I Ală Bơtau 16 - Sră Goh 2018

Jehu đơs hwơr bơh bơta tơnroh hìu Baesa

¹ Gơs jơnau Yàng Jehôwa đơs mơ Jehu, kòn klau Hanani dê, tòmdră mơ Baesa, lah:

² “Bơh di tŭ Añ neh yò tơngguh mê bơh di thul ơmul mơ bơtào at bồ hơđang làng bol Israel Añ jê, mơ mê neh lòt jat gùng Jerôbôam dê, lơh làng bol Israel Añ in tìs glài, mơ tài bơh tồi glài bol khai, bơrcek Añ gơjrañ.

³ Gen tàng, Añ rơp tơnroh jơh Baesa mơ hìu khai dê, mơ Añ rơp lơh hìu khai dê tòm toh be hìu Jerôbôam, kòn klau Nebat dê.

⁴ Bơh cau lơi gơrê bal mơ Baesa chơt tòm ƀòn dờng so rơp sa, mơ cau lơi chơt tòm ƀlàng sre sềm trồ rơp sa coh.”

⁵ Ală broă ndai Baesa dê, ală broă khai lơh, mơ gơnoar pràn khai, gen neh geh cih tòm sră yal broă kòp nam ală cau bơtau Israel dê.

⁶ Baesa bic lơhă bal mơ ồng pàng khai dê, mơ geh tơp tòm Tirjah. Ela, kòn klau khai, pơrdòn sơbàn khai.

⁷ Rlau mơ hơ̆ tai, jơnau Yàng Jehôwa dê kơnòm di cau gơnoar hwơr Jehu, kòn klau Hanani, đơs jơnau tòmdră mơ Baesa mơ hìu khai, bal mơ bơh ală tồi glài iơh bơsak mơ khai neh lơh di đap Yàng Jehôwa, mơ ală broă lơh bơh tê khai dê neh bơrcek Kơnràñ in gơjrañ kung be hìu Jerôbôam, mơ tài bơh să tòm khai kung neh tơnroh hìu hơ̆.

Ela lơh gơs bơtau hơđang Israel

⁸ Nam dơ̆ bàr jơt prau rài bơtau Asa, tòm Juda; gen Ela, kòn klau Baesa, sơntòm at bồ hơđang Israel tòm Tirjah, khai at bồ bàr sơnam.

⁹ Mơya dĭ gơna khai dê la Jimri, cau kwang ling at bồ nggùl rơndeh tòmlơh khai dê pơrlơ̆ dră di khai. Ela ơm tòm Tirjah ñô sa bơñul tòm hìu Arja, la kwang sền gàr gơlang bơtau tòm Tirjah.

¹⁰ Gen Jimri mut tơnchơt khai, mơ at bồ ala khai, tòm nam dơ̆ bàr jơt poh rài bơtau Asa, tòm Juda.

¹¹ Tòm tŭ Khai sơntòm at bồ mơ nggui hơđang sơbàn khai dê, gen khai tơnchơt jơh hìu Baesa, khai ò lòi wơl dô nă cau klau lơi, tòm gơp jơi hala cau bơyô khai dê.

¹² Jimri tơnroh jơh hìu nhă Baesa la behơ̆, jat be jơnau Yàng Jehôwa neh kơnòm di cau gơnoar hwơr Jehu đơs tòmdră mơ Baesa,

¹³ tài bơh jơh ală tồi glài Baesa mơ Ela kòn klau khai neh tìs, mơ bol khai neh lơh cau Israel in tìs glài, bơrcek Jehôwa Yàng Tom Trồ Israel dê gơjrañ di rùp ràk bol khai dê.

¹⁴ Ală broă ndai Ela dê, mơ ală broă khai lơh, gen neh geh cih tòm sră yal broă kòp nam ală cau bơtau Israel dê.

Jimri lơh gơs bơtau hơđang Israel

¹⁵ Nam dơ̆ bàr jơt poh rài Asa, bơtau Juda, gen Jimri at bồ poh ngai tòm Tirjah. Tŭ hơ̆, mpồl ling Israel sơntơp sàl tòmdră mơ Gibethôn, la ƀòn gơrê bal mơ cau Philistin.

¹⁶ Tòm tŭ mpồl ling tòm sàl kơno yal lah: Jimri neh pơrlơ̆ dră mơ tơnchơt bơtau, gen tàng jơh Israel ơm tòm sàl neh bơtào Ômri, la cau kwang dờng at bồ mpồl ling, lơh bơtau hơđang Israel tòm ngai hơ̆.

