I Ală Bơtau 22 - Sră Goh 2018

Ahap mơ Jôsaphat tòmlơh mơ cau Aram

¹ Tòm pe sơnam Aram mơ Israel ò gơs bơta tòmlơh.

² Mơya tòm nam dơ̆ pe, bơtau Jôsaphat, Juda dê, lòt tus mơ bơtau Israel.

³ Bơtau Israel đơs mơ dĭ gơna khai lah: “Bol mê ò git lah Ramôt tòm Galaat gơrê bal mơ bol he ò ơ? Mơya bol he ò lơh bơta lơi nàng tă gơ bơh di tê bơtau Aram ơ!”

⁴ Khai đơs mơ Jôsaphat lah: “Bơtau kòñ lòt bal mơ añ nàng tòmlơh mơ Ramôt tòm Galaat sơl?” Jôsaphat đơs mơ bơtau Israel lah: “Añ be bơtau; làng bol añ be làng bol bơtau dê; mơ ală ơseh añ be ală ơseh bơtau dê.”

⁵ Mơya Jôsaphat kung đơs mơ bơtau Israel lah: “Lài ngan hòi lùp tĕ Yàng Jehôwa.”

⁶ Gen bơtau Israel pơjum tơrgòm jơh ală cau gơnoar hwơr, pơgap poan rhiang nă, mơ lùp bol khai lah: “Añ pal lòt tòmlơh mơ Ramôt tòm Galaat hala ò?” Bol khai ho lah: “Lòt tĕ; bơh Yàng Jehôwa rơp jào gơtòm tê bơtau.”

⁷ Mơya Jôsaphat đơs lah: “Tềng do ò gơs cau gơnoar hwơr lơi ndai Yàng Jehôwa dê nàng bol he hòi lùp khai sơl?”

⁸ Bơtau Israel ho mơ Jôsaphat lah: “Gam gơs dô nă cau, nàng bơh khai bol he rgơi lùp Yàng Jehôwa, hơ̆ la Mice, kòn klau Jimla dê; mơya añ gơjrañ di khai, bơh khai ò tŭ lơi đơs hwơr niam bơh añ, mơ mìng la rung rài lơm.” Jôsaphat đơs lah: “Dan bơtau bañ đơs behơ̆.”

⁹ Gen bơtau Israel hòi dô nă cau kwang kơndời mơ sồr lah: “Mhar jà tĕ Mice, kòn klau Jimla.”

¹⁰ Tŭ hơ̆ bơtau Israel mơ Jôsaphat, bơtau Juda, ơm nggui hơđang sơbàn bol khai dê, mơ soh ào bơtau bol khai dê tòm ƀlàng pơrjă kòi, di mpồng mut tòm ƀòn dờng Samari; mơ jơh ală cau gơnoar hwơr kư̆ ơm đơs hwơr di đap bàr nă cau bơtau.

¹¹ Jedekia, kòn klau Kenana, lơh is khai in ală ngke mơ lòs, mơ đơs lah: “Yàng Jehôwa đơs be do: ‘Bal mơ ală ngke do, mê rơp gĕ cau Aram jơl tus di tŭ bol khai kòl tơnroh jơh.’”

¹² Mơ jơh ală cau gơnoar hwơr gen đơs ndròm bal behơ̆, mơ đơs lah: “Guh tĕ hơ Ramôt tòm Galaat mơ geh pha; Yàng Jehôwa rơp jào gơtòm tê bơtau.”

Mice yal lài bơta tòmlơh alah

¹³ Cau kong sồr neh lòt jà Mice, đơs mơ khai lah: “Jơh ală cau gơnoar hwơr neh dô nùs bal yal bơta niam bơtau in; dan jơnau ồng dê kung be jơnau dô nă tòm bol khai mơ yal bơta niam sơl.”

¹⁴ Mơya Mice ho lah: “Kung be Yàng Jehôwa kis gam sùm mơ srat să, jơnau lơi Yàng Jehôwa đơs mơ añ, gen añ rơp yal.”

¹⁵ Tòm tŭ khai neh tus hơ bơtau, gen bơtau lùp lah: “Ơ Mice, bol he pal lòt tòmlơh mơ Ramôt tòm Galaat hala ò pal taih?” Mice ho: “Lòt tĕ, bơtau rơp geh pha; Yàng Jehôwa rơp jào gơtòm tê bơtau.”

¹⁶ Mơya bơtau đơs mơ khai lah: “Nđò dơ̆ rau añ pal sồr mê srat să ò yal añ in bơta lơi rlau mơ jơnau song tòm sơnđan Yàng Jehôwa ò ơ?”

