, bèp añ, mơ đơs lah:

¹⁶ ‘Bơh ngai Añ neh cèng làng bol Israel Añ jê lik bơh lơgar Ejiptơ, Añ ò sac rwah ƀòn dờng lơi tòm ală jơi bơtiàn Israel nàng bơt tềng hơ̆ dô nơm hìu nàng sơnđan Añ in ơm tềng hơ̆; mơya Añ neh sac rwah Dabit nàng khai at bồ làng bol Israel Añ jê.’

¹⁷ Dabit, bèp añ, gơs nùs kòñ bơt bơtào dô nơm hìu duh khoai sơnđan Yàng Jehôwa in, la Yàng Tom Trồ Israel dê.

¹⁸ Mơya Yàng Jehôwa neh đơs mơ Dabit, bèp añ lah: ‘Mê neh lơh nền di ngan nàng bơt dô nơm hìu sơnđan Añ in;

¹⁹ bulah behơ̆, mê rơp ò bơt hìu duh khoai hơ̆, mơya la kòn klau mê neh deh, rơp bơt hìu sơnđan Añ in.’

²⁰ Behơ̆, Yàng Jehôwa neh lơh tòm toh jơnau Kơnràñ đơs; bơh añ geh tơngguh tòm tiah Dabit, bèp añ, nggui hơđang sơbàn Israel, be Yàng Jehôwa neh ho, mơ añ neh bơt hìu duh khoai do sơnđan Yàng Jehôwa in, la Yàng Tom Trồ Israel dê.

²¹ Tềng hơ̆, añ neh rcang dô bă tiah Đài in; tòm Đài gơs bơta Ho Bal Yàng Jehôwa dê, hơ̆ la bơta ho bal mơ Kơnràñ neh bơtào mơ ồng pàng bol hi dê, tòm tŭ Kơnràñ neh cèng bol khai lik bơh lơgar Ejiptơ.”

Jơnau hòi dan ơn Yàng in Salômôn dê

²² Tơnơ̆ mơ hơ̆, Salômôn ntào di đap cơnòng duh khoai Yàng Jehôwa dê, di đap mat jơh mpồl jơnum Israel, mơ pò tê khai dê hơđang trồ.

²³ Khai đơs lah: “Ơ Jehôwa, Yàng Tom Trồ Israel dê! Ò gơs Yàng Tom Trồ lơi be Kơnràñ, bơh hơđang trồ jòng hala tòm ù hơđơm; Yàng prap gàr bơta ho bal mơ bơta kòñ gơboh kơ̆ dơn gơwèt mơ ală dĭ gơna Yàng, la ală cau lòt di đap Yàng dô bă jơh nùs,

²⁴ bơta ho bal Yàng prap gàr dĭ gơna Yàng in, la Dabit, bèp añ, be jơnau Kơnràñ neh yal loh mơ khai; jơnau Yàng neh ho bơh di bơr Kơnràñ gen tê Yàng neh lơh wil tơl tòm ngai do.

²⁵ Gen tàng, Ơ Jehôwa, Yàng Tom Trồ Israel dê! Dan prap gàr ală jơnau Yàng neh ho mơ dĭ gơna Kơnràñ dê la Dabit, bèp añ jê lah: ‘Rơp ò siơ̆u cau pơrdòn mê, nggui di sơbàn Israel dê di đap Añ; dilah kòn sau mê kơrhia ală gùng dà bol khai dê, lòt di đap Añ, tòm toh be mê neh lòt di đap Añ.’

²⁶ Gen tàng, Ơ Yàng Tom Trồ Israel dê! Dan lơh kơ̆ nền jơnau Yàng neh ho mơ cau dĭ gơna Yàng dê la Dabit, bèp añ.

²⁷ Mơya ngan lah Yàng Tom Trồ ơm hơđang plai ù do sơl? Bulah hơđang trồ mơ ală tap trồ jơnhoa rlau jơh kung ò rgơi ơn Kơnràñ, tơ ài lah hìu dềt do mơ añ neh bơt!