¹⁷ Gen Ômri mơ jơh Israel bơh Gibethôn lòt tus nàng gơrwàng Tirjah.

¹⁸ Tòm tŭ Jimri gŏ ƀòn dờng kòl tòmpìt, gen khai mut tòm tiah kơ̆ cê gơlang bơtau dê chu să khai bal mơ gơlang bơtau, mơ chơt,

¹⁹ tài bơh ală tồi glài khai neh tìs, lơh bơta iơh di đap Yàng Jehôwa, lòt jat gùng Jerôbôam dê, mơ glài khai neh tìs, neh lơh Israel in tìs glài.

²⁰ Ală broă ndai Jimri dê, bơta khai neh pơrlơ̆ dră, gen neh cih tòm sră yal broă kòp nam ală cau bơtau Israel dê.

Rài at bồ dơ̆ poan: Ômri at bồ hơđang Israel

²¹ Gen làng bol Israel cah bàr pơnah: nggùl làng bol jat Tipni, kòn klau Ghinat, mơ bơtào khai lơh gơs bơtau; nggùl ne jat Ômri.

²² Mơya làng bol jat Ômri pha rlau mơ làng bol jat Tipni, kòn klau Ghinat. Behơ̆, Tipni chơt mơ Ômri gơs bơtau.

²³ Nam dơ̆ pe jơt dùl rài Asa, bơtau Juda, gen Ômri sơntòm at bồ hơđang Israel, khai at bồ jơt bàr sơnam, tòm hơ̆ prau sơnam tòm Tirjah.

Samari ƀòn dờng pa

²⁴ Khai neh blơi mơnơm tòm Samari bơh Semer bàr talơng priă. Khai bơt bơtào kơ̆ cê mơnơm hơ̆, mơ khai sơnđan ƀòn dờng khai neh bơt la Samari, jat be sơnđan Semer, la cau tòm mơnơm hơ̆ dê.

²⁵ Ômri lơh bơta iơh di đap Yàng Jehôwa, lơh bơta iơh rlau mơ ală cau lài mơ khai.

²⁶ Bơh khai lòt jat gùng Jerôbôam, kòn klau Nebat dê, mơ tòm ală bơta tồi glài khai neh lơh Israel in tìs glài, bơrcek Yàng Jehôwa, Yàng Tom Trồ Israel in gơjrañ bơh ală rùp ràk bol khai dê.

²⁷ Ală bơta ndai Ômri dê, ală broă lơh khai dê, gen neh cih tòm sră yal broă kòp nam ală cau bơtau Israel dê.

²⁸ Ômri bic lơhă bal mơ ồng pàng he dê, mơ geh tơp tòm Samari. Ahap, kòn klau khai, pơrdòn sơbàn khai.

Ahap lơh gơs bơtau Israel

²⁹ Nam dơ̆ pe jơt phàm rài Asa, bơtau Juda; gen Ahap, kòn klau Ômri, sơntòm at bồ hơđang Israel; Ahap kòn klau Ômri at bồ hơđang Israel tòm Samari, bàr jơt bàr sơnam.

³⁰ Ahap, kòn klau Ômri, lơh bơta iơh di đap Yàng Jehôwa rlau mơ jơh ală cau lài mơ khai.

Ahap bau mơ Jesabel mơ duh khoai Baal

³¹ Bơh khai sền dềt rhền khai in nàng lòt tòm tồi glài Jerôbôam, kòn klau Nebat dê, khai lòt bau mơ Jesabel, kòn ùr Etbaal, bơtau cau Sidôn; khai kung lòt duh broă Baal mơ duh khoai gơ.

³² Khai bơt dô nơm cơnòng duh khoai Baal in tòm hìu duh khoai Baal dê tòm Samari.

³³ Ahap kung bơt bơtào dô nơm jrong duh khoai Astarte. Behơ̆, Ahap lơh oă bơta iơh, bơrcek bơta gơjrañ Jehôwa Yàng Tom Trồ Israel dê rlau mơ ală bơtau tòm Israel lài mơ khai.

³⁴ Tòm rài khai, Hiel ơm tòm Betel, bơt bơtào wơl theng Jerikô. Khai bơt mơnàng gen chơt Abiram, kòn klau tơnhoa khai dê, tŭ khai bơtào ală mpồng ƀòn gen chơt Segup, kòn put khai dê, jat be jơnau Yàng Jehôwa neh kơnòm di Jôsue, kòn klau Nun dê, neh yal tơlik.