¹⁷ Gen Mice ho lah: “Añ gŏ jơh Israel kong nrah nring hơđang ală mơnơm, be belàt ò gơs cau ê; mơ Yàng Jehôwa đơs lah: ‘Ală cau hơ̆ ò gơs cau tòm; kòp nă rê wơl tĕ hìu he lơngap lơngai.’”

¹⁸ Bơtau Israel đơs mơ Jôsaphat lah: “Añ ò di neh đơs mơ bơtau lah khai ò đơs hwơr niam bơh añ, mơ mìng la bơta rung rài lơm ò ơ?”

¹⁹ Gen Mice đơs lah: “Behơ̆, iat tĕ jơnau Yàng Jehôwa dê: Añ gŏ Yàng Jehôwa nggui hơđang sơbàn Kơnràñ mơ jơh mpồl ling hơđang trồ ntào duh khoai Kơnràñ di đah ma mơ đah kiau.”

²⁰ Yàng Jehôwa lùp lah: “Ñcau rơp lòt pơndòm ơniai Ahap, nàng khai guh hơ Ramôt tòm Galaat, mơ gơpừ chơt tềng hơ̆ taih? Cau do ho be do, cau ne ho be dă.”

²¹ Jơl tus gơs dô nơm hwềng lik ntào di đap Yàng Jehôwa mơ yal lah: “Añ rơp lòt pơndòm ơniai khai.” Yàng Jehôwa ai jơnau lùp hwềng hơ̆ lah; “Pơndòm ơniai mbe lơi taih?”

²² Hwềng hơ̆ ho lah: “Añ rơp lòt mơ lơh gơs dô nơm hwềng đơs blac tòm bơr ală cau gơnoar hwơr khai dê.” Yàng Jehôwa đơs lah: “Mê la cau pơndòm ơniai khai, lòt tĕ mê rơp lơh behơ̆, mơ rơp gơlik gơs.”

²³ Behơ̆ bơtau sền tĕ, Yàng Jehôwa neh ơn dô nơm hwềng đơs blac tòm bơr ală cau gơnoar hwơr bơtau dê, mơ Yàng Jehôwa neh lơh nền cèng bơta rung rài bơtau in.

²⁴ Gen Jedekia, kòn klau Kenana dê, tus rềp hơ Mice mơ pah di tơrmồ khai, mơ lah: “Gùng lơi Hwềng Yàng Jehôwa neh lik bơh añ nàng tus đơs mơ mê taih?”

²⁵ Mice ho lah: “Tòm ngai hơ̆ mê rơp git, tòm tŭ mê dô mut nàng pồn tòm dô nơm ơdŭ tòm dơlam hìu.”

²⁶ Gen bơtau Israel ai gơnoar sồr lah: “Kup tĕ Mice cèng khai tus hơ Ammôn, kwang at bồ ƀòn, mơ Jôas, kòn klau bơtau,

²⁷ mơ đơs tĕ lah: ‘Bơtau đơs be do: Ơn tĕ cau do tòm hìu jàm, ròng siam mơ phan sa tă pơndut gam dô êt jơl tus añ rê wơl lơngap lơngai.’”

²⁸ Mice pơnjat lah: “Dilah bơtau rê wơl lơngap lơngai, gen Yàng Jehôwa ò đơs bơh bơr añ.” Mơ khai đơs tai: “Ơ làng bol, jơh ală bol mê iat tĕ!”

Tòmlơh alah mơ bơta chơt ahap dê

²⁹ Behơ̆, bơtau Israel guh hơ Ramôt tòm Galaat bal mơ Jôsaphat, bơtau Juda.

³⁰ Bơtau Israel đơs mơ Jôsaphat lah: “Añ rơp lơh be cau ndai, mơ lòt mut tòm tiah tòmlơh; ai bơtau kư̆ soh ào cau bơtau dê.” Behơ̆, bơtau Israel tòmgơl phan soh lơh be cau ndai mơ lòt tòmlơh.

³¹ Mơ tai, bơtau Aram ai gơnoar sồr pe jơt bàr nă cau kwang at rơndeh ơseh khai dê lah: “Bol mê bañ brồ lơh cau lơi bulah dờng hala dềt, mìng lơh dô nă bơtau Israel lơm.”

³² Behơ̆, tòm tŭ ală kwang at rơndeh ơseh gŏ Jôsaphat gen bol khai đơs lah: “Hơ̆ ngan la bơtau Israel.” Behơ̆ bol khai tơrwơl nàng lơh khai; mơya Jôsaphat hòi driau dờng.

³³ Tòm tŭ ală kwang at rơndeh ơseh gŏ ò di la bơtau Israel, gen ruc wơl ò ting jat khai tai.

