II Samuel 24 - Sră Goh 2018

Dabit kòp khà làng bol

¹ Dô dơ̆ tai, bơta gơjrañ Yàng Jehôwa dê hìt tòmdră mơ Israel. Kơnràñ chồl nùs Dabit tòmdră mơ bol khai, mơ đơs lah: “Lòt tĕ kòp khà làng bol Israel mơ Juda.”

² Behơ̆ bơtau đơs mơ Jôap mơ ală cau kwang at bồ mpồl ling ơm bal mơ khai lah: “Lòt tĕ làm jơh ală jơi bơtiàn Israel, bơh Dan tus Beerseba, mơ kòp khà làng bol, nàng añ in git gơs nđò.”

³ Mơya Jôap ho wơl mơ bơtau lah: “Dan Jehôwa Yàng Tom Trồ bơtau dê lơh làng bol bơtau in geh gơbơtơl dô rhiang dơ̆ oă rlau tòm tŭ mat cau tòm añ jê la bơtau gam rgơi gŏ bơta hơ̆. Mơya ñchi bơh tài cau tòm añ jê la bơtau kòñ lơh dô bơta do taih?”

⁴ Mơya jơnau đơs bơtau dê tòmdră pha rlau mơ Jôap mơ ală cau kwang at bồ ling. Behơ̆, Jôap mơ ală cau kwang ling lik lòt bơh di đap cau bơtau nàng kòp khà làng bol Israel.

⁵ Bol khai tiă gan hiòng Jordan rau, mơ sơntòm bơh Arôer mơ bơh ƀòn dờng ơm digùl tòm thòng, guh hơ đah Gat mơ tus hơ Jajer.

⁶ Gen bol khai neh lòt tus hơ Gilelat mơ tus hơ Kades tòm ù tiah cau Het, mơ bol khai tus hơ Dan Jaan mơ lòt gùt dar tus hơ Sidôn,

⁷ mơ lòt tus hơ theng kơ̆ cê Tirơ dê mơ tus hơ jơh ală ƀòn dờng cau Het mơ cau Kanaan. Lồi tơnơ̆ bol khai neh lòt tus hơ Negep tiah Juda tòm Beerseba.

⁸ Behơ̆ tòm tŭ bol khai neh lòt làm lơgar, bol khai neh rê wơl hơ Jerusalem tơnơ̆ mơ sin kơnhai bàr jơt ngai.

⁹ Jôap yal wơl cau bơtau in ntum khà ală cau neh kòp: tòm Israel gơs phàm rhiang rbô nă cau klau rgơi at đào tòmlơh, mơ tòm Juda pram rhiang rbô nă.

Bơta cahrña hơđang glài Dabit dê

¹⁰ Tơnơ̆ mơ tŭ neh sir cih khà làng bol, Dabit gơkòl nùs nhơm lah pơrhơng, gen khai đơs mơ Yàng Jehôwa lah: “Añ neh tìs glài kơnjơ̆ tòm bơta añ neh lơh. Khoai Yàng Jehôwa, tŭ do añ rac dan Kơnràñ tă tơlik bơta tồi glài cau duh broă Kơnràñ dê. Añ neh lơh dô bơta bơrngơl gơla ngan.”

¹¹ Àng drim ngai hìng tòm tŭ Dabit bic, gơs jơnau Yàng Jehôwa đơs mơ Gat la cau gơnoar hwơr Dabit dê lah:

¹² “Lòt tĕ mơ đơs mơ Dabit lah: ‘Yàng Jehôwa đơs be do: “Añ ai mê in pe bơta nàng sac rwah. Sac tĕ dô bơta mơ Añ rơp ngui nàng lơh glài mê.”’”

¹³ Behơ̆ Gat neh lòt tus hơ Dabit mơ đơs mơ khai lah: “Rơp gơlik gơs hơđang bơtau poh nam jơgloh rung tòm lơgar, hala pe kơnhai bơtau pal ntoat dô di đap cau sò tơm ting jat, hala pe ngai pluh plàng tòm lơgar bơtau dê. Behơ̆ tŭ do kơlôi sơnơng tĕ mơ lơh nền bơta añ pal ho wơl mơ Bơtau neh sồr añ lòt tus.”

