I Ală Bơtau 7 - Sră Goh 2018

Bơt bơtào gơlang Salômôn dê

¹ Salômôn bơt gơlang khai dê, mơ khai neh lơh sir tòm jơt pe sơnam.

² Khai kung bơt gơlang brê Liban dê, jòng dô rhiang tal, ơnàng pram jơt tal, mơ jơnhoa pe jơt tal, ơn hơđang poan sèng jrong chi ƀal, gơs ală ròc mơ chi nho rề ơn hơđang ală jrong.

³ Rkàng hìu lơh mơ chi nho rề ơn hơđang poan jơt pram nơm ròc dra, jơt pram nơm ròc kòp ròt.

⁴ Gơs pe nơm mpồng dềt gơrơndap tòm pe sèng, ală mpồng dềt ơm tòm toh mat bal tòm pe sèng.

⁵ Jơh ală gùng mpồng mơ jrong mpồng poan đah ring bal, mat tòm toh mat tòm pe sèng.

⁶ Khai bơt ƀlàng jơng gùng gơs ală jrong, jòng pram jơt tal, mơ ơnàng pe jơt tal; gơs dô nơm mpồng dờng di đap, rkàng sơndră mơ ală jrong, mơ dô nơm rơng di đap gơ.

⁷ Salômôn kung bơt dô nơm ơdŭ dờng nàng ơn sơbàn, la tiah khai cahrña, mơ sơnđan la Ơdŭ Bơta Song Ring; mơ ngui mpàn chi nho rề lơh bơh mơnàng tus di rkàng.

⁸ Gơlang Salômôn dê la tiah khai ơm đah ngkòi ơdŭ dờng, geh bơt bơtào ndròm bal behơ̆. Salômôn kung neh bơt dô nơm gơlang be do kòn ùr Pharaôn in la cau khai neh bau.

⁹ Ală gơlang do bơt mơ lŭ màng, phàt jat be bơta was sơnoa, òt reh, đah hơđap mơ đah ngkòi, bơh mơnàng jơl tus di ală jrong, bơh đah bơdìh tus hơ ƀlàng dờng kung behơ̆ sơl.

¹⁰ Mơnàng mơ lŭ màng mơ dờng, lŭ pơnai dờng, gơs pơnai gen jơt tal, pơnai ƀà phàm tal.

¹¹ Hơđang ală mơnàng do, gam gơs ală lŭ màng phàt jat bơta was sơnoa mơ chi nho rề.

¹² Ƀlàng dờng, poan đah gơs pe sèng lŭ pac mơ dô sèng ròc mơ chi nho rề, tòm toh be ƀlàng đah dơlam hìu duh khoai Yàng Jehôwa dê, mơ tòm toh be mpồng rơng hìu duh khoai.

Bơka đah dơlam hìu duh khoai

¹³ Tŭ hơ̆, Bơtau Salômôn jà Hiram bơh Tirơ.

¹⁴ Khai la kòn klau dô nă cau ùr bơnrau bơh jơi bơtiàn Neptali, ai bèp la cau Tirơ, cau chài lơh kòng. Khai bềng bơta chài rgơi, àng loh, git wă tòm ală broă lơh kòng. Khai tus hơ bơtau Salômôn, mơ lơh ală broă khai dê.

¹⁵ Khai lơh bàr nơm jrong mơ kòng, chi sơnròp jơnhoa jơt phàm tal, mơ dô dang che jơt bàr tal war gùt dar jrong, jrong dơ̆ bàr kung behơ̆ sơl.

¹⁶ Khai tŏ bàr nơm bồ jrong mơ kòng, ơn gơ hơđang cồng jrong, jơnhoa bồ jrong do la pram tal, jơnhoa bồ jrong ne kung la pram tal.

¹⁷ Ală che tàñ be bơtơng mơ ală che bơkào crap wơl be che sreng dềt bơka bồ jrong ơn hơđang cồng jrong; gơs poh dang che bơkào bồ jrong do in, mơ poh dang che bơkào bồ jrong ne in.

¹⁸ Hiram kơt gùt dar mat bơtơng do bàr sèng plai lừu nàng bơka bồ jrong do in, mơ kung lơh behơ̆ bồ jrong ne in.

¹⁹ Ală bồ jrong ơm hơđang ală jrong tòm dơlam mpồng rơng, gen gơs bơkào gun ơm hơđang cồng, jơnhoa poan tal.

²⁰ Ală bồ jrong ơm hơđang jrong mpòl hơđang să jrong ơm đah ne mat bơtơng: gơs bàr rhiang nơm plai lừu tòm ală sèng gùt dar bồ bàr nơm jrong.

²¹ Hiram bơtào ală chi jrong tòm tiah mpồng rơng hìu duh khoai. Khai bơtào chi jrong đah ma, mơ sơnđan la Jakin; mơ bơtào chi jrong đah kiau sơnđan gơ la Bôas.

²² Hơđang cồng jrong, mòn rùp bơkào gun. Broă lơh ală chi jrong gen neh sir la behơ̆.

²³ Khai kung tŏ tơnau dềt ơn dà, rùp wil, jơnhoa pram tal; ơnàng gơs jơt tal, dô dang che was gùt dar gơ dê la pe jơt tal.

²⁴ Gùt dar bơr tơnau gơs bàr sèng plai lềng, kư̆ jơt tal gen dô nai plai lềng, tŏ behơ̆ tòm tŭ lồi tơnau.

