I Ală Bơtau 2 - Sră Goh 2018

Dabit nting sồr Salômôn

¹ Tòm tŭ ngai chơt Dabit dê neh rềp, khai nting sồr Salômôn kòn klau khai in lah:

² “Añ mòr lòt tòm gùng jơh kòn mơnus pal lòt. Lơh tĕ pràn kơldang, lơh khin cha tĕ!

³ Prap gàr tĕ ală bơta Jehôwa Yàng Tom Trồ kòn dê neh sồr, lòt tĕ tòm gùng dà Kơnràñ dê, prap gàr ală bơta lơh nền mơ jơnau sồr Kơnràñ dê, bơta sồr lam mơ cơng tàng Kơnràñ dê, be neh cih tòm bơta Boh lam Môise dê, tồ kòn in geh bơtoah bơtoài tòm jơh ală bơta kòn lơh mơ tòm jơh ală tiah kòn lòt,

⁴ gen Yàng Jehôwa rơp lơh gơlik gơs jơnau Kơnràñ neh ho mơ añ lah: ‘Dilah ală kòn sau mê dê git kơrhia tòm gùng dà bol khai dê, dilah bol khai jơh nùs jơh hwềng lơh lòt dô bă dòn song di đap Añ, gen mê rơp ò siơ̆u dô nă cau pơrdòn hơđang sơbàn Israel dê.’

⁵ Rlau mơ hơ̆ tai, kòn git ñchi bơta Jôap kòn klau Jeruya neh lơh di añ, mbe khai neh lơh di bàr nă cau kwang at bồ ling Israel dê, la Apner kòn klau Ner, mơ Amasa kòn klau Jether. Khai la cau tơnchơt cau, sal tê tòm tŭ gơs ring lơngai, bơh mhàm neh gơhòr tòm bơta kơlìn gơtoă, mơ lơh mhàm bơta kơlìn gơtoă gơđềt di che kơt but mơ di khŏ di jơng khai dê.

⁶ Gen tàng lơh tĕ di khai jat bơta jak chài kòn dê, mơya bañ lòi bồ kra sŏ kò khai dê mù lơngap lơngai tòm bơtô ƀồc.

⁷ Lơh tĕ bơta niam lơnhơn gơwèt hơ ală kòn klau Barjilai cau Galaat, mơ ai bol khai in nggui digùl ală cau sa di cơnòng sa bal mơ kòn. Bơh bol khai neh dòn song mơ añ tòm tŭ añ ntoat dô bơh di Apsalôm bi kòn dê.

⁸ Kung gơs Simei kòn klau Gera, cau Benjamin bơh di Bahurim la cau neh srat rma añ iơh rmơh ngan tòm ngai añ lòt tus hơ Mahanaim. Mơya tòm tŭ khai mù wă rò añ di gah Jordan, añ neh ai sơnđan Yàng Jehôwa mơ srat să ho mơ khai lah: ‘Añ rơp ò tơnchơt mê mơ đào.’

⁹ Mơya tŭ do, bañ kòp khai be cau ò gơs glài, bơh kòn la dô nă cau jak chài, kòn rơp git mbe pal lơh di khai, mơ kòn pal tơmù tĕ bồ kra sŏ kò khai dê gơđềt mhàm tòm lơgar làng ƀồc.”

Bơta chơt Dabit dê

¹⁰ Gen Dabit bic mơ ồng pàng khai dê, mơ geh tơp tòm ƀòn dờng Dabit.

¹¹ Dabit neh at bồ poan jơt nam: hơđang Israel, khai at bồ poh nam tòm Hebrôn mơ pe jơt nam tòm Jerusalem.

¹² Behơ̆ Salômôn nggui hơđang sơbàn Dabit bèp khai dê, mơ lơgar bơtau at bồ khai dê geh bơt bơtào kơ̆ cê ngan.

Sơbàn bơtau Salômôn dê geh bơt bơtào kơ̆

¹³ Gen Adônija kòn klau Hagit, neh lòt tus hơ Batseba, mè Salômôn dê. Batseba lùp khai lah: “Mê tus tòm bơta lơngap lơngai sơl?” Khai ho lah: “Ơi, lơngap lơngai.”

¹⁴ Khai đơs tai lah: “Añ gơs dô jơnau kòñ đơs mơ mò.” Mò ho lah: “Mê đơs tĕ!”

¹⁵ Khai đơs lah: “Mò neh git la lơgar gơrê mơ añ. Jơh Israel kơp kòñ gŏ añ gơs bơtau at bồ. Mơya ală bơta neh gơtòmgơl, lơgar neh gơrê hơ oh añ, mơ bơta hơ̆ neh tus bơh di Yàng Jehôwa.