²⁸ Ơ Jehôwa Yàng Tom Trồ añ! Dan wèt sền di jơnau hòi dan mơ rac dan dĭ gơna Yàng dê, dan iat jơnau ñìm rac mơ rac dan dĭ gơna Yàng hòi dan mơ Yàng ngai do,

²⁹ mơ mat Yàng pò sùm mang mơ ngai wèt sền di hìu do, la tiah mơ Yàng neh đơs lah: ‘Sơnđan Añ rơp ơm tềng hơ̆,’ nàng iat jơnau hòi dan ală dĭ gơna Yàng dê wèt di tiah do.

³⁰ Dan iat bơta hòi dan dĭ gơna Yàng dê mơ làng bol Israel Yàng dê, tòm tŭ bol khai hòi dan wèt hơ tiah do; Dan iat tĕ, bơh hơđang trồ la tiah ơm Kơnràñ dê; dan dòp jơnau mơ toh glài.

³¹ Dilah cau lơi tìs glài tòmdră mơ cau gơp ƀòn he, mơ cau lơi kup bol khai pal srat să, dilah khai tus srat să di đap cơnòng duh khoai Yàng dê, tòm hìu duh khoai do,

³² gen dan Yàng ơm đang trồ iat tĕ, lơh broă mơ cahrña dĭ gơna Yàng in mơ lơh nền glài cau iơh, mơ cèng ală bơta khai neh lơh tuh wơl hơđang bồ khai, mơ sơnđan la song ring cau song ring in, mơ ai phan ƀàn khai in jat bơta song ring khai dê.

³³ Tòm tŭ làng bol Israel Yàng dê, tài bơh tìs glài mơ Yàng, kong cau sò tơm lơh gơprah; mơya bol khai rê wơl mơ Yàng, đal git sơnđan Yàng mơ hòi dan rac dan mơ Yàng tòm hìu do,

³⁴ Gen dan Yàng ơm hơđang trồ, iat tĕ, toh glài làng bol Israel Yàng dê, mơ cèng bol khai rê wơl hơ ù tiah mơ Yàng neh ai ồng pàng bol khai in.

³⁵ Dilah ală tap trồ gơkòl til kơ̆, ò gơs mìu, tài bơh bol khai neh tìs glài mơ Yàng, dilah bol khai wèt hơ tiah do mơ hòi dan, đal git sơnđan Yàng, pơrlac sang tồi glài he, tài bơh Yàng neh lơh glài bol khai,

³⁶ gen dan Yàng ơm đang trồ iat tĕ, toh glài ală dĭ gơna Yàng, mơ làng bol Israel Kơnràñ in, tòm tŭ Yàng bơto bol khai in gùng niam hơ̆ la gùng bol khai pal lòt, mơ ai mìu hơđang ù tiah Yàng dê mơ Kơnràñ neh ai làng bol Kơnràñ in lơh gơs sre brê.

³⁷ Dilah tòm lơgar gơlik gơs bơta jơgloh rung, pluh plàng, ro rañ, but bơsềt ồm lề, srah nting, srah, hala gơs cau sò tơm gòm gơrwàng ală tiah ơm bol khai dê, hala gơs bơta rung rài, kòp jê lơi;

³⁸ Dilah gơs dô nă cau lơi hòi dan, hala jơh làng bol Israel Yàng dê, jơh tơl nă neh đal git bơta rung rài tòm nùs is bol khai dê, tian gơs bol khai pò tê wèt mơ hìu duh khoai do, mơ hòi dan,

³⁹ gen dan Yàng hơđang trồ, la tiah Yàng ơm, iat tĕ, toh glài, lơh broă, mơ tơm wơl kòp nă jat be broă bol khai neh lơh, bơh ngan mìng dô nă Yàng lơm git loh nùs kòn mơnus dê,

⁴⁰ nàng bol khai in duh rngòt di Yàng jơl jơh rài kis bol khai ơm hơđang ù mơ Yàng neh ai ồng pàng bol hi in.

