I Ală Bơtau 12 - Sră Goh 2018

Jơt jơi bơtiàn cah is: Ală cau bơtau Juda mơ ală bơtau Israel ( 12:1 – 22:54 ) Ală jơi bơtiàn Đah Đang cah bơh hìu Dabit

¹ Rôbôam lòt hơ Sicem; bơh jơh Israel neh tus tòm Sicem nàng bơtào khai lơh bơtau.

² Tòm tŭ Jerôbôam, kòn klau Nebat kơno bơta hơ̆, (bơh khai gam ơm tòm Ejiptơ, tiah khai neh dô bơh bơtau Salômôn). Gen Jerôbôam rê wơl bơh Ejiptơ.

³ Mơ bol khai sồr cau lòt hòi khai; Jerôbôam bal mơ jơh mpồl jơnum Israel lòt tus đơs mơ Rôbôam lah:

⁴ “Bèp bơtau dê neh lơh yô bol hi in kơnjơ̆ ngan; gen tàng tŭ do dan bơtau lơh nggòc bơta duh broă bòl glar mơ yô kơnjơ̆ bèp bơtau neh ơn hơđang bol hi, gen bol hi rơp duh broă bơtau.”

⁵ Khai đơs mơ bol hơ̆ lah: “Rê hìu tĕ, tòm pe ngai tai rê wơl mơ añ.” Gen làng bol rê hìu.

⁶ Gen bơtau Rôbôam bơyai mơ ală cau kra neh duh broă Salômôn, bèp khai, tòm tŭ khai gam kis, mơ lah: “Mbe bol mê bơto sơnio añ in pal ho wơl làng bol do in taih?”

⁷ Bol khai ho wơl lah: “Dilah ngai do bơtau lơh be cau dong broă làng bol do, mơ duh broă bol khai, đơs jơnau niam tòm tŭ bơtau ho bol khai, gen bol khai rơp gơs dĭ gơna bơtau sùm sùm.”

⁸ Mơya Rôbôam ò bài iat ală jơnau cri bơyai cau kwang kra dê; mơya bơyai bal mơ ală cau pơnu dờng dô rơh bal mơ khai, mơ tŭ do duh broă di đap khai,

⁹ khai đơs mơ bol hơ̆ lah: “Bol mê bơyai mbe lơi nàng bol he ho wơl làng bol do, bol khai neh đơs mơ añ lah: ‘Lơh nggòc tĕ yô mơ bèp bơtau dê neh ơn hơđang bol hi’?”

¹⁰ Ală cau kơnòm să dờng dô rơh bal mơ khai ho lah: “Bơtau pal đơs be do mơ làng bol do neh đơs mơ bơtau lah: ‘Bèp bơtau dê lơh yô bol hi kơnjơ̆; bơtau pal lơh gơ in nggòc wơl;’ bơtau pal ho wơl bol khai be do: ‘Kòn tê put añ gam dờng rlau mơ but bèp añ jê.

¹¹ Behơ̆, bèp añ neh ơn dô nơm yô kơnjơ̆ bol mê in, añ rơp lơh yô bol mê kơnjơ̆ rlau tai; bèp añ lơh glài bol mê mơ mơng che gơltau, añ rơp lơh glài bol mê mơ diang.’”

¹² Behơ̆, Jerôbôam mơ jơh làng bol lòt tus hơ Rôbôam tòm ngai dơ̆ pe, be bơtau neh sồr lah: “Rê wơl tĕ mơ añ tòm pe ngai tai.”

¹³ Bơtau ho wơl jơnau làng bol dô bă kràñ cê, ò bài iat jơnau bơyai ală cau kwang kra dê,

¹⁴ mơ đơs mơ bol khai jat jơnau cri bơyai ală cau kơnòm să dê, mơ ho wơl lah: “Bèp añ neh lơh yô bol mê dê kơnjơ̆; añ rơp lơh yô bol mê dê kơnjơ̆ rlau tai. Bèp añ neh lơh glài bol mê mơ mơng che gơltau, añ rơp lơh glài bol mê mơ diang.”

¹⁵ Behơ̆, bơtau ò bài iat jơnau làng bol, bơh bơta hơ̆ tus bơh Yàng Jehôwa, nàng lơh tòm toh jơnau Kơnràñ neh kơnòm di Ahijah tòm Silô neh yal Jerôbôam in, kòn Klau Nebat dê.

¹⁶ Tòm tŭ jơh Israel gŏ bơtau ò bài iat jơnau bol khai, gen làng bol đơs mơ bơtau lah: “Bol he gơs pơnah lơi mơ Dabit? Bol he ò gơs sre brê lơi bal mơ kòn klau Jese. Ơ Israel! Rê wơl tĕ hơ sàl he dê. Ơ Dabit! Bơh do mê pal kơrhia hìu mê dê.” Behơ̆ Israel rê wơl hơ ală sàl bol khai dê.

