I Ală Bơtau 20 - Sră Goh 2018

Bơta gơrwàng mơ bơta dong tă ƀòn Samari

¹ Benhadat bơtau Siri, pơjum jơh ală mpồl ling khai dê; pe jơt bàr nă cau bơtau lòt bal mơ khai, bal mơ ơseh mơ rơndeh. Khai lòt tus tòmdră mơ Samari, gơrwàng mơ brồ lơh gơ.

² Khai sồr cau kong sồr lòt tus mơ Ahap, bơtau Israel, ơm tòm ƀòn, mơ đơs mơ khai lah: Benhadat đơs be do:

³ “Priă mơ màh mê dê gơrê bal mơ añ. Ală bau ùr bơtau mơ ală kòn sau niam rlau jơh mê dê kung gơrê bal mơ añ.”

⁴ Bơtau Israel ho: “Be ồng đơs ơ cau tòm añ jê la bơtau; jơh ală phan añ gơs gơrê bal mơ bơtau.”

⁵ Mơ ală cau kong sồr lòt tai hơ bơtau Israel mơ đơs lah: Benhadat đơs be do: “Añ sồr cau lòt tus mơ mê lah: Jào tĕ añ in priă, màh, bau ùr mê dê bal mơ ală kòn mê dê añ in.”

⁶ Bulah behơ̆, añ rơp sồr ală dĭ gơna añ jê lòt tus hơ mê ngai hìng tòm jơ do, mơ bol khai rơp jòi sơwì hìu mê mơ hìu cau dĭ gơna mê dê; mơ ơn tê hơđang phan lơi niam nùs bol khai, mơ cèng gơ.

⁷ Gen bơtau Israel hòi jơh ală cau kwang kra tòm lơgar, mơ đơs lah: “Sền sơwì tĕ mơ git lah cau do kòñ jòi nàng lơh kalke di bol he; bơh khai neh sồr cau tus sồr añ jào ală bau ùr, ală kòn sau, priă, mơ màh añ jê; mơ añ ò pơndang mơ khai.”

⁸ Gen ală cau kwang kra mơ jơh làng bol đơs mơ bơtau lah: “Bañ iat, mơ bañ dòp jơnau khai.”

⁹ Behơ̆ Ahap ho mơ cau kong sồr Benhadat dê lah: “Yal tĕ mơ cau tòm añ jê la bơtau lah: Ală bơta bơtau sồr dĭ gơna bơtau lơh dơ̆ sơnròp, añ rơp lơh; mơya bơta do añ ò rgơi lơh.” Ală cau kong sồr lik lòt yal wơl ală jơnau hơ̆ Benhadat in.

¹⁰ Benhadat sồr cau kong sồr lòt đơs tai lah: “Dan ală yàng lơh añ kơnjơ̆ mơ oă rlau, dilah thul ơmul tòm Samari tơl bềng dô kơndồm tê ală cau ling lòt jat añ!”

¹¹ Mơya bơtau Israel ho: “Yal tĕ mơ bơtau lah: Cau soh ào lòs bañ pơnhừ să be cau hồ tơlik gơ.”

¹² Benhadat kơno yal wơl ală jơnau hơ̆, tòm tŭ khai ơm ñô alak bal mơ ală bơtau tòm sàl, gen đơs mơ ală cau dĭ gơna lah: “Rcang tòmlơh tĕ.” Bol khai rcang bơta tòmlơh nàng tòmdră mơ ƀòn dờng.

Jơnau gơnoar hwơr gơwèt mơ Ahap

¹³ Gen gơs dô nă cau gơnoar hwơr tus hơ Ahap, bơtau Israel, mơ đơs lah: “Yàng Jehôwa đơs be do: ‘Mê neh gŏ mpồl ling do dờng mơ gal ngan sơl? Sền tĕ, Añ rơp jào bol khai tòm tê mê, mơ mê rơp git Añ la Jehôwa.’”

¹⁴ Ahap lùp lah: “Ngui ñcau taih?” Khai ho: “Yàng Jehôwa đơs be do: ‘Ală cau pơnu duh broă ală kwang kơnhwàl dê.’” Khai lùp pơnjat: “Ñcau rơp tòmlơh?” Cau gơnoar hwơr ho: “Să tòm bơtau.”

