I Ală Bơtau 11 - Sră Goh 2018

Bơta tìs Salômôn dê

¹ Bơtau Salômôn kòñ gơboh oă cau ùr làng bol bơdìh bal mơ kòn ùr Pharaôn dê: Cau ùr Môap, Ammôn, Edôm, Sidôn, mơ Hetit.

² Bơh ală làng bol mơ Yàng Jehôwa neh đơs mơ cau Israel lah: “Bol mê mơ bañ lap klau tòmbau ùr mơ bol khai; bol khai kung ò bau mơ bol mê sơl; bơh bol khai rơp tơnwèt nùs bol mê jat ală yàng bol khai dê.” Mơya Salômôn kư̆ mềr gơboh ală cau ùr hơ̆.

³ Khai gơs poh rhiang nă bau ùr, mơ pe rhiang bau cồng; ală bau ùr hơ̆ pơrlac nùs khai lòt tìs gùng.

⁴ Bơh tòm tŭ Salômôn neh kra, ală bau ùr lơh nùs khai wèt hơ ală yàng ndai; Mơ nùs khai ò song mơ Jehôwa Yàng Tom Trồ khai dê, be nùs Dabit bèp khai.

⁵ Bơh Salômôn duh khoai Astarte, yàng ùr cau Sidôn dê, mơ yàng Milkom, la yàng ngkòr ngkàc cau Ammôn dê.

⁶ Behơ̆, Salômôn lơh bơta iơh di đap Yàng Jehôwa, ò wil tơl lòt jat Yàng Jehôwa, be Dabit bèp khai neh lơh.

⁷ Gen Salômôn bơt bơtào dô bă tiah jơnhoa Kemôs in la yàng ngkòr ngkàc cau Môap dê; mơ bơt yàng Molok la yàng ngkòr ngkàc cau Ammôn dê, hơđang mơnơm đah mattơngai lik Jerusalem dê.

⁸ Bơtau lơh behơ̆ mơ jơh ală bau ùr làng bol bơdìh khai in, bol khai chu kơlhô mơ ơn phan ơn ală yàng bol khai in.

⁹ Gen Yàng Jehôwa gơhào gơjrañ di Salômôn, tài bơh nùs khai wèt sang Jehôwa Yàng Tom Trồ Israel dê, la Bơtau neh tơlik mat mơ khai bàr dơ̆,

¹⁰ mơ nting sồr khai lah bañ lòt jat ală yàng ndai; mơya khai ò ơn nùs di gơnoar sồr Yàng Jehôwa dê.

¹¹ Gen tàng Yàng Jehôwa đơs mơ Salômôn lah: “Bơh tŭ mê neh lơh bơta do, ò prap gàr bơta ho bal mơ bơta sồr lam mơ Añ neh sồr mê, ngan Añ rơp crè lơgar bơh di mê, mơ ai gơ cau dĭ gơna mê in.

¹² Mơya tài bơh Dabit, bèp mê, Añ rơp ò lơh bơta hơ̆ tòm rài mê. Añ rơp crè lơgar bơh di tê kòn klau mê.

¹³ Mơya Añ rơp ò tă jơh lơgar; Añ rơp ai dô jơi bơtiàn kòn klau mê in, tài bơh Dabit cau dĭ gơna Añ mơ tài bơh Jerusalem mơ Añ neh sac rwah.”

Cau sò tơm Salômôn dê

¹⁴ Gen Yàng Jehôwa tơngguh dô nă cau sò tơm tòmdră mơ Salômôn la Hadat cau Edôm, khai la cau bơh hìu nhă cau bơtau tòm Edôm.

¹⁵ Tài bơh tòm tŭ Dabit lòt tòmlơh mơ cau Edôm, mơ Jôap kwang at bồ mpồl ling, lòt tơp ală cau chơt, khai neh tơnchơt jơh ală cau klau tòm Edôm.

¹⁶ (Bơh Jôap mơ jơh Israel ơm wơl tềng hơ̆ prau kơnhai, jơl tus di tŭ khai tơnchơt jơh ală cau klau tòm Edôm.)

¹⁷ Mơya Hadat neh ntoat dô hơ lơgar Ejiptơ bal mơ dô êt cau Edôm, la dĭ gơna bèp khai dê; tŭ hơ̆ Hadat gam kơnòm să.

¹⁸ Bol khai lik bơh Midian lòt tus hơ Pharan; bol khai kup cau bơh Pharan lòt bal mơ bol khai tus hơ Ejiptơ, tus hơ Pharaôn, bơtau Ejiptơ. Bơtau ai hìu Hadat in ơm, phan sa mơ ù tiah.

¹⁹ Hadat geh bơta nđàc dờng di đap Pharaôn; gen bơtau ai khai in bau mơ oh ùr Tahpenes bau ùr Pharaôn dê.

²⁰ Oh ùr Tahpenes tơnggơs Hadat in dô nă kòn klau sơnđan la Genubat; Tahpenes ròng siam khai tòm gơlang bơtau Pharaôn. Behơ̆, Genubat ơm tòm gơlang Pharaôn, digùl ală kòn klau bơtau dê.

²¹ Tòm tŭ Hadat ơm tòm Ejiptơ kơno lah Dabit neh chơt rê mơ ồng pàng khai dê rau, mơ Jôap kwang dờng at bồ ling, neh chơt sơl, gen khai đơs mơ Pharaôn lah: “Dan ai añ in rê wơl hơ lơgar añ.”

²² Pharaôn đơs mơ khai lah: “Ñchi phan mê siơ̆u mê ơm mơ añ, mơ tŭ do mê kòñ jòi nàng rê hơ lơgar tòm mê behơ̆ taih?” Khai ho lah: “Ò di, lòi tĕ añ in lòt.”