⁴¹ Kung behơ̆ sơl, tòm tŭ gơs dô nă cau lơgar bơdìh, la cau ò gơrê bal mơ cau Israel Yàng dê, tus bơh lơgar ngài tài bơh sơnđan Yàng dê;

⁴² bơh rơp kơno bơh sơnđan dờng Yàng dê, bơh tê gơnoar pràn Yàng dê mơ tơwòr tê pò tơlik Yàng dê, tòm tŭ dô nă cau lơgar bơdìh tus mơ hòi dan wèt hơ hìu do,

⁴³ gen dan Yàng hơđang trồ la tiah Yàng ơm, iat tĕ mơ lơh jat ală bơta cau nac crih rơp hòi dan mơ Yàng; nàng jơh ală làng bol tòm dunnia, đal git sơnđan Yàng, duh rngòt Yàng, tòm toh be làng bol Israel Kơnràñ dê, mơ nàng bol khai rgơi git hơ̆ la sơnđan Yàng geh hòi dan tòm hìu duh khoai do mơ añ neh bơt bơtào.

⁴⁴ Dilah làng bol Yàng dê lik tòmlơh mơ cau sò tơm bol khai dê, bơh gùng lơi mơ Yàng neh sồr lòt, mơ bol khai hòi dan mơ Yàng Jehôwa wèt mat hơ ƀòn dờng mơ Yàng neh sac rwah, mơ bơh hìu duh khoai añ neh bơt sơnđan Kơnràñ in,

⁴⁵ gen dan Yàng ơm hơđang trồ, iat tĕ ală jơnau hòi dan rac dan bol khai dê, mơ dong tò broă gơrềng tus di bol khai.

⁴⁶ Dilah bol khai tìs glài tòmdră mơ Yàng — bơh ò gơs cau lơi ò tìs glài — mơ Yàng gơhào gơjrañ di bol khai mơ jào bol khai cau sò tơm in; tian gơs bol khai kong kup cèng tòm lơgar cau sò tơm, bulah ngài hala rềp,

⁴⁷ dilah tòm lơgar mơ bol khai kong jàm, bol khai kơlôi sơnơng wơl, gơjrañ sang glài, mơ rac dan mơ Yàng lah: ‘Bol hi neh tìs glài, lơh bơta iơh bơsak, mơ lơh dô bă iơh rmơh;’

⁴⁸ mơ dilah bol khai jơh nùs jơh hwềng soàn git gơjrañ sang glài tòm lơgar cau sò tơm neh kup cèng nàng lơh gơs dĭ, hòi dan mơ Yàng, wèt mat hơ lơgar mơ Yàng neh ai ồng pàng bol khai in, bơh ƀòn dờng mơ Yàng neh sac rwah, mơ bơh hìu duh khoai mơ añ neh bơt sơnđan Yàng in,

⁴⁹ gen dan Yàng hơđang trồ, la tiah Yàng ơm, dan iat jơnau hòi dan rac dan bol khai dê, mơ dong tò broă gơrềng tus di bol khai;

⁵⁰ mơ dan toh glài làng bol Yàng in ală bơta neh lơh tìs mơ Kơnràñ; ală bơta tìs glài mơ bol khai neh tòmdră mơ Kơnràñ; dan ai bol khai in bơta nđàc di đap mat cau neh kup bol khai ơm dĭ,

⁵¹ bơh làng bol Israel ngan la làng bol Yàng dê, sre brê Yàng dê, mơ Yàng neh cèng tơlik bơh Ejiptơ, hơ̆ la klàs bơh bơnhă buh lòs.

⁵² Lòi mat Yàng pò wèt hơ bơta hòi dan dĭ gơna Yàng dê mơ bơta hòi dan làng bol Israel Kơnràñ dê, iat tĕ jơnau hòi rac bol khai dê, tŭ lơi bol khai hòi dan mơ Yàng.

⁵³ Ơ Jehôwa Yàng Tom Trồ! Bơh Yàng neh cah is bol khai bơh digùl ală làng bol hơđang ù, lơh gơs sre brê Yàng dê, jat be jơnau Yàng neh ho mơ Môise, la dĭ gơna Yàng, tòm tŭ Yàng cèng ồng pàng bol hi lik bơh lơgar Ejiptơ.”

