II Kôrintô 11 - Sră Goh 2018

Pol mơ ală cau gơnoar bơto ma blac

¹ Añ kơp kòñ oh mi kong bal mơ añ dô êt bơta tùl gơla! Ngan oh mi pal kong bal mơ añ.

² Bơh añ ai nùs ƀoah pơrñat Yàng Tom Trồ dê mơ pơrñat oh mi, bơh añ neh lap oh mi mơ dô nă bau klau nàng tơlik mat oh mi Bơtau Krist in be dô nă cau ơruh sàng goh.

³ Mơya añ rngòt lah, nùs oh mi roh bơta song ngan mơ bơta sàng goh gơwèt mơ Bơtau Krist, kung be yau òr bơs neh ngui kai lac lèo mơ pơrlồm Eba behơ̆ sơl.

⁴ Bơh oh mi neh chò nùs kong dòp, dilah gơs cau lơi lòt tus bơto yal oh mi in dô nă Jesu ndai krơi is mơ Yàng Jesu bol hi neh bơto yal, mơ oh mi neh dòp dô nơm hwềng mơ jơnau niam ndai krơi is mơ Yàng Hwềng mơ Jơnau Niam oh mi neh dòp bơh bol hi.

⁵ Mơya añ kơlôi lah añ ò di gơhuc mơ ală cau gơnoar bơto dờng màng ryŭ hơ̆ dô êt lơi.

⁶ Bulah jơnau đơs añ jê sền be ò jak, mơya bơta git jak añ jê ò di behơ̆: Gơpơrlơ̆ wơl, bol hi neh yal bơta hơ̆ oh mi in tòm jơh ală broă mơ jơh ală bơta.

⁷ Añ neh bơto yal Jơnau Niam Yàng Tom Trồ oh mi in ò dan bơta lơi, tơnliah is să he tồ oh mi in geh yò tơngguh, gen añ gơs glài sơl ơ?

⁸ Añ neh dòp jền tơngai oă rlau bơh ală Hìu Jum Goh ndai, nàng duh broă oh mi in.

⁹ Tòm tŭ añ ơm mơ oh mi, dơ̆ tìp bơta siơ̆u siar, gen ò lơh pơnjê di cau lơi ò; bơh ală oh mi ơm tòm Masedoan lòt tus mơ neh dong tơl tòm bơta pal càng añ jê. Tòm jơh ală broă, añ neh kơrmap gàr să añ tồ ò lơh pơnjê di oh mi; añ kung rơp kư̆ kơrmap gàr să añ behơ̆ sùm.

¹⁰ Añ ai bơta song ngan Bơtau Krist dê ơm tòm añ mơ ho nền lah, tòm kơnhwàl Acai ò gơs cau lơi geh lềt bơr añ jòng să bơh bơta do.

¹¹ Ñchi bơh tài añ đơs behơ̆ taih? Tài bơh añ ò kòñ gơboh di oh mi sơl ơ? Neh gơs Yàng Tom Trồ git!

¹² Bơta añ lơh gen añ kư̆ lơh tai, nàng tă sang kai gơrmơ̆i bơh di cau jòi kai jòng să lah, bol khai ndròm mơ bol hi.

¹³ Bơh ală cau hơ̆ la cau gơnoar bơto ma blac, la cau lơh broă pơrlồm, lơh tànggơ be cau gơnoar bơto dờng Bơtau Krist.

¹⁴ Ò gơkrơi dô êt lơi, tian gơs să tòm cà Satan kung lơh tànggơ be cau gơnrơh bơta àng.

¹⁵ Behơ̆ dilah ală cau duh broă gơ dê lơh tànggơ be cau duh broă bơta song ring, gen kung ò gơkrơi sơl; bơta lồi dut bol khai dê rơp dòp cồng nha jat be broă lơh bol khai dê.

Broă lơh mơ bơta jê sồt Pol dê

¹⁶ Añ đơs tai lah: bañ gơs cau lơi sền añ be cau tùl gơla; dilah gơs behơ̆ gen kung pal dòp rò tĕ añ be cau tùl gơla, tồ añ kung geh jòng să dô êt sơl.

¹⁷ Bơta añ đơs do añ ò di đơs jat be Yàng sồr, mơya jat be cau tùl gơla kơnòm di să tòm he mơ jòng să.

¹⁸ Bơh gơs oă cau jòng să jat poac să, gen añ kung rơp jòng să behơ̆ sơl.

¹⁹ Bơh oh mi la cau jak chài gen ngan la chò nùs kong dòp cau tùl gơla hơ̆.

²⁰ Dilah gơs cau lơi kup oh mi tơmut tòm yô dĭ gơna, hala gơs cau sa loan oh mi, hala gơs cau kup kơñau oh mi, hala gơs cau sền òsơp oh mi, hala gơs cau pah di mat oh mi, gen oh mi kung kong dòp jơh.

²¹ Añ ai lơh ƀàssìl mơ đơs jơnau do, gơlơh be bol hi neh lơbơn lơño. Mơya dilah gơs cau ndai khin cha jòng să bơh bơta lơi, gen añ kung khin cha sơl; añ đơs be cau tùl gơla.

²² Bol khai la cau Hebrơ ơ? Añ kung behơ̆. Bol khai la cau Israel ơ? Añ kung behơ̆. Bol khai la jơi bơtiàn Abraham dê ơ? Añ kung behơ̆ sơl.

²³ Bol khai la cau duh broă Bơtau Krist dê ơ? Ơi, añ đơs be cau tùl gơla añ gơs rlau! Añ neh kong bòl glar lơh broă oă rlau, ơm jàm oă rlau, kong pù lơh oă ngan. Oă dơ̆ añ mòr chơt;

²⁴ pram dơ̆ kòl cau Juda pù, kòp dơ̆ siơ̆u dô tê la tơl poan jơt;

²⁵ pe dơ̆ kòl pù mơ gai; dô dơ̆ kòl cơm lŭ; pe dơ̆ kòl gơkram ơhò, dô ngai mơ dô mơnang ơm tòm dàlềng jrô;

²⁶ oă lòt gùng, sơbơng rơng hơđang ală hiòng, sơbơng rơng mơ ală cau phà kơñau, sơbơng rơng mơ làng bol tòm, sơbơng rơng mơ làng bol bơdìh, sơbơng rơng tòm ƀòn dờng, sơbơng rơng tòm ƀlàng bràs, sơbơng rơng hơđang dàlềng, sơbơng rơng mơ ală oh mi ma blac;

²⁷ kong bòl kong glar, oă dơ̆ drơng mang, kong jơgloh tơhìr, oă dơ̆ ơt sào, kong noat mrềt mơ ơm kuh lòi rồ.

²⁸ Rlau mơ ală bơta hơ̆, kòp ngai gam gơs bơta kơlôi rcang bơh jơh ală Hìu Jum Goh rềt di añ tai.

²⁹ Gơs cau lơbơn lơño mơ añ ò lơbơn lơño ơ? Gơs cau lơi gơtup tìs mơ añ ò dơrcul ơ?

³⁰ Dilah pal jòng să, gen añ rơp jòng să bơh ală bơta lơbơn lơño añ jê.

³¹ Yàng Tom Trồ la Bèp Yàng Jesu dê, la Bơtau pal jòng ro sùm sùm, git lah añ ò đơs blac.

³² Tòm Damas cau kwang đơng bơtau Aretas dê sồr kơp gàr ƀòn Damas nàng kup añ,

³³ mơya bơh mpồng dềt di gah dơrñang ƀòn gơs cau tơmù añ tòm dô nơm bài, behơ̆ añ lik klàs bơh di tê khai.