I Ală Bơtau 3 - Sră Goh 2018

Salômôn dan bơta jak chài

¹ Salômôn lơh dô bơta tòmklac mơ Pharaôn, bơtau Ejiptơ, khai bau mơ kòn ùr Pharaôn dê mơ rò bau ùr khai tus ơm tòm Ƀòn Dờng Dabit jơl tus di tŭ khai neh bơt sir gơlang khai dê, hìu duh khoai Yàng Jehôwa dê mơ dơrñang gùt dar Jerusalem.

² Làng bol gam ơn phan duh khoai hơđang ală tiah jơnhoa tài bơh òhềt bơt hìu duh khoai Sơnđan Yàng Jehôwa in.

³ Salômôn kòñ gơboh di Yàng Jehôwa, mơ lòt jat ală bơta sồr lam Dabit bèp khai dê; mìng khai ơn phan duh khoai mơ chu kơlhô hơđang ală tiah jơnhoa.

⁴ Bơtau lòt tus hơ Gabaôn nàng ơn phan ơn duh khoai tềng hơ̆, bơh hơ̆ la tiah jơnhoa dờng màng rlau jơh, mơ Salômôn òs ơn dô rbô nơm phan ơn chu pơrguc hơđang cơnòng duh khoai hơ̆.

⁵ Tòm Gabaôn, Yàng Jehôwa tơlik mat mơ Salômôn tòm bơta mpau tòm trồ mang, mơ Yàng Tom Trồ đơs lah: “Dan tĕ bơta lơi mê kòñ Añ ai mê in.”

⁶ Salômôn ho lah: “Yàng neh yal tơlik bơta kòñ gơboh kơ̆ dơn dờng ngan gơwèt mơ cau duh broă Kơnràñ la Dabit bèp añ, tài bơh khai neh lơh lòt di đap Kơnràñ dô bă dòn song, mơ gơs nùs song ring mơ song ngan; mơ Kơnràñ neh prap khai in bơta kòñ gơboh kơ̆ dơn dờng hơ̆, mơ neh ai khai in dô nă kòn klau nàng nggui hơđang sơbàn khai dê tòm ngai do.

⁷ Mơ tŭ do, ơ Jehôwa Yàng Tom Trồ añ jê! Yàng neh bơtào cau duh broă Kơnràñ dê gơs bơtau at bồ hơđang sơbàn Dabit bèp añ jê. Bulah añ mìng la dô nă cau kơnòm dềt, mơ añ ò git mut hala lik mbe lơi.

⁸ Cau duh broă Yàng dê ơm digùl làng bol mơ Yàng neh sac rwah, la dô nơm làng bol gal ngan ò jai kòp.

⁹ Gen tàng dan ai cau duh broă Yàng in dô nơm nùs nhơm jak chài àng loh nàng at bồ làng bol Kơnràñ dê mơ đal git bơta niam mơ bơta iơh; bơh ñcau rgơi at bồ làng bol dờng ngan do Yàng dê taih?”

¹⁰ Yàng Jehôwa niam nùs bơh bơta Salômôn neh dan hơ̆.

¹¹ Yàng Tom Trồ đơs mơ khai lah: “Tài bơh mê neh dan bơta do, mơ ò dan kis jŏ hala pas gơs să tòm mê in, kung ò dan bơta kis ală cau sò tơm mê dê, mơya dan bơta jak chài àng loh să tòm mê in nàng đal git bơta song ring,

¹² gen Añ rơp lơh jat bơta mê neh dan, Añ rơp ai mê in dô nơm nùs jak chài mơ àng loh, ò gơs cau lơi neh gơs lài mơ mê ndròm be mê, mơ kung rơp ò gơs cau lơi tus tơnơ̆ mê ndròm be mê.

¹³ Añ kung rơp ai mê in ală bơta mê ò dan, hơ̆ la bơta pas gơs mơ bơta ryŭ ryơm tòm jơh rài kis mê dê, rơp ò gơs bơtau lơi ndai pơndròm mơ mê.

