II Tesalônika 2 - Sră Goh 2018

Lài mơ tŭ Yàng rê wơl rơp gơs cau sòdră di Yàng

¹ Ơ oh mi, đơs bơh bơta tus wơl Yàng Jesu Krist bol he dê, mơ bơta bol he pơjum tìp bal mơ Kơnràñ, bol hi dan oh mi,

² bañ lòi nùs kơlôi oh mi dê mhar lơnggơr, kung bañ dơrcul bơh hwềng lơi, hala bơh jơnau đơs, hala bơh sră pơyoa lơi gơlơh be bol hi neh pơyoa, mơ đơs lah ngai Yàng dê neh tus rau.

³ Bulah cau ngui bơta lơi kung bañ lòi bol khai pơrlồm oh mi, bơh ngai hơ̆ rơp ò tus jơl tus gơs bơta pơrlơ̆ sang jơnau Yàng tus lài, mơ gơs cau glài dờng, hơ̆ la kòn bơta roh rui rơp geh yal tơlik.

⁴ Khai la cau tòmdră, yò tơngguh is să he hơđang jơh ală bơta lơi cau sơnđan la yàng, hala phan lơi cau duh khoai, tian gơs nggui tòm hìu duh khoai Yàng Tom Trồ dê, mơ sơnđan is să he la Yàng Tom Trồ.

⁵ Oh mi ò kah tòm tŭ añ gam ơm bal mơ oh mi gen neh yal ală bơta hơ̆ oh mi in ò ơ?

⁶ Tŭ do oh mi kung git bơta kơryan khai tồ khai in geh yal tơlik di di tơngai khai dê.

⁷ Bơh cau iơh bơsak ndơp ndơr neh lơh broă rau; mơya tŭ do mìng gam dô Bơtau kơryan lơm, tus di tŭ Bơtau hơ̆ geh tă tơlik.

⁸ Tŭ hơ̆ cau iơh bơsak ne rơp gơyal tơlik, Yàng Jesu rơp ngui nhơm bơr Kơnràñ dê mơ tơnchơt khai, mơ ngui bơta àng gơcrà bơta tus wơl Kơnràñ dê mơ tơnroh khai.

⁹ Khai rơp tus jat broă lơh cà Satan dê, lơh tơl ală bơta gơnap gơnoar, ală bơta krơi, mơ ală tềl is blac chừt,

¹⁰ ngui jơh ală bơta blac pơrlồm ò song ring gơwèt mơ ală cau roh rui, tài bơh bol khai ò bài kòñ gơboh jơnau song nàng geh dong klàs.

¹¹ Tài behơ̆ mơ Yàng Tom Trồ jào phi bol khai tòm bơta bơto tìs nrah, nàng lơh bol khai dòn bơta ma blac,

¹² tồ lơh nền glài jơh ală cau ò dòn jơnau song, mơ hòn chò tòm bơta ò song ring.

Geh hòi sac tus hơ bơta dong klàs

¹³ Ơ oh mi kòñ gơboh Yàng dê, bol hi pal bơh oh mi mơ ưnngài Yàng Tom Trồ sùm sùm tài bơh Yàng Tom Trồ neh sac rwah oh mi, bơh sơnròp nàng oh mi geh dong klàs tòm bơta gơlik gơs sàng goh bơh Yàng Hwềng mơ bơh bơta dòn jơnau song.

¹⁴ Kơnràñ kung ngui Jơnau Niam mơ bol he bơto yal mơ hòi oh mi tus hơ bơta hơ̆, nàng oh mi in dòp geh bơta gơklŏ Yàng Jesu Krist bol he dê.

¹⁵ Behơ̆ tàng, ơ oh mi, ơm kơ̆ tĕ, prap gàr kơ̆ tĕ ală jơnau bol hi neh bơto sồr oh mi in, ƀà mơ jơnau đơs, ƀà mơ sră pơyoa bol hi dê.

¹⁶ Dan să tòm Yàng Jesu Krist mơ Yàng Tom Trồ la Bèp bol he dê, la Bơtau neh kòñ gơboh di bol he mơ bơh bơta nđàc Kơnràñ dê neh ai gòi bol he in bơta pơndòm pơniang gam sùm sùm, mơ bơta gơn kơnòm kơ̆ nền,

¹⁷ pơndòm pơniang nùs oh mi dê, lơh oh mi in gơs kơ̆ nền tòm jơh ală broă niam mơ jơnau đơs niam.