⁵⁴ Tòm tŭ Salômôn neh dan mơ Yàng Jehôwa ală jơnau hòi dan rac dan do rau, gen khai ntào bơh di đap cơnòng duh khoai Yàng Jehôwa, hơ̆ la tiah khai neh cùn gơltang, mơ tê pò hơđang trồ.

⁵⁵ Khai ntào ai jơnau đơs dờng mơ ai lơngai jơh mpồl jơnum Israel in mơ lah:

⁵⁶ “Pal jòng ro Yàng Jehôwa, la bơtau neh ai bơta rlô lơngap lơngai làng bol Israel Kơnràñ in, jat be ală jơnau Kơnràñ neh ho! Bơh ală jơnau niam mơ Kơnràñ neh ho mơ dĭ gơna Kơnràñ dê la Môise, ò gơs dô jơnau lơi ò gơlik di ngan ò.

⁵⁷ Dan Jehôwa Yàng Tom Trồ bol hi ơm bal mơ bol hi, be Kơnràñ neh ơm bal mơ ồng pàng bol hi dê, bañ sang lòi bol hi;

⁵⁸ dan Kơnràñ chồl nùs bol hi wèt mơ Kơnràñ, tồ bol hi lòt tòm ală gùng dà Kơnràñ dê, prap gàr ală bơta sồr lam, bơta boh lam, mơ gơnoar sồr Kơnràñ dê neh nting sồr ồng pàng bol hi dê.

⁵⁹ Dan lòi ală jơnau añ jê mơ ală bơta añ hòi dan di đap Yàng Tom Trồ geh tus rềp mơ Jehôwa Yàng Tom Trồ bol he dê ngai mơ mang, mơ dong tò broă dĭ gơna Kơnràñ dê mơ làng bol Israel dê sơl, mơ ală bơta pal càng kòp ngai;

⁶⁰ behơ̆ nàng ală làng bol lơgar dunnia dê git la Jehôwa la Yàng Tom Trồ, mơ ò gơs Yàng lơi ndai tai.

⁶¹ Gen tàng ơn tĕ să tòm bol mê wil tơl hơ Jehôwa Yàng Tom Trồ bol he, lòt tòm bơta boh lam mơ prap gàr bơta sồr lam Kơnràñ dê, be bol mê neh lơh ngai do.”

Salômôn ơn phan pơdơng duh khoai

⁶² Gen bơtau mơ jơh ală cau Israel ơn ală phan ơn duh khoai di đap Yàng Jehôwa.

⁶³ Salômôn neh ơn phan ơn pơdơng bơta ring lơngai Yàng Jehôwa in, bàr jơt bàr rbô nơm kơnrồ dam mơ dô rhiang bàr jơt rbô nơm belàt. Bơtau mơ jơh làng bol Israel pơjum ơn hìu duh khoai pa Yàng Jehôwa dê la behơ̆.

⁶⁴ Tòm ngai hơ̆, bơtau ơn is tiah ƀlàng digùl di đap hìu duh khoai Yàng Jehôwa dê; tềng hơ̆ khai ơn ală phan ơn chu, phan ơn bơsàp, mơ dơngi bơh phan ơn bơta ring lơngai; tài bơh cơnòng duh khoai mơ kòng di đap hìu duh khoai Yàng Jehôwa dê la dềt ir, ò tơl tiah nàng ơn ală phan ơn chu, phan ơn mơ kòi mbo, mơ dơngi bơh phan ơn bơta ring lơngai.

⁶⁵ Behơ̆, Salômôn neh bơtào bơta pơjum sa dờng tòm ngai hơ̆, bal mơ jơh mpồl jơnum dờng Israel, làng bol bơh Lebô Hamat jơl tus di croh Ejiptơ, di đap Jehôwa Yàng Tom Trồ bol he dê, tòm poh ngai.

⁶⁶ Ngai dơ̆ phàm, bơtau ai làng bol in rê hìu; làng bol ai lơngai bơtau in, mơ rê wơl hơ sàl bol khai dê, hòn chò hừh nùs bơh ală bơta niam lơnhơn mơ Yàng Jehôwa neh lơh Dabit in, cau dĭ gơna Kơnràñ dê, mơ làng bol Israel Kơnràñ in.