I Ală Bơtau 6 - Sră Goh 2018

Salômôn bơt bơtào hìu duh khoai

¹ Tòm nam dơ̆ poan rhiang phàm jơt tơnơ̆ mơ tŭ làng bol Israel neh lik bơh di lơgar Ejiptơ, tòm nam dơ̆ poan rài at bồ Salômôn dê hơđang Israel, tòm kơnhai Jip la kơnhai bàr, khai sơntòm bơt bơtào hìu duh khoai Yàng Jehôwa dê.

² Hìu duh khoai mơ Salômôn bơt Yàng Jehôwa in gơs prau jơt tal jòng, bàr jơt tal ơnàng, mơ pe jơt tal jơnhoa.

³ Ƀlàng jơng mpồng di đap ơdŭ dờng hìu duh khoai dê gơ lòt jat gah ơnàng hìu duh khoai bàr jơt tal, mơ gơ gơs jơt tal ơnàng đah hơđap hìu duh khoai.

⁴ Khai lơh hìu duh khoai in ală mpồng dềt gơs tơrnil mơ chi.

⁵ Rò gah ală dơrñang ơdŭ dờng mơ tiah sàng goh dơlam, khai bơt dô ròt hìu gùt dar, cah gơs oă ơdŭ dềt.

⁶ Tap hơđơm gơs pram tal ơnàng, tap digùl gơs prau tal, mơ tap pe hơđang gơs poh tal ơnàng. Khai lơh ală dra đah bơdìh dơrñang gùt dar hìu duh khoai nàng ò gơs ròc sơndră lơi tơmut tòm ală dơrñang hìu duh khoai dê.

⁷ Tòm tŭ bơt bơtào hìu duh khoai, cau ngui mìng ală lŭ neh sir phàt tòm trồm lŭ, gen tàng ò kơno ntas mut, sùng hala phan ngui lơi ndai mơ lòs di tiah cau ơm bơt hìu duh khoai.

⁸ Mpồng mut tòm ơdŭ tap digùl gơ ơm đah đơm hìu duh khoai dê; gơs ală kơnă ntùng guh hơ tap digùl, mơ bơh hơ̆ guh tus hơ tap pe hơđang.

⁹ Behơ̆, bơtau Salômôn neh bơt sir hìu duh khoai. Bơtau neh tơƀă ròc dra mơ pơng rkàng mơ mpàn nho rề.

¹⁰ Mơ khai bơt ală tap jơnhoa hơđang gơ sơndră di jơh dô nơm hìu. Kòp nơm ơdŭ gơs pram tal jơnhoa, mơ ală ơdŭ hơ̆ gơ tòmtơrbŏ bal mơ hìu duh khoai bơh ală chi nho rề.

¹¹ Gen gơs jơnau Yàng Jehôwa dê đơs mơ Salômôn lah:

¹² “Gơwèt hơ hìu duh khoai mơ mê bơt do, dilah mê lòt jat ală jơnau lơh nền Añ jê, lơh jat ală bơta boh lam Añ jê, prap gàr ală jơnau sồr lam Añ jê, mơ dòn bơr Añ jê, gen Añ rơp bơtào kơ̆ jơnau Añ neh ho mơ Dabit, bèp mê dê.

¹³ Mơ Añ rơp ơm digùl kòn sau Israel, Añ rơp ò tŭ lơi sang lòi làng bol Añ jê la Israel.”

¹⁴ Behơ̆ Salômôn bơt bơtào hìu duh khoai mơ neh lơh sir gơ.

¹⁵ Khai pơng ală dơrñang đah dơlam mơ mpàn nho rề, bơh mơnàng hìu duh khoai tus di rkàng, khai tìm gơ mơ mpàn đah dơlam, mơ khai tìm mơnàng hìu duh khoai mơ mpàn nho.

¹⁶ Khai bơt bàr jơt tal đah ngkòi hìu mơ mpàn nho rề cang bơh mơnàng tus di rkàng, mơ khai bơt đah dơlam be dô nơm ơdŭ sàng goh ngan, la Tiah Sàng Goh Ngan.

¹⁷ Hơ̆ la hìu duh khoai, tiah digùl đah hơđap ơdŭ tòm dơlam tiah sàng goh ngan jòng poan jơt tal.