¹⁵ Gen Ahap pơjum ală dĭ gơna kwang at bồ ƀòn dờng; gơs bàr rhiang pe jơt bàr nă cau. Tơnơ̆ hơ̆, khai tơrgòm jơh làng bol Israel geh poh rbô nă.

¹⁶ Bol khai lik lòt tŭ trồ gùl ngai, tòm tŭ Benhadat ơm ñô bơñul tòm sàl bal mơ pe jơt bàr nă cau bơtau dong kòl khai.

¹⁷ Ală cau pơnu duh broă ală kwang kơnhwàl lòt lài; Benhadat sồr ală cau lòt sơwì; mơ bol khai neh yal wơl khai in lah: “Gơs ală cau bơh Samari tus.”

¹⁸ Khai đơs: “Dilah bol khai tus jòi bơta ring lơngai, kup kis tĕ; dilah bol khai tus nàng tòmlơh, kup kis tĕ.”

¹⁹ Mơya ală cau hơ̆ neh lik bơh ƀòn dờng: la ală cau pơnu duh broă ală kwang kơnhwàl mơ mpồl ling lòt jat bol khai.

²⁰ Kòp nă tơnchơt cau sò tơm. Mpồl ling Siri ntoat dô, mơ Israel ting jat bơh tơnơ̆. Benhadat, bơtau Siri, hào ơseh ntoat dô bal mơ cau ling hào ơseh.

²¹ Gen bơtau Israel lik brồ lơh ală ơseh mơ rơndeh, lơh cau Siri kong alah mơ tơnchơt oă ngan.

²² Tŭ hơ̆, cau gơnoar hwơr tus rềp hơ bơtau Israel, mơ đơs lah: “Lòt tĕ, lơh să tòm bơtau in pràn kơldang, mơ sền sơwì niam bơta lơi bơtau pal lơh, bơh nam tơnơ̆ bơtau Siri rơp tus nàng tòmlơh mơ bơtau tai.”

Ahap pha rlau mơ cau Siri tai

²³ Ală dĭ gơna bơtau Siri dê đơs mơ khai lah: “Yàng bol khai dê la yàng kơh, gen tàng bol khai pràn rlau mơ bol he; behơ̆ bol he pal tòmlơh mơ bol khai tòm tiah ring; ngan bol he rơp pràn rlau mơ bol khai.

²⁴ Kung pal lơh bơta do: Tòmgơl tĕ ală cau bơtau bơh kòp tiah at bồ mpồl ling, mơ bơtào ală cau kwang at bồ mpồl ling di tiah bol hơ̆ dê;

²⁵ mơ hòi pơjum tĕ dô mpồl ling be mpồl ling bơtau dê neh roh, ơseh ala ơseh, rơndeh ala rơndeh mơ bol he rơp tòmlơh mơ bol khai tòm tiah ring, ngan bol he rơp pràn rlau mơ bol khai.” Gen bơtau iat jơnau dĭ gơna khai dê mơ lơh behơ̆.

²⁶ Nam tơnơ̆, Benhadat pơjum làng bol Siri, mơ guh hơ Aphek nàng tòmlơh mơ Israel.

²⁷ Làng bol Israel kung geh hòi pơjum mơ rcang sir ală bơta, bol khai lik nàng tòmlơh mơ cau Siri. Cau Israel sơntơp sàl song di đap cau Siri gơlơh be bàr mpồl be dềt; ai cau Siri gen bềng làm lơgar.

²⁸ Cau Yàng Tom Trồ dê tus rềp đơs mơ bơtau Israel lah: “Yàng Jehôwa đơs be do: Tài bơh cau Siri neh đơs lah: Yàng Jehôwa la yàng kơh, ò di la yàng thòng dê, gen tàng Añ rơp jào jơh mpồl ling gal do tòm tê mê, mơ bol mê rơp git Añ la Yàng Jehôwa.”

²⁹ Bàr đah sơntơp sàl song di đap đah ne tòm poh ngai; mơ tòm ngai dơ̆ poh, bol khai sơntòm tòmlơh. Cau Israel tơnchơt dô rhiang rbô nă cau ling Siri lòt jơng tòm dô ngai.

³⁰ Cau gam wơl ntoat dô pồn tòm ƀòn dờng Aphek; mơ dơrñang ƀòn tơrlah klơn chơt bàr jơt poh rbô nă cau hơ̆. Benhadat kung ntoat dô, mơ mut tòm ƀòn dờng nàng pồn să.

