I Ală Bơtau 17 - Sră Goh 2018

Cau gơnoar hwơr Eli tòm croh Kerit

¹ Tŭ hơ̆, Eli cau Thisebe, tòm Galaat, đơs mơ Ahap lah: “Añ ntào di đap Jehôwa Yàng Tom Trồ Israel kis sùm mơ srat să lah: Rơp ò gơs dà tŭ hala mìu tòm ală nam tơnơ̆ do, dilah ò gơs jơnau đơs añ jê.”

² Gơs jơnau Yàng Jehôwa tus sồr khai lah:

³ “Lòt tĕ bơh do, wèt hơ đah mattơngai lik, mơ pồn să mê tòm croh Kerit, đah mattơngai lik hiòng Jordan.

⁴ Mê rơp hùc dà bơh croh, mơ Añ rơp sồr ală kơnđà ròng siam mê tềng hơ̆.”

⁵ Behơ̆, Eli lòt, mơ lơh jat be jơnau Yàng Jehôwa dê, khai lòt ơm di croh Kerit, đah mattơngai lik hiòng Jordan.

⁶ Gơs ală kơnđà cèng piang lă mơ poac khai in tòm àng drim mơ tòm mho; mơ khai hùc dà bơh croh.

⁷ Mơya tòm dô êt jŏ, gen croh neh soat dà, tài bơh ò gơs mìu tòm lơgar.

Cau ùr bơnrau tòm Jarepta

⁸ Gen gơs jơnau Yàng Jehôwa dê tus mơ Eli lah:

⁹ “Tŭ do, lòt tus tĕ hơ Jarepta, tiah gơrê bal mơ Sidôn, mơ ơm wơl tềng hơ̆; bơh Añ neh sồr dô nă cau ùr bơnrau tòm ƀòn hơ̆ ròng siam mê.”

¹⁰ Behơ̆, khai ñă lòt tus hơ Jarepta, tòm tŭ khai neh tus di mpồng ƀòn, gơs dô nă cau ùr bơnrau ơm dòñ lòng, gen khai hòi cau ùr hơ̆ mơ đơs lah: “Cèng tĕ añ in dô êt dà tòm gri nàng añ hùc.”

¹¹ Tòm tŭ khai lòt bơ̆ dà, gen Eli hòi khai mơ đơs lah: “Cèng añ in dô pet piang lă sơl.”

¹² Mơya cau ùr ho lah: “Añ sơnio bơta kis Jehôwa Yàng Tom Trồ ồng dê mơ srat să lah, añ ò gơs piang lă, mìng dô sơmbat kơmbuh phe tòm yang mơ dô êt mơñà tòm gri lơm; tŭ do añ dòñ dô êt lòng, gen añ rê hìu rcang piang lă añ mơ kòn klau añ; bol hi sa rau, gen chơt.”

¹³ Eli đơs mơ khai lah: “Bañ rngòt, lòt tĕ lơh be jơnau ai neh đơs; mơya lài ngan lơh tĕ añ in dô pet piang lă dềt, mơ cèng añ in; tơnơ̆ mơ hơ̆ lơh tĕ piang lă ai in mơ kòn klau ai in.”

¹⁴ Bơh Jehôwa Yàng Tom Trồ Israel dê đơs be do: “Kơmbuh rơp ò jơh tòm yang, mơ mơñà rơp ò siơ̆u tòm gri, jơl tus di ngai Yàng Jehôwa sồr mìu dùh hơđang ù.”

¹⁵ Behơ̆ khai lòt mơ lơh jat jơnau be Eli neh đơs. Khai mơ jơh hìu khai, bal mơ Eli sa tòm jŏ ngai.

¹⁶ Kơmbuh ò siơ̆u tòm yang, mơñà ò siơ̆u tòm gri, jat be jơnau Yàng Jehôwa neh đơs bơh di bơr Eli.

¹⁷ Tơnơ̆ dô êt jŏ, kòn klau cau ùr hơ̆ dê, hơ̆ la cau tòm hìu, kòp jê; kòp kơnjơ̆ ngan tian gơs ò gam nhơm tòm khai.

¹⁸ Gen cau ùr đơs mơ Eli lah: “Ơ cau Yàng Tom Trồ dê, ñchi bơta ồng tòmdră mơ añ taih? Ồng neh tus tòm hìu añ nàng tơngkah wơl ală tồi glài añ jê nàng tơnchơt kòn añ sơl?”

¹⁹ Eli đơs mơ khai lah: “Jào tĕ kòn klau ai dê añ in.” Khai kơnđu kòn dềt bơh di tê mè khai dê, cèng khai guh tòm ơdŭ hơđang, la tiah Eli ơm, tơmbic kòn dềt hơđang cơnòng bic khai dê.

²⁰ Gen khai hòi dan mơ Yàng Jehôwa lah: “Ơ Jehôwa Yàng Tom Trồ añ jê! Ñchi bơh tài Kơnràñ tơndùh bơta rung rài hơđang cau ùr bơnrau do, hìu khai la tiah añ ơm ing, mơ tơnchơt kòn klau khai taih?”

²¹ Khai bic hơđang să kòn dềt pe dơ̆, mơ hòi dan tai mơ Jehôwa Yàng Tom Trồ lah: “Ơ Jehôwa Yàng Tom Trồ añ jê! Dan Yàng ai bơta kis kòn dềt do mut wơl tòm să khai.”

²² Gen Yàng Jehôwa dòp jơnau Eli dê; mơ bơta kis kòn dềt rê wơl tòm să khai, mơ khai kis wơl.

²³ Eli kơnđu kòn dềt, cèng khai mù bơh ơdŭ hơđang, mut tòm hìu hơđơm, jào khai mè khai in mơ đơs lah: “Sền do, kòn klau ai dê gam kis.”

²⁴ Gen khai đơs mơ Eli lah: “Tŭ do añ đal git ồng la dô nă cau Yàng Tom Trồ dê, mơ jơnau Yàng Jehôwa dê ơm tòm bơr ồng la song ngan.”