¹⁸ Đah dơlam hìu duh khoai pơng mơ mpàn nho rề, pac rùp plai lềng mơ bơkào gơlì. Jơh ală tiah neh pơng mơ mpàn nho rề, ò mpòl dô nơm lŭ lơi.

¹⁹ Khai rcang tòm dơlam Tiah Sàng Goh Ngan tiah lồi dut tòm hìu duh khoai nàng ơn Đài Bơta Ho Bal Yàng Jehôwa dê tềng hơ̆.

²⁰ Đah dơlam Tiah Sàng Goh Ngan gơs bàr jơt tal jòng, bàr jơt tal ơnàng, mơ bàr jơt tal jơnhoa. Đah dơlam mơ kli mơ màh goh, mơ khai kung ƀềp màh cơnòng duh khoai mơ nho rề sơl.

²¹ Salômôn ƀềp đah dơlam hìu duh khoai mơ màh ngan, mơ khai dang che sreng màh di đap Tiah Sàng Goh Ngan la tiah neh ƀềp màh rau.

²² Behơ̆, khai ƀềp màh jơh đah dơlam hìu duh khoai. Khai kung ƀềp màh cơnòng duh khoai ơm hơđap Tiah Sàng Goh Ngan.

²³ Di Tiah Sàng Goh Ngan, khai lơh bàr nơm ceruƀim mơ chi ôlibe, kòp nơm jơnhoa jơt tal.

²⁴ Dô nơm pơnđar ceruƀim jòng pram tal, mơ pơnđar đah ne jòng pram tal; bơh cồng pơnđar đah do tus di cồng pơnđar đah ne la jơt tal.

²⁵ Ceruƀim ne kung gơs jơt tal, bơh bàr nơm ceruƀim gơs rùp să mơ dờng jơnhoa ndròm bal.

²⁶ Đah jơnhoa kòp nơm ceruƀim la jơt tal.

²⁷ Khai ơn ală ceruƀim tòm dơlam ơdŭ lồi dut Tiah Sàng Goh Ngan dê; kòp nơm gơ pò song pơnđar gơ dê. Pơnđar ceruƀim đah do gơtup di dơrñang đah do, mơ pơnđar ceruƀim đah ne gơtup di dơrñang đah ne, mơ ală pơnđar bol gơ dê gơtòmtup bal digùl ơdŭ.

²⁸ Khai ƀềp màh bàr nơm ceruƀim.

²⁹ Hơđang ală dơrñang gùt dar hìu duh khoai, đah dơlam mơ đah bơdìh, khai sồr pac rùp ceruƀim, chi gòl mơ bơkào gơlì.

³⁰ Khai kung ƀềp màh mơnàng ơdŭ dơlam mơ ơdŭ bơdìh dê.

³¹ Di tiah mut tòm Tiah Sàng Goh Ngan đah dơlam, khai lơh dô nơm mpồng gơs bàr pang mơ chi ôlibe; ròc mơ jrong đo mpồng gơs rùp pram mum.

³² Khai sồr pac hơđang bàr pang mpồng mơ chi ôlibe hơ̆ ală rùp ceruƀim, chi gòl mơ bơkào gơlì; gen kli mơ màh, kli màh hơđang rùp ceruƀim mơ rùp chi gòl.

³³ Bơh mpồng hìu duh khoai, khai kung lơh jrong mơ chi ôlibe, gơs rùp poan mum,

³⁴ mơ kung lơh bàr pang mpồng mơ chi nho rề; kòp pang gơs bàr pet rgơi lơ̆u wơl.

³⁵ Salômôn sồr pac mpòl ală rùp ceruƀim, chi gòl mơ bơkào gơlì; gen kli màh hơđang ală phan pac sềr.

³⁶ Khai bơt ơdŭ dờng digùl hìu đah dơlam mơ pe sèng lŭ neh pac, mơ dô sèng mơ chi nho rề.

³⁷ Tòm nam dơ̆ poan, kơnhai Jip, cau neh bơt mơnàng hìu duh khoai Yàng Jehôwa dê.

³⁸ Tus nam dơ̆ jơt dùl, di kơnhai Bulơ, hơ̆ la kơnhai phàm, bơta bơt hìu duh khoai neh sir tòm ală pơnah gơ dê, jat be rùp neh cih. Salômôn neh bơt sir hìu duh khoai tòm poh sơnam.