³⁴ Mơya gơs dô nă cau nisơna wàr àtak pañ di bơtau Israel, di digùl ngkàp ào lòs mơ ntơh khai. Bơtau đơs mơ ală cau at rơndeh khai dê lah: “Tơrwơl tĕ, mơ cèng añ lik hơ bơdìh tiah tòmlơh, bơh añ neh sồt kơnjơ̆.”

³⁵ Bơta tòmlơh gơguh dờng ngan; mơ bơtau pal gơs cau đơng tòm rơndeh di đap cau Aram. Jơl tus di trồ mho ngan gen bơtau chơt; mhàm bơh tiah sồt gơhòr tòm rơndeh.

³⁶ Gen tòm tŭ mattơngai neh mut, gơs dô jơnau driau tòm mpồl ling lah: “Kòp nă rê wơl tĕ tòm ƀòn tòm he, mơ kòp nă rê wơl tĕ tòm lơgar he dê.”

³⁷ Bơtau chơt la behơ̆; mơ cau cèng ƀồc bơtau rê hơ Samari, mơ tơp tềng hơ̆.

³⁸ Cau rào rơndeh khai tòm tơnau Samari, la tiah ală cau ùr dri um dà, mơ gơs ală so liap mhàm khai, tòm toh be jơnau Yàng Jehôwa neh đơs.

³⁹ Ală bơta ndai Ahap dê, ală broă khai lơh, gơlang mơ bla khai bơt, mơ ală ƀòn khai bơt bơtào, gen neh cih tòm sră yal broă kòp nam ală cau bơtau Israel dê.

⁴⁰ Behơ̆, Ahap bic lơhă bal mơ ồng pàng he, mơ Acasia, kòn klau khai, pơrdòn sơbàn khai.

Jôsaphat lơh gơs bơtau Juda

⁴¹ Jôsaphat kòn klau Asa sơntòm at bồ hơđang Juda tòm nam dơ̆ poan rài Ahap, bơtau Israel dê.

⁴² Jôsaphat neh pe jơt pram nam tòm tŭ khai sơntòm at bồ, mơ khai at bồ bàr jơt pram tòm Jerusalem. Mè khai sơnđan la Ajuba, kòn ùr Sici dê.

⁴³ Khai lòt jat jơh gùng Asa, bèp khai, ò pleh bơh gùng hơ̆, lơh bơta niam di đap Yàng Jehôwa.

⁴⁴ Mơya khai ò sòr ală tiah jơnhoa, làng bol gam duh khoai mơ chu kơlhô tòm ală tiah jơnhoa.

⁴⁵ Jôsaphat kung lơh gơtòmsòr mơ bơtau Israel.

⁴⁶ Ală bơta ndai Jôsaphat dê mơ gơnoar pràn khai neh yal tơlik, mơ bơta tòmlơh khai dê, neh geh cih tòm sră yal broă kòp nam ală bơtau Juda dê.

⁴⁷ Ală cau klau dri tơlàr mơ cau klau gam wơl tòm lơgar, tòm rài Asa bèp bơtau dê, khai neh pơndut jơh.

⁴⁸ Tŭ hơ̆ ò gơs bơtau tòm làng bol Edôm, dô nă cau kwang sền gàr lơh bơtau.

⁴⁹ Jôsaphat pơng ală ơhò tòm mpồl Tarsi dê, nàng lòt pơdiang màh bơh Ôphir, mơya bol khai ò rgơi lòt, bơh ală ơhò neh bơcah tòm Ejiôn Geber.

⁵⁰ Gen Acasia kòn klau Ahap dê đơs mơ Jôsaphat lah: “Lòi tĕ ală cau dĭ gơna añ jê lòt bal tòm ơhò dĭ gơna bơtau dê.” Mơya Jôsaphat ò kòñ.

⁵¹ Jôsaphat bic lơhă mơ ồng pàng khai dê, mơ geh tơp tòm bơtô tòm ƀòn dờng Dabit; Jôram kòn klau khai pơrdòn sơbàn khai.

Acasia lơh gơs bơtau Israel

⁵² Nam dơ̆ jơt poh rài Jôsaphat bơtau Juda; gen Acasia kòn klau Ahap sơntòm at bồ hơđang Israel tòm Samari, mơ at bồ bàr sơnam.

⁵³ Khai lơh bơta iơh di đap Yàng Jehôwa mơ lòt tòm gùng mè bèp khai dê, mơ tòm gùng Jerôbôam kòn klau Nebat, la cau neh lơh Israel in tìs glài.

⁵⁴ Khai duh broă mơ duh khoai yàng Baal; mơ bơrcek Jehôwa Yàng Tom Trồ in gơjrañ, kung be bèp khai neh lơh.