²³ Yàng Tom Trồ kung tơngguh dô nă cau sò tơm ndai, la Resôn, kòn klau Eliyada, la cau neh dô bơh cau tòm khai la bơtau Hadadejer, tòm Jôba.

²⁴ Gen khai pơjum gùt dar khai ală cau jat khai mơ at bồ dô mpồl cau phà kơñau; tơnơ̆ mơ tŭ Dabit neh tơnchơt bol khai, gen khai lòt tus hơ Damas, ơm wơl tềng hơ̆, mơ khai geh bơtào lơh gơs bơtau tòm Damas.

²⁵ Resôn la cau sò tơm Israel dê jơl jơh rài kis Salômôn, lơh gơprah kung be Hadat neh lơh; khai at bồ lơgar Aram, mơ sòdră di Israel.

²⁶ Jerôbôam, kòn klau Nebat, cau Epraim ơm tòm Jereda, la dĭ gơna Salômôn dê, kung sòdră di khai sơl. Mè khai la ùr bơnrau, sơnđan la Jeruha.

²⁷ Do la kai mơ khai sòdră mơ bơtau: Salômôn bơt bơtào Milô, rcang bồr mơ lềt wơl ală tiah neh bơcah bluh dơrñang ƀòn dờng Dabit dê, la bèp khai.

²⁸ Mơ tai, Jerôbôam la dô nă cau chài rgơi; mơ tòm tŭ Salômôn gŏ cau pơnu hơ̆ tơryang tơryồng ngan, gen ai khai in lơh gơs cau at bồ cau lơh broă bòl glar hìu Jôsep dê.

²⁹ Tŭ hơ̆, Jerôbôam lik bơh Jerusalem, cau gơnoar hwơr Ahijah bơh Silô tìp khai tòm gùng. Ahijah soh dô blah ào jrùh pa; gơs mìng bàr nă ơm tòm ƀlàng sre lơm.

³⁰ Gen Ahijah at di ào pa khai soh tòm să mơ crè gơs jơt bàr pet.

³¹ Gen khai đơs mơ Jerôbôam lah: “Ai tĕ jơt pet mê in, bơh Jehôwa Yàng Tom Trồ Israel dê neh đơs be do: ‘Sền, Añ rơp tă lơgar bơh tê Salômôn mơ jào mê in jơt jơi bơtiàn.

³² Dùl jơi bơtiàn rơp gam wơl mơ khai; tài bơh Dabit dĭ gơna Añ, mơ tài bơh Jerusalem, la ƀòn dờng Añ neh sac rwah bơh di ală jơi bơtiàn Israel dê.

³³ Bơta do la tài bơh khai neh sang lòi Añ, lòt duh khoai Astarte yàng ùr Sidôn dê, Kemôs yàng lơgar Môap dê, mơ Milkôm yàng làng bol Ammôn dê. Khai ò lòt tòm ală gùng dà Añ jê, ò lơh ală bơta song ngan di đap Añ, mơ kung ò prap gàr bơta sồr lam mơ bơta boh lam Añ jê, be Dabit bèp khai neh lơh.

³⁴ Bulah behơ̆, Añ rơp ò tă jơh lơgar bơh di khai, mơya bơtào khai lơh gơs bơtau at bồ jơl jơh rài kis khai dê; tài bơh Dabit cau dĭ gơna Añ neh sac mơ la cau neh prap gàr bơta boh lam mơ bơta sồr lam Añ jê.

³⁵ Mơ Añ rơp tă lơgar bơh di tê kòn klau khai, mơ jào mê in jơt jơi bơtiàn.

³⁶ Mơ Añ rơp lòi wơl kòn klau khai in dô jơi bơtiàn, behơ̆ dĭ gơna Añ la Dabit rgơi gam gơs sùm dô nơm ồs đèng di đap Añ tòm Jerusalem, la ƀòn dờng Añ neh sac rwah nàng ơn sơnđan Añ jê tềng hơ̆.

³⁷ Añ rơp sac mê mơ mê rơp at bồ hơđang jơh jat nùs kòñ mê, mơ mê rơp lơh gơs bơtau hơđang Israel.

³⁸ Dilah mê iat jơh ală gơnoar Añ sồr mê, lòt tòm ală gùng dà Añ, lơh bơta niam di đap Añ, bơh mê prap gàr bơta boh lam mơ bơta sồr lam Añ jê, be Dabit dĭ gơna Añ neh lơh, gen Añ rơp ơm mơ mê, mơ añ rơp bơt bơtào mê in dô nơm hìu kơ̆ cê, be Añ neh bơtào Dabit in, mơ Añ rơp ai Israel mê in.

³⁹ Tài bơh bơta do, Añ rơp lơh glài tơmàl jơi bơtiàn Dabit, mơya ò di sùm sùm.’”

⁴⁰ Gen tàng Salômôn jòi bơta tơnchơt Jerôbôam; mơya Jerôbôam sơrbac sơrbang dô hơ Ejiptơ; tus mơ Sisak bơtau Ejiptơ; khai ơm tòm Ejiptơ jơl tus di tŭ Salômôn chơt.

Salômôn sang rài

⁴¹ Ai ală bơta ndai bơh Salômôn, ală broă khai neh lơh, bơta jak chài khai dê, jơh ală neh cih tòm sră broă lơh Salômôn dê.

⁴² Tŭ Salômôn at bồ tòm Jerusalem hơđang jơh Israel la poan jơt sơnam.

⁴³ Gen Salômôn chơt rê mơ ồng pàng khai dê, mơ geh tơp tòm ƀòn dờng Dabit bèp khai dê. Rôbôam kòn klau khai pơrdòn khai.