I Ală Bơtau 4 - Sră Goh 2018

Ală cau kwang duh broă mơ kwang at bồ Salômôn dê

¹ Bơtau Salômôn la bơtau at bồ hơđang jơh Israel,

² mơ do la ală cau kwang dờng khai dê: Ajaria kòn klau Jadôk la cau gơnoar ơn phan duh khoai;

³ Elihôrep mơ Ahija, kòn klau Sisa, la ală cau gơnoar cih; Jehôsaphat, kòn klau Ahilut, lơh gơs cau cih bơta yal yau lơgar dê;

⁴ Benayah kòn klau Jehôyada, la cau kwang at bồ mpồl ling; Jadôk mơ Abiatha la ală cau gơnoar ơn phan duh khoai.

⁵ Ajaria, kòn klau Nathan, la cau lam bồ ală cau kwang at bồ kơnhwàl; Jabut, kòn klau Nathan, lơh gơs dô nă cau gơnoar ơn phan duh khoai mơ cau bơyai broă is cau bơtau dê;

⁶ Ahisar, la cau kwang sền gàr gơlang cau bơtau dê; Adôniram, kòn klau Apda, la cau kwang at bồ cau lơh broă bòl glar.

⁷ Salômôn gơs jơt bàr nă cau kwang at bồ hơđang jơh Israel, bol khai rcang phan sa cau bơtau in mơ jơh hìu nhă bơtau in sơl. Kòp nă pal rcang tơl phan sa tơl dô kơnhai tòm dô nam.

⁸ Do la sơnđan mat bol khai dê: Ben Hur, tòm tiah kơh mơnơm Epraim dê;

⁹ Ben Deker, tòm Maka, Saalbim, Bet Semes, mơ Elôn Bet Hanan;

¹⁰ Benheset, tòm Harubôt (Sôkô mơ jơh tiah Hepher la bal mơ khai).

¹¹ Ben Abinadap, tòm Naphôt (khai neh bau mơ Taphat la kòn ùr Salômôn dê);

¹² Baana kòn klau Ahilut, tòm Thaanak, Megidô, mơ tòm jơh Betsean, bơdìh Jarethan, hơđơm Jejreel, bơh Betsan jơl tus Abel Mehôla lòt gan rlau mơ Jôkmeam;

¹³ Ben Geber, tòm Ramôt Galaat (ală ƀòn Jair dê, kòn klau Manase tòm Galaat la gơrê mơ khai, bal mơ kơnhwàl Argôp tòm Basan mơ prau jơt ƀòn dờng gơs dơrñang gùt dar mơ gơs kai mpồng ƀòn mơ kòng);

¹⁴ Ahinadap kòn klau Idô, tòm Mahanaim;

¹⁵ Ahimas, tòm tiah Neptali (khai neh bau mơ Basemat kòn ùr Salômôn dê);

¹⁶ Baana kòn klau Husai, tòm Aser mơ tòm Bealôt;

¹⁷ Jehôsaphat kòn klau Pharua, tòm Isakar;

¹⁸ Simei kòn klau Ela, tòm Benjamin;

¹⁹ Geber kòn klau Uria, tòm Galaat (bơtau Sihôn, cau Amôrit, mơ bơtau Ôk cau Basan dê). Mìng dô nă khai lơh gơs cau kwang at bồ hơđang kơnhwàl.

Bơta at bồ ryŭ ryơm Salômôn dê

²⁰ Làng bol Juda mơ Israel la gal ngan kung be bràs di gah dàlềng, bol khai ñô sa mơ ơm lơngai.

²¹ Salômôn at bồ hơđang jơh ală lơgar bơh hiòng Ơphrat tus di lơgar Philistin, ngài tus di nhàr lơgar Ejiptơ. Ală lơgar hơ̆ dap dia mơ dòn duh hơđơm gơnoar Salômôn dê jơl jơh rài kis khai dê.

²² Phan ngui sa kòp ngai Salômôn dê la pe jơt kor kơmbuh phe rhền, mơ prau jơt kor kơmbuh phe òs,

²³ jơt nơm kơnrồ lơmă, bàr jơt nơm kơnrồ bơh tòm ƀlàng ñhơt, mơ dô rhiang nơm belàt mơ be, bal mơ ală jùn, il, iar mơ ada ròng lơmă.

²⁴ Bơh khai at bồ hơđang jơh ală kơnhwàl ơm đah mattơngai mut hiòng Ơphrat dê, bơh Tipsah tus hơ Gaja; mơ gơs bơta ring lơngai tòm làm lơgar.

²⁵ Tòm pah rài kis Salômôn dê, làng bol Juda mơ Israel bơh Dan tus Beerseba, kòp nă ơm lơngap lơngai hơđơm mƀur tòm ño mơ tòm chi ƀal khai dê.

²⁶ Salômôn gơs poan rbô wàng ròng ơseh hwài rơndeh lòs tòmlơh, mơ jơt bàr rbô cau ling hào ơseh.

²⁷ Ală cau kwang at bồ kơnhwàl, kòp nă dô kơnhai lơh nền khai in, rcang sir ală phan ngui sa bơtau Salômôn in, mơ jơh ală cau in nggui sa bal di cơnòng sa bơtau dê; bol khai rcang ò siơ̆u phan lơi.

²⁸ Bol khai kung cèng tus hơ ală tiah neh lơh nền pơnah kòi màc bal mơ rhe nàng ròng ală ơseh hwài rơndeh lòs tòmlơh mơ ală ơseh ndai tai sơl.

Bơta jak chài Salômôn dê

²⁹ Yàng Tom Trồ neh ai Salômôn in bơta jak chài mơ bơta àng loh crih crài ngan, bal mơ bơta git wă dờng ơnàng ò jai was sơnoa kung be bràs di gah dàlềng.

³⁰ Bơta jak chài Salômôn dê la dờng rlau mơ bơta jak chài jơh ală cau ơm đah mattơngai lik, mơ dờng rlau mơ bơta jak chài jơh ală cau Ejiptơ dê.

³¹ Khai jak chài rlau mơ kòp nă cau ndai, rlau mơ Ethan, cau Ejrahit, rlau mơ Heman, Kalkol mơ Darda la ală kòn klau Mahôl dê; mơ bơta tiơng pơnro bơh khai làm jơh ală làng bol gùt dar.

³² Khai đơs pe rbô sèng pơnđik, mơ ală bơta đơs crih khai dê la dô rbô mơ pram nơm.

³³ Khai yal tơlik bơh bơta kis chi che dê, bơh tòm chi pơnàng Liban dê jơl tus di nsrum chi ƀô hòn lik bơh di ală dơrñang. Khai kung bơto bơh ală jơi phan poan jơng, ală sềm, ală phan wìn nsròng mơ ală ka.

³⁴ Gơs oă cau tus bơh jơh ală làng bol nàng iat bơta jak chài Salômôn dê; bol khai geh sồr lòt tus bơh di ală cau bơtau tòm lơgar dunnia neh kơno bơh bơta jak chài Salômôn dê.