¹⁴ Dabit đơs mơ Gat lah: “Añ ơm tòm bơta bòl glar moat jrùng dờng ngan! Lòi tĕ bol he dùh tòm tê Yàng Jehôwa bơh bơta kòñ nđàc Kơnràñ dê la dờng ngan; mơya bañ lòi añ dùh tòm tê kòn mơnus.”

¹⁵ Behơ̆, Yàng Jehôwa đùh bơta pluh plàng hơđang Israel bơh àng drim ngai hơ̆ jơl tus di tŭ lồi dut tơngai neh lơh nền, mơ poh jơt rbô nă cau chơt bơh Dan tus hơ Beerseba.

¹⁶ Tòm tŭ cau gơnrơh pò tê nàng tơnroh Jerusalem, Yàng Jehôwa moat jrùng bơh bơta rung rài hơ̆, gen đơs mơ cau gơnrơh lơh tơnroh làng bol lah: “Tơl rau! Dơh wơl tĕ tê mê dê.” Tŭ hơ̆ cau gơnrơh Yàng Jehôwa dê ơm di làn jă kòi Arauna, cau Jebusit dê.

¹⁷ Tòm tŭ Dabit gŏ cau gơnrơh tơnroh làng bol, gen đơs mơ Yàng Jehôwa lah: “Mìng dô nă añ la cau neh tìs glài, mơ mìng dô nă añ la cau neh lơh bơta iơh bơsak; mơya jơh ală belàt do, ñchi bol khai neh lơh? Añ hòi dan tê Yàng dê, tòmdră mơ añ mơ hìu bèp añ jê.”

Cơnòng duh khoai Dabit dê tòm làn jă kòi

¹⁸ Tòm ngai hơ̆ Gat lòt tus hơ Dabit mơ đơs lah: “Guh tĕ mơ bơt dô nơm cơnòng duh khoai Yàng Jehôwa in tòm làn jă kòi Arauna dê, cau Jebusit.”

¹⁹ Behơ̆ Dabit lơh jat be jơnau Yàng Jehôwa neh sồr Gat đơs mơ khai.

²⁰ Tòm tŭ Arauna sền, khai gŏ cau bơtau mơ ală cau duh broă bơtau lòt tus, gen khai lik lòt mơ cùn khoai blup mat tòm ù di đap cau bơtau.

²¹ Arauna đơs lah: “Ñchi bơh tài bơtau añ jê lòt tus hơ cau dĭ gơna bơtau dê taih?” Dabit ho lah: “Nàng blơi làn jă kòi mê dê, nàng añ rgơi bơt dô nơm cơnòng duh khoai Yàng Jehôwa in tồ bơta rung rài hơđang làng bol gơ rơp ơm dơh wơl.”

²² Gen Arauna đơs mơ Dabit lah: “Dan cau tòm añ jê la bơtau ai tĕ phan lơi mơ ơn pơdơng ală phan lơi bơtau gŏ la niam; do la ală kơnrồ ngui lơh gơs phan ơn chu pơrguc, mơ do la ală phan ngui pơrjă kòi bal mơ ală yô ngui lơh gơs lòng nàng chu ală phan ơn.

²³ Ơ bơtau! Arauna dan ơn jơh ală phan do bơtau in.” Mơ Arauna kung đơs mơ bơtau lah: “Dan Jehôwa Yàng Tom Trồ bơtau dê niam nùs dòp rò bơtau!”

²⁴ Mơya bơtau ho wơl mơ Arauna lah: “Ò, añ rơp ai jền nàng blơi jơh ală phan hơ̆ bơh mê. Añ rơp ò ơn Jehôwa Yàng Tom Trồ añ jê phan ơn chu pơrguc mơ ò roh jền blơi.” Behơ̆ Dabit blơi làn jă kòi mơ ală kơnrồ mơ tơm pram jơt sieklơ priă.

²⁵ Dabit bơt bơtào tềng hơ̆ dô nơm cơnòng duh khoai Yàng Jehôwa in, mơ ơn ală phan ơn chu pơrguc bal mơ ală phan ơn bơta ring lơngai. Gen Yàng Jehôwa ho wơl jơnau hòi dan lơgar in, mơ bơta rung rài hơđang Israel gơ ơm dơh wơl.