¹⁷ Mơya Rôbôam at bồ hơđang ală cau Israel ơm tòm ală ƀòn Juda dê.

¹⁸ Tòm tŭ Rôbôam sồr Adôram la cau sền gàr ală cau lơh broă tus mơ bol khai; jơh Israel cơm lŭ tơnchơt khai. Bơtau Rôbôam sơrbac sơrbang hào rơndeh, dô rê hơ Jerusalem.

¹⁹ Behơ̆, Israel tòmdră mơ hìu Dabit jơl tus di ngai do.

Bơta at bồ sơnròp: Jerôbôam at bồ hơđang Israel

²⁰ Tòm tŭ cau Israel kơno lah Jerôbôam neh rê wơl, gen sồr cau lòt jà khai tus mơ mpồl jơnum, mơ bơtào khai lơh gơs bơtau hơđang jơh Israel. Ò gơs cau lơi jat hìu Dabit tềng hơ̆, mìng jơi bơtiàn Juda lơm.

²¹ Tòm tŭ Rôbôam tus hơ Jerusalem, khai pơjum jơh ală hìu Juda mơ jơi bơtiàn Benjamin, la dô rhiang phàm jơt rbô nă cau ling jak tòmlơh geh sac rwah, tòmdră mơ hìu Israel nàng ai wơl lơgar rê mơ Rôbôam, kòn klau Salômôn.

²² Mơya jơnau Yàng Tom Trồ tus mơ Semaya, cau Yàng Tom Trồ dê lah:

²³ “Đơs tĕ mơ Rôbôam kòn klau Salômôn, bơtau Juda, bal mơ jơh ală hìu Juda, Benjamin, mơ làng bol gam wơl lah:

²⁴ Yàng Jehôwa đơs be do: ‘Bol mê bañ guh tòmdră mơ oh mi he, la cau Israel. Lòi kòp nă rê hìu, bơh bơta do tus bơh Añ.’” Bol khai iat jơnau Yàng Jehôwa mơ rê hìu wơl jat jơnau sồr Yàng Jehôwa dê.

Rùp kòn kơnrồ Jerôbôam dê

²⁵ Gen Jerôbôam bơt bơtào Sicem hơđang tiah kơh mơnơm Epraim, mơ ơm tơn tềng hơ̆. Khai lik lòt bơh hơ̆ mơ bơt bơtào Phenuel.

²⁶ Tŭ hơ̆, Jerôbôam đơs is tòm nùs lah: “Digơlan tŭ do lơgar rơp rê wơl mơ hìu Dabit.

²⁷ Dilah làng bol do gam guh nàng ơn phan pơdơng tòm hìu duh khoai Yàng Jehôwa dê tòm Jerusalem, gen nùs làng bol do rơp rê wơl mơ cau tòm bol khai dê, la Rôbôam bơtau Juda; bol khai rơp tơnchơt añ mơ rê wơl mơ Rôbôam, bơtau Juda.”

²⁸ Behơ̆, bơtau bơyai lơh bàr nơm rùp kòn kơnrồ mơ màh, khai đơs mơ làng bol lah: “Bol mê guh hơ Jerusalem ngài ngan! Do la ală yàng bol mê, neh cèng bol mê lik bơh lơgar Ejiptơ.”

²⁹ Khai bơtào dô nơm tòm Betel, mơ dô nơm tòm Dan.

³⁰ Bơta do neh gơlik gơs dô bơta tồi glài, bơh làng bol lòt duh khoai di đap kòn kơnrồ tòm Betel mơ lòt tus di đap dô nơm ngài rlau tòm Dan.

³¹ Khai kung bơt hìu hơđang ală tiah jơnhoa, sac rwah cau gơnoar ơn phan duh khoai bơh digùl làng bol, bol khai ò di la jơi bơtiàn Lebi.

³² Khai kung bơtào dô bơta pơjum sa tòm ngai jơt pram kơnhai phàm, be ngai wèr cau òs pơjum tòm lơgar Juda, mơ khai ơn ală phan ơn pơdơng hơđang cơnòng duh khoai. Khai kung lơh behơ̆ tòm Betel, ơn phan ơn duh khoai bàr nơm kơnrồ kòn mơ khai neh lơh gơs; khai kung lòi tòm Betel ală cau ơn phan duh khoai ală tiah jơnhoa mơ khai neh bơt.

³³ Khai guh hơ cơnòng duh khoai mơ khai neh bơt tòm Betel tòm ngai jơt pram kơnhai phàm, hơ̆ la kơnhai khai bơtào is, khai bơtào dô bơta pơjum sa làng bol Israel in, mơ khai guh hơ cơnòng duh khoai nàng chu kơlhô.