²⁵ Tơnau ơn hơđang jơt bàr nơm kơnrồ, pe nơm wèt đah đang, pe nơm wèt đah đơm, pe nơm wèt đah mattơngai mut, pe nơm wèt hơ đah mattơngai lik. Ai ală tiang kơnrồ gen wèt đah dơlam, mìng mpòl bồ lơm.

²⁶ Tơnau hơ̆ lơut dô nđàm, bơr tơnau tòm toh be bơr mơngàn mơ gơlơh be bơkào gun, gơ rgơi đo poan jơt poan rbô lit dà.

²⁷ Khai kung lơh jơt nơm kơnă mơ kòng, kòp kơnă poan tal jòng, poan tal ơnàng, mơ pe tal jơnhoa.

²⁸ Ală kơnă lơh be do: Gơs ală pang mơ kòng cau pơng jat dơwàng rnoas.

²⁹ Hơđang ală pang kòng cau pơng tòm dơwàng rnoas do gơs rùp klìu triă, kơnrồ, mơ ceruƀim; đah đang mơ đah đơm dơwàng rnoas kung gơs rùp klìu triă, kơnrồ, mơ ceruƀim geh pac che bơkào.

³⁰ Kòp kơndòl gơs poan nơm kong rơndeh mơ dơm kòng, mơ di poan mum gơs phan đo nàng ơn dô nơm cờu mơ ală che bơkào.

³¹ Digùl kòp kơnă hơđang bồ jrong gơs dô nơm bơr wil jrô dô tal, mơ ơnàng dô tal mơ gùl. Bơr do kung gơs rùp pac sềr. Ai ală pang mơ kòng do gen poan mum, ò di wil.

³² Poan nơm kong rơndeh gen ơm hơđơm ală pang mơ kòng; mơ ală dơm kong rơndeh gen tơmut tòm kơnă. Kòp kơnă jơnhoa dô tal mơ gùl.

³³ Kong rơndeh lơh be kong rơndeh ơseh tòmlơh: jơh ală dơm, pìr, kam mơ klŏ kong rơndeh geh tŏ lơm.

³⁴ Gơs poan nơm phan đo ơm di poan mum kơndòl mơ đềt bal mơ kơnă.

³⁵ Bồ kơnă rùp wil mơ sơmplàñ, mơ jơnhoa nggùl tal; gơ kung gơs che ƀềp sơl.

³⁶ Hơđang ală phan hơ̆, Hiram kung pac ală ceruƀim, klìu triă, chi gòl, mơ che bơkào gùt dar.

³⁷ Khai jat rùp do mơ lơh jơt nơm kơndòl, tŏ dô bơta, dô rnoas, mơ dô rùp să bal.

³⁸ Khai kung lơh jơt nơm thùng dờng mơ kòng, kòp nơm ơn pơgap poan jơt thùng (dô thùng pơgap bàr jơt lit). Kòp nơm thùng dờng gơs poan tal mơ ơn hơđang kơndòl tòm jơt nơm kơndòl.

³⁹ Khai rơndap kơndòl be do: Pram nơm ơm đah ma hìu duh khoai, mơ pram nơm ơm đah kiau. Ai tơnau dà, khai ơn đah ma hìu duh khoai, bơh đah đơm mattơngai lik.

⁴⁰ Khai kung lơh glah chàng dờng, cơnhŏ, mơ cờu behơ̆, Hiram lơh sir ală broă Salômôn in tòm hìu duh khoai Yàng Jehôwa dê:

⁴¹ hơ̆ la bàr nơm jrong, bàr nơm bồ wil hơđang cồng jrong, bàr blah mat bơtơng gòm bồ jrong;

⁴² Poan rhiang nơm plai lừu dap bàr sèng hơđang mat bơtơng.

⁴³ Jơt nơm kơrnòl mơ jơt nơm thùng dờng hơđang kơrnòl;

⁴⁴ tơnau ơn dà, jơt bàr nơm kơnrồ đoa tơnau dà,

⁴⁵ crah, cơnhŏ mơ cờu, ală phan ngui do mơ Hiram lơh Salômôn in mơ kòng tho goh tòm hìu Yàng Jehôwa dê.

⁴⁶ Bơtau sồr tŏ ală phan hơ̆ tòm ƀlàng ring Jordan dê, di tiah ù kơnàng, digùl Sukôt mơ Jarthan.

⁴⁷ Salômôn ò kơr dô nơm phan lơi tòm ală phan ngui hơ̆, tài bơh oă ngan; khai ò sơwì bơta kơnjơ̆ kòng dê.

⁴⁸ Salômôn kung lơh ală phan ngui tòm hìu Yàng Jehôwa in la: cơnòng duh khoai mơ màh, ơn piang lă pơdơng;

⁴⁹ jơng đèng mơ màh ngan ơn di đap Tiah Sàng Goh Ngan, pram nơm ơn đah ma mơ pram nơm ơn đah kiau, bal mơ bơkào đèng, prềng đèng, mơ dô nơm cơnhŏ sề mơ màh;

⁵⁰ ală mơngàn, pềs, cờu, cơnhŏ, mơ prềng ơn bùh mơ màh ngan; ală kai mpồng, ƀà ngui ală mpồng hìu đah dơlam in, ƀà di Tiah Sàng Goh Ngan, ƀà ngui mpồng hìu duh khoai in, gen la màh ngan.

⁵¹ Ală broă mơ Salômôn lơh hìu Yàng Jehôwa in, gen geh wil tơl la behơ̆. Salômôn sồr cèng ală phan mơ Dabit, bèp khai, neh ơn is sàng goh, hơ̆ la priă, màh, ală phan ngui, ơn tòm đam jàr hìu Yàng Jehôwa dê.