¹⁶ Tŭ do, añ gơs dô bơta dan mơ mò, dan mò bañ sang lòi añ.” Mò đơs lah: “Mê dan tĕ.”

¹⁷ Khai đơs pơnjat tai lah: “Dan mò đơs mơ bơtau Salômôn, bơh khai rơp ò pơndang sang bơta mò dan, ai añ in Abisak cau Sunem lơh gơs bau ùr añ jê.”

¹⁸ Batseba ho lah: “Niam ngan, añ rơp đơs mơ cau bơtau ala mê in.”

¹⁹ Behơ̆ Batseba lòt tus hơ Bơtau Salômôn nàng đơs mơ khai ala Adônija in, cau bơtau ñă ntào wă rò mò, kun khoai mò; gen khai nggui wơl hơđang sơbàn khai dê. Khai sồr cèng dô nơm sơbàn mè bơtau in, mơ mò nggui đah ma bơtau dê.

²⁰ Mò đơs mơ bơtau lah: “Añ gơs dô jơnau bă liă kòñ dan mơ kòn, dan kòn bañ sang lòi.” Bơtau ho lah: “Ơ mè! Dan đơs tĕ; añ ò sang lòi bơta lơi mơ mè.”

²¹ Behơ̆ mò đơs lah: “Ai tĕ Abisak cau Sunem, bau mơ Adônija bi kòn dê.”

²² Bơtau Salômôn ho wơl mơ mè khai dê lah: “Ñchi bơh tài mè dan ai Abisak cau Sunem Adônija in taih? Dan tĕ tơn lơgar ai khai in bơh khai la bi añ jê; ò di mìng dan khai in lơm, mơya kung dan tĕ Abiatha la cau gơnoar ơn phan duh khoai, mơ Jôap la kòn klau Jeruya dê!”

²³ Gen Bơtau Salômôn ai sơnđan Yàng Jehôwa mơ srat să đơs nền lah: “Dan Yàng Tom Trồ lơh glài añ dô bă kơnjơ̆ rlau jơh, dilah Adônija ò kong chơt tài bơh jơnau khai dan!

²⁴ Gen tàng tŭ do, kung be Yàng Jehôwa kis sùm, la Bơtau neh bơtào añ kơ̆ cê hơđang sơbàn bèp añ jê la Dabit, mơ neh bơt añ in dô nơm hìu tòm toh jat be Kơnràñ neh ho, gen Adônija rơp kong tơnchơt tòm ngai do!”

²⁵ Behơ̆ Bơtau Salômôn sồr Benayah kòn klau Jehôyada, mơ khai tơnchơt Adônija.

²⁶ Gơwèt hơ cau gơnoar ơn phan duh khoai Abiatha, cau bơtau đơs lah: “Rê wơl tĕ hơ sre brê mê dê tòm Anatôt. Mê di pal kong chơt, mơya añ rơp ò tơnchơt mê tòm ngai do tài bơh mê neh tùng Đài Bơta Ho Bal Jehôwa Yàng Tom Trồ di đap Dabit bèp añ jê, mơ neh kong jơh ală bơta bòl glar bal mơ bèp añ jê.”

²⁷ Behơ̆, Salômôn tă gơnoar cau ơn phan duh khoai Yàng Jehôwa dê bơh di Abiatha, lơh gơlik di ngan be jơnau Yàng Jehôwa neh đơs bơh hìu Heli tòm Silô.

²⁸ Tòm tŭ cau yal ală bơta hơ̆ mơ Jôap la cau neh jat đah Adônija bulah ò jat đah Apsalôm, gen khai dô tus hơ Sàl duh khoai Yàng Jehôwa dê, mơ sơmbat at ală ngke cơnòng duh khoai dê.

²⁹ Tòm tŭ jơnau hơ̆ geh yal mơ bơtau Salômôn lah: “Jôap neh dô tus hơ Sàl Yàng Jehôwa dê, mơ tŭ do khai ntào di gah cơnòng duh khoai.” Gen Salômôn ai jơnau sồr Benayah kòn klau Jehôyada lah: “Lòt tơnchơt tĕ khai!”

³⁰ Behơ̆ Benayah mut tòm Sàl Yàng Jehôwa dê mơ đơs mơ Jôap lah: “Cau bơtau đơs lah: ‘Lik tĕ bơh tềng hơ̆.’” Mơya Jôap ho lah: “Ò, añ rơp chơt tềng do.” Benayah yal wơl bơtau in, mơ đơs lah: “Jôap neh ho wơl mơ añ behơ̆.”

