I Ală Bơtau 13 - Sră Goh 2018

Dô nă cau Yàng Tom Trồ dê bơh Juda

¹ Tòm tŭ Jerôbôam ntào rềp di cơnòng duh khoai, nàng chu kơlhô, gơs dô nă cau Yàng Tom Trồ dê bơh Juda, jat jơnau Yàng Jehôwa lòt tus hơ Betel,

² mơ yal tơnggit tòmdră mơ cơnòng duh khoai jat jơnau Yàng Jehôwa dê, mơ đơs lah: “Ơ cơnòng duh khoai, cơnòng duh khoai! Yàng Jehôwa đơs be do: ‘Dô nă kòn klau rơp deh hìu Dabit in, sơnđan la Jôsia, mơ khai rơp ơn pơdơng ală cau gơnoar ơn duh khoai ală tiah jơnhoa dê hơđang mê, la cau chu kơlhô hơđang mê, mơ cau rơp chu ntìng cau chơt dê hơđang mê.’”

³ Kung tòm ngai hơ̆, khai ai dô nơm tềl krơi, mơ đơs lah: “Do la tềl krơi mơ Yàng Jehôwa neh đơs: Cơnòng duh khoai rơp tơrlơm, bùh hơđang cơnòng duh khoai rơp gơtuh tòm tiah.”

⁴ Tòm tŭ bơtau kơno jơnau driau tòmdră mơ cơnòng duh khoai tòm Betel, gen Jerôbôam pò tê khai dê bơh di cơnòng duh khoai mơ đơs lah: “Kup tĕ khai.” Mơya tê bơtau pò tòmdră mơ cau gơnoar hwơr gơlik ro, tian gơs ò rgơi tơrkồn wơl tòm să khai.

⁵ Cơnòng duh khoai kung neh tơrlơm, mơ bùh gơtuh bơh di cơnòng duh khoai, jat be tềl krơi mơ cau Yàng Tom Trồ neh yal bơh jơnau Yàng Jehôwa dê.

⁶ Bơtau đơs mơ cau Yàng Tom Trồ lah: “Tŭ do rac dan tĕ nùs niam Jehôwa Yàng Tom Trồ ồng dê mơ hòi dan añ in, nàng tê añ geh gơrê wơl be òs.” Behơ̆ cau Yàng Tom Trồ dê rac dan mơ Yàng Jehôwa, gen tê bơtau gơrê wơl mơ khai, mơ gơlik be lài.

⁷ Gen bơtau đơs mơ cau Yàng Tom Trồ lah: “Rê tĕ hơ gơlang bal mơ añ nàng sa, mơ añ rơp pà mê in dô nơm phan.”

⁸ Mơya cau Yàng Tom Trồ dê đơs mơ bơtau lah: “Dilah bơtau ai añ in nggùl lơgar bơtau dê, añ kung ò lòt bal mơ bơtau, hala añ kung rơp ò sa ƀañ hala hùc dà tòm tiah do sơl;

⁹ bơh añ neh geh jơnau Yàng Jehôwa nting sồr be do, lah: ‘Mê bañ sa ƀañ, bañ hùc dà, hala rê wơl jat gùng mê neh lòt tus.’”

¹⁰ Gen tàng, khai neh lòt gùng ndai, mơ ò rê wơl jat gùng mơ khai neh lòt tus hơ Betel.

¹¹ Tŭ hơ̆, gơs dô nă cau gơnoar hwơr kra tòm Betel. Dô nă kòn klau khai tus yal wơl khai in jơh ală bơta cau Yàng Tom Trồ dê neh lơh ngai hơ̆ tòm Betel mơ ală jơnau khai neh đơs mơ bơtau.

¹² Bèp bol khai đơs mơ bol khai lah: “Cau hơ̆ neh lòt gùng lơi taih?” Ală kòn klau khai sơnio gùng mơ cau Yàng Tom Trồ dê tus bơh Juda neh rê wơl.

¹³ Gen khai đơs mơ ală kòn klau khai lah: “Kơt tĕ ừn alàng añ in.” Gen bol khai kơt ừn alàng, mơ khai hào gơ,

¹⁴ lòt jat cau Yàng Tom Trồ dê, mơ bàn khai ơm nggui hơđơm tòm cha, khai đơs lah: “Mê la cau Yàng Tom Trồ dê neh tus bơh Juda sơl?” Khai ho: “Hơ̆ la añ.”

¹⁵ Gen khai đơs mơ cau Yàng Tom Trồ dê lah: “Tus tĕ tòm hìu añ nàng sào.”

¹⁶ Mơya khai ho wơl lah: “Añ ò rgơi rê wơl mơ ồng, hala mut tòm hìu ồng, hala kung ò sa ƀañ hala hùc dà bal mơ ồng tòm tiah do.”