¹⁴ Dilah mê rơp lòt tòm gùng dà Añ jê, prap gàr ală bơta boh lam mơ sồr lam Añ jê kung be Dabit bèp mê neh lòt, gen Añ rơp ai mê in geh kis jŏ jòng.”

¹⁵ Gen Salômôn kah rngal, mơ git hơ̆ la dô bơta mpau. Khai rê wơl hơ Jerusalem, ntào di đap Đài Bơta Ho Bal Yàng Jehôwa dê mơ ơn ală phan ơn chu pơrguc bal mơ ală phan ơn bơta ring lơngai. Mơ khai yò sào dờng jơh ală cau kwang duh broă khai in.

Bơta cahrña jak chài Salômôn dê

¹⁶ Tơnơ̆ hơ̆, gơs bàr nă cau ùr dri tus ntào di đap bơtau.

¹⁷ Dô nă tòm bol khai đơs lah: “Ơ cau tòm añ jê, cau ùr do mơ añ ơm bal tòm dô nơm hìu; mơ añ neh deh dô nă kòn tòm tŭ gơs khai ơm bal mơ añ tòm hìu hơ̆.

¹⁸ Gen pe ngai tơnơ̆ mơ tŭ añ neh deh, cau ùr do kung deh sơl. Gơs mìng bàr nă bol hi lơm ơm tòm hìu, ò gơs dô nă cau lơi ndai ơm tòm hìu bal mơ bol hi.

¹⁹ Tòm trồ mang, kòn klau cau do chơt tài bơh khai neh bic klơn hơđang kòn khai.

²⁰ Behơ̆ khai guh tòm gùl mơnang, mơ tă kòn klau añ ơm bic di gah añ tòm tŭ añ bic lơhă. Khai ơn kòn añ di ntơh khai dê, mơ ơn kòn klau neh chơt khai dê di ntơh añ.

²¹ Tòm tŭ añ guh àng drim nàng tơmpô kòn klau añ, añ gŏ khai neh chơt rau; mơya tòm tŭ añ sền nền rềp di khai tòm àng drim loh làng añ gŏ ò di la kòn klau añ neh deh.”

²² Mơya cau ùr ne đơs lah: “Ò di behơ̆! Kòn klau kis la kòn klau añ jê; kòn klau chơt la kòn klau ai dê.” Mơya cau ùr sơnròp đơs wơl lah: “Ò di! Kòn klau chơt la kòn klau ai dê, ai kòn klau kis la kòn klau añ jê.” Behơ̆ bàr nă bol khai tòmlah tòm pơndang bal di đap cau bơtau.

²³ Bơtau đơs lah: “Cau do đơs lah: ‘Kòn klau añ gam kis, mơ kòn klau ai dê neh chơt,’ tòm tŭ cau ne đơs lah: ‘Ò di; kòn klau ai neh chơt, mơ kòn klau añ gam kis.’”

²⁴ Gen bơtau đơs lah: “Cèng tĕ añ in dô ngkơr đào.” Gen bol khai cèng dô ngkơr đào di đap bơtau.

²⁵ Bơtau đơs lah: “Blah tĕ kòn klau kis gơs bàr pơnah; ai dô pơnah cau do in mơ dô pơnah cau ne in.”

²⁶ Gen cau ùr gơs kòn klau gam kis nđàc sơngit di kòn khai dê đơs mơ bơtau lah: “Ơ cau tòm añ jê, dan ai tĕ cau ne in kòn dềt gam kis, bañ tơnchơt khai!” Mơya cau ne đơs lah: “Khai rơp ò gơrê mơ añ, mơ kung ò gơrê mơ ai; blah tĕ khai gơs bàr pơnah!”

²⁷ Gen bơtau ho wơl lah: “Ai tĕ kòn dềt gam kis cau ùr sơnròp in. Bañ tơnchơt khai; khai la mè kòn do dê.”

²⁸ Tòm tŭ jơh ală cau Israel kơno bơta cahrña bơtau dê, gen bol khai duh rngòt ngan di bơtau, tài bơh bol khai dòp git cau bơtau gơs bơta jak chài Yàng Tom Trồ dê nàng lơh jat bơta song ring.