II Tesalônika 1 - Sră Goh 2018

Jơnau còp să

¹ Pol, Silbanus mơ Timôthe pơyoa Hìu Jum Goh cau Tesalônika in tòm Yàng Tom Trồ la Bèp bol he dê, mơ tòm Yàng Jesu Krist:

² Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp mơ bơh Yàng Jesu Krist!

Bơta cahrña tòm ngai Bơtau Krist tus

³ Ơ oh mi, bol hi pal bơh oh mi mơ ưnngài Yàng Tom Trồ sùm sùm, mơ bơta hơ̆ la pal ngan, bơh bơta dòn oh mi dê gơbơtơl oă ngan, mơ nùs kòñ gơboh bal mơ gơp kòp nă cau dê tòm jơh ală oh mi sơlo ngai sơlo bơtơl tai,

⁴ tian gơs să tòm bol hi kung bơh oh mi mơ jòng să tòm ală Hìu Jum Goh Yàng Tom Trồ dê, bơh bơta ơt ơl mơ bơta dòn oh mi dê tòm jơh ală bơta kup kơryan mơ bơta jê sồt bòl glar mơ oh mi gam kong.

⁵ Hơ̆ la cơng tàng loh làng bơh bơta cahrña song ring Yàng Tom Trồ dê, nàng oh mi in geh kòp la di pal ngan mơ lơgar Yàng Tom Trồ, kung bơh lơgar hơ̆ mơ oh mi gam kong bòl glar.

⁶ Bơh dilah bơta song ring Yàng Tom Trồ dê la ai bơta jê sồt bòl glar sal tê ală cau neh lơh jê sồt bòl glar di oh mi,

⁷ gen Kơnràñ ngan rơp ai oh mi in la cau kong jê sồt bòl glar geh rlô bal mơ bol hi, tòm tŭ Yàng Jesu bơh đang trồ tơlik mat bal mơ ală cau gơnrơh bềng gơnoar pràn Kơnràñ dê digùl lơmpiat ồs hơng,

⁸ nàng lơh glài ală cau ò dòp git Yàng Tom Trồ, mơ cau ò dòn jat Jơnau Niam Yàng Jesu bol he dê.

⁹ Bol khai rơp kòl lơh glài jàm roh rui sùm sùm ngài bơh di mat Yàng mơ bơh di bơta gơklŏ gơnoar pràn Kơnràñ dê,

¹⁰ tòm tŭ Kơnràñ tus tòm ngai hơ̆ nàng tơlik să gơklŏ digùl ală cau sàng goh Kơnràñ dê, mơ geh jơh ală cau dòn jat jòng ro, tài bơh oh mi neh dòn jơnau bol hi lơh cơng oh mi in rau.

¹¹ Gen tàng bol hi hòi dan mơ Yàng oh mi in sùm sùm, dan Yàng Tom Trồ bol he dê kòp oh mi la di pal ngan mơ bơta hòi sac Kơnràñ dê, mơ ai gơnap gơnoar lơh wil tơl tòm oh mi kòp bơta kơp kòñ niam mơ broă lơh bơta dòn dê,

¹² tồ lơh gơklŏ àng sơnđan Yàng Jesu bol he dê tòm oh mi, mơ oh mi tòm Kơnràñ, jat be bơta nđàc Yàng Tom Trồ dê mơ Yàng Jesu Krist bol he dê.