³¹ Gen cau bơtau ai jơnau sồr Benayah lah: “Lơh tĕ jat be jơnau khai đơs. Tơnchơt mơ tơp tĕ khai; lơh behơ̆ nàng tă tơlik bơh di añ mơ bơh di hìu bèp añ jê glài bơh mhàm ò gơs glài mơ Jôap neh lơh gơhòr ò bồ.

³² Yàng Jehôwa rơp tơm wơl hơđang bồ khai mhàm khai neh lơh gơhòr, tài bơh bèp añ la Dabit ò git, khai neh brồ lơh mơ sreh tơnchơt bàr nă cau niam rlau mơ song ring rlau mơ khai, hơ̆ la Apner, kòn klau Ner dê, kwang dờng at bồ mpồl ling Israel dê, mơ Amasa kòn klau Jether, kwang dờng at bồ mpồl ling Juda dê.

³³ Behơ̆ bơh mhàm bàr nă cau hơ̆ pal tơm wơl hơđang bồ Jôap bal mơ jơi bơtiàn khai dê jơl sùm sùm. Mơya đah mơ Dabit mơ jơi bơtiàn khai dê, hìu khai mơ sơbàn khai dê rơp geh bơta lơngap lơngai bơh Yàng Jehôwa gam sùm sùm.”

³⁴ Gen Benayah kòn klau Jehôyada guh wơl brồ lơh Jôap mơ tơnchơt khai; mơ khai geh tơp tòm ƀòn tòm khai dê rềp ƀlàng ngềt ngơt.

³⁵ Cau bơtau pồ bơtào Benayah kòn klau Jehôyada lơh gơs kwang dờng at bồ mpồl ling ala Jôap, mơ Jadôk lơh gơs cau gơnoar ơn phan duh khoai ala Abiatha.

³⁶ Gen cau bơtau sồr hòi Simei, mơ đơs mơ khai lah: “Bơt tĕ mê in dô nơm hìu tòm Jerusalem, mơ ơm tềng hơ̆; mơya bañ lik lòt tềng do tềng dă.

³⁷ Ngai lơi mê lik bơh hơ̆ mơ lòt gan Thòng Kidrôn, gen git tĕ nền ngan la mê rơp chơt; mhàm mê rơp gơtuh wơl hơđang bồ mê dê.”

³⁸ Simei ho wơl mơ bơtau lah: “Jơnau bơtau đơs hơ̆ la niam. Cau duh broă bơtau dê rơp lơh jat be jơnau cau tòm añ jê la bơtau neh đơs.” Mơ Simei ơm jŏ ngai tòm Jerusalem.

³⁹ Mơya tơnơ̆ mơ pe nam, bàr nă cau dĭ Simei dê dô tus bơtau Akis, kòn klau Maaka, lơgar Gat dê. Cau neh yal Simei in git mơ đơs lah: “Ală cau dĭ ồng dê ơm tòm Gat.”

⁴⁰ Kơno behơ̆, khai kơt ừn alàng khai dê mơ lòt tus hơ Akis tòm Gat nàng jòi ală cau dĭ khai dê. Behơ̆ Simei neh lik lòt mơ cèng brê wơl ală cau dĭ khai dê bơh Gat.

⁴¹ Tòm tŭ cau yal Salômôn in lah Simei neh lik bơh di Jerusalem lòt tus hơ Gat, mơ neh rê wơl,

⁴² gen bơtau sồr hòi Simei tus mơ đơs mơ khai lah: “Añ ò di neh sồr mê ai sơnđan Yàng Jehôwa mơ srat să, mơ neh đơs nền lài mơ mê lah: ‘Tòm ngai lơi mê lik mơ lòt tềng do tềng dă gen mê rơp chơt ò ơ?’ Tŭ hơ̆ mê neh đơs mơ añ lah: ‘Jơnau bơtau đơs la niam ngan. Añ rơp lơh jat.’

⁴³ Behơ̆, ñchi bơh tài mê ò prap gàr jơnau srat să mơ Yàng Jehôwa mơ gơnoar sồr añ neh jào mê in taih?”

⁴⁴ Bơtau kung đơs mơ Simei lah: “Mê git tòm nùs mê dê jơh ală bơta iơh mê neh lơh di Dabit bèp añ. Behơ̆, Yàng Jehôwa rơp sal wơl broă iơh mê dê hơđang bồ mê.

⁴⁵ Mơya bơtau Salômôn rơp geh lơngai, mơ sơbàn Dabit rơp geh bơt bơtào kơ̆ cê di đap Yàng Jehôwa jơl tus sùm sùm.”

⁴⁶ Gen bơtau ai jơnau sồr Benayah kòn klau Jehôyada; gen khai ñă mơ tơnchơt Simei. Behơ̆, lơgar geh bơt bơtào kơ̆ cê tòm tê Salômôn.