¹⁷ Bơh gơs jơnau Yàng Jehôwa neh đơs mơ añ lah: “Mê bañ sa ƀañ, hala hùc dà tềng hơ̆ mơ kung bañ rê wơl jat gùng mơ mê neh lòt tus.”

¹⁸ Gen cau hơ̆ đơs tai lah: “Añ kung la dô nă cau gơnoar hwơr be mê, mơ cau gơnrơh Yàng Jehôwa dê neh đơs mơ añ lah: ‘Cèng tĕ khai mut tòm hìu bal mơ mê, nàng khai in sa ƀañ mơ hùc dà.’” Mơya cau hơ̆ đơs pơrlồm khai.

¹⁹ Gen cau Yàng Tom Trồ dê rê wơl bal mơ khai, sa ƀañ mơ hùc dà tòm hìu khai dê.

²⁰ Tòm tŭ bol khai gam nggui sa di cơnòng sa, gơs jơnau Yàng Jehôwa đơs mơ cau gơnoar hwơr neh cèng khai rê wơl;

²¹ mơ khai yal mơ cau Yàng Tom Trồ neh tus bơh Juda lah: “Yàng Jehôwa đơs be do: Tài bơh mê ò dòn jơnau Yàng Jehôwa dê, ò prap gàr gơnoar sồr mơ Yàng Jehôwa neh nting sồr mê,

²² mơya neh rê wơl sa ƀañ hùc dà tiah mơ Yàng Jehôwa neh bơkơ̆u ‘Ò ai sa ƀañ hala hùc dà tềng hơ̆,’ gen ƀồc mê rơp ò geh tơp tòm bơtô ƀồc ồng pàng mê dê.”

²³ Tòm tŭ cau Yàng Tom Trồ dê neh sa ƀañ mơ hùc dà rau, gen bol hơ̆ kơt ừn alàng cau Yàng Tom Trồ in.

²⁴ Gen khai lòt, rò gùng khai tìp dô nơm klìu triă kap khai chơt. Ƀồc khai bic tòm gùng, mơ alàng ntào di gah, mơ klìu triă kung ntào rềp di gah ƀồc sơl.

²⁵ Ală cau lòt gan gŏ ƀồc bic tòm gùng, mơ gơs klìu triă ntào rềp di gah, gen tus tòm ƀòn mơ yal cau gơnoar hwơr kra in,

²⁶ Tòm tŭ cau gơnoar hwơr kra la cau neh cèng cau Yàng Tom Trồ rê bơh tòm gùng, kơno bơta hơ̆ gen đơs lah: “Hơ̆ la cau Yàng Tom Trồ dê neh ò dòn bơr Yàng Jehôwa. Gen tàng Yàng Jehôwa neh jào khai klìu triă in crè tơnchơt, jat be jơnau Yàng Jehôwa neh đơs mơ khai.”

²⁷ Chòp, khai sồr ală kòn klau khai lah: “Kơt tĕ ừn alàng añ in,” gen bol khai kơt ừn alàng.

²⁸ Khai lòt, tìp ƀồc chơt bic tòm gùng, alàng mơ klìu triă ntào di gah. Klìu triă ò sa ƀồc neh chơt mơ kung ò crè poac alàng.

²⁹ Cau gơnoar hwơr hơ̆ yò ƀồc cau Yàng Tom Trồ dê, pơdiang hơđang alàng, cèng rê wơl tòm ƀòn, nàng ñìm ƀồc mơ tơp khai.

³⁰ Khai tơp ƀồc hơ̆ tòm bơtô ƀồc khai, gen ñìm khai in mơ lah: “Nđàc sơngit ngan! Ơ bi!”

³¹ Tơnơ̆ mơ tŭ tơp ƀồc rau, khai đơs mơ ală kòn klau khai lah: “Tŭ lơi añ chơt, ală kòn tơp tĕ añ bal tòm bơtô ƀồc neh tơp cau Yàng Tom Trồ dê, ơn ntìng ƀồc añ rềp di ntìng ƀồc khai.

³² Bơh jơnau đơs mơ khai neh yal tơnggit jat jơnau Yàng Jehôwa tòmdră mơ cơnòng duh khoai tòm Betel mơ tòmdră mơ ală hìu duh khoai rùp ràk tòm ală tiah jơnhoa tòm ală ƀòn Samari, ngan rơp gơlik di ngan.”

³³ Bulah tơnơ̆ mơ ală broă hơ̆, Jerôbôam ò pơrlac sang gùng iơh bơsak khai dê, mơya bơtào wơl ală cau gơnoar ơn phan duh khoai ală tiah jơnhoa in bơh digùl jơh làng bol; cau lơi kòñ lơh, gen khai ơn is nàng lơh gơs cau ơn phan duh khoai ală tiah jơnhoa in.

³⁴ Bơh broă hơ̆ tàng neh gơlik gơs bơta tồi glài hìu Jerôbôam dê, gen tàng neh kong koh sang mơ kong tơnroh bơh hơđang ù.