³¹ Ală dĭ gơna Benhadat đơs mơ khai lah: “Bol hi neh kơno lah ală cau bơtau Israel la ală cau gơs nùs bềng kòñ nđàc. Behơ̆ lòi bol hi kơt ƀào di but, mơ pùt che hơđang bồ bol he dê, mơ lik tus hơ bơtau Israel: digơlan khai rơp lòi bơtau in kis.”

³² Gen bol khai kơt ƀào di but, mơ pùt che hơđang bồ, mơ lik tus mơ bơtau Israel, mơ yal lah: “Benhadat, cau dĭ gơna bơtau, đơs lah: ‘Dan bơtau lòi añ in kis.’” Ahap ho lah: “Khai gam kis sơl? Khai la bi añ.”

³³ Bol khai ai bơta hơ̆ la dô nơm tềl niam, sơrbac sơrbang dòp jơnau hơ̆ mơ đơs lah: “Ngan, Benhadat la bi bơtau dê.” Ahap pơnjat lah: “Lòt tĕ cèng khai tus hơ do.” Gen Benhadat tus tơlik mat mơ Ahap; khai jà Benhadat hào hơđang rơndeh ơseh khai dê.

³⁴ Benhadat đơs mơ Ahap lah: “Añ rơp jào wơl ală ƀòn dờng mơ bèp añ neh tòmpìt bơh di bèp bơtau dê, mơ bơtau rơp bơt bơtào ală drà bơtau in tòm Damas, be bèp añ neh lơh tòm Samari.” Bơtau Israel ho lah: “Añ rơp lòi mê in rê hìu tòm bơta lơh nền do.” Behơ̆, Ahap bơtào bơta ho bal mơ Benhadat, mơ lòi khai in lòt.

Dô nă cau gơnoar hwơr lơh nền glài Ahap

³⁵ Gơs gơnoar sồr Yàng Jehôwa dê, dô nă cau tòm mpồl ală cau gơnoar hwơr, đơs mơ dô nă cau ndai lah: “Añ dan bi lơh tĕ añ.” Mơya cau ne ò bài lơh khai.

³⁶ Khai đơs mơ cau ne lah: “Bơh bi ò dòn jat jơnau sồr Yàng Jehôwa dê, gen tòm tŭ mê lòt bơh di añ, dô nơm klìu triă rơp tơnchơt mê.” Mơ tòm tŭ cau ne lik bơh di khai, gen dô nơm klìu triă tìp khai mơ tơnchơt khai.

³⁷ Cau gơnoar hwơr tìp dô nă cau ndai, mơ đơs lah: “Añ dan mê lơh tĕ añ.” Cau hơ̆ lơh cau gơnoar hwơr, mơ lơh khai in kong sồt.

³⁸ Gen cau gơnoar hwơr lòt, ơm kơp bơtau tòm gùng, ai chèo pùt mat lơh be ndai.

³⁹ Tòm tŭ bơtau lòt gan, khai driau dờng, mơ đơs mơ cau bơtau lah: “Dĭ gơna bơtau neh geh lik bơh tiah tòmlơh dờng, gen gơs dô nă cau ling cèng dô nă cau tus hơ añ mơ đơs lah: ‘Sền gàr tĕ cau do; dilah khai neh klàs, gen bơta kis mê rơp ala bơta kis khai, hala mê pal tơm dô talơng priă.’

⁴⁰ Mơya, tòm tŭ dĭ gơna bơtau giga broă tềng do tềng dă, gen khai neh dô.” Bơtau Israel ho lah: “Hơ̆ la bơta cahrña mê dê; să tòm mê neh lơh nền bơta hơ̆ rau.”

⁴¹ Gen sơrbac sơrbang khai pò chèo pùt di mat, bơtau Israel đal git khai la dô nă cau tòm mpồl ală cau gơnoar hwơr.

⁴² Gen cau gơnoar hwơr đơs lah: “Yàng Jehôwa đơs be do: ‘Tài bơh mê neh tơngklàs bơh tê mê dô nă cau Añ neh lơh nền pal tơnroh, behơ̆ tàng bơta kis mê rơp ala bơta kis khai, mơ làng bol mê dê ala làng bol khai dê.’”

⁴³ Gen bơtau Israel rê wơl hơ gơlang tòm Samari, ai lơh moat jrùng mơ gơhào gơjrañ.