II Ală Bơtau 3 - Sră Goh 2018

Jôram at bồ hơđang Israel

¹ Tòm nam dơ̆ jơt pe rài Jôsaphat bơtau Juda, gen Jôram kòn klau Ahap, gơs bơtau hơđang Israel tòm Samari, khai at bồ jơt bàr sơnam.

² Khai neh lơh bơta iơh di đap Yàng Jehôwa, bulah ò ndròm be mè bèp khai; tài bơh khai neh tă sang rùp ràk Baal mơ bèp khai neh bơtào.

³ Bulah behơ̆, khai kung gơđềt jat tồi glài Jerôbôam, kòn klau Nebat, la glài neh lơh cau Israel gơtup tìs. Khai ò bài cah ngài bơh gơ.

Bơta tòmlơh mơ bơtau Môap

⁴ Tŭ hơ̆ bơtau Mesa lơgar Môap dê, cau ròng belàt, khai òs cèng ơn bơtau Israel in dô rhiang rbô nơm belàt kòn, mơ sơnò dô rhiang rbô belàt dam.

⁵ Mơya tòm tŭ Ahap neh chơt, bơtau Môap pơrlơ̆ dră wơl mơ bơtau Israel.

⁶ Behơ̆ bơtau Jôram lik lòt bơh Samari, tŭ hơ̆ pơjum tơrgòm jơh Israel.

⁷ Khai sồr lòt yal mơ Jehôsaphat, bơtau Juda in lah: “Bơtau Môap neh pơrlơ̆ dră wơl mơ añ. Bơtau kòñ lòt bal mơ añ nàng tòmlơh mơ Môap sơl?” Jehôsaphat đơs lah: “Añ rơp lòt; añ be ồng, làng bol añ be làng bol ồng, ơseh añ be ơseh ồng.”

⁸ Khai pơnjat: “Bol he rơp lòt jat gùng lơi taih?” Jôram ho lah: “Bơh gùng ƀlàng ngềt ngơt Edôm dê.”

⁹ Behơ̆ tàng, bơtau Israel, bơtau Juda mơ bơtau Edôm lik lòt bal, tòm tŭ bol khai neh lòt gùng pơdar tòm poh ngai, bol khai ò gơs dà mpồl ling mơ phan poan jơng lòt bal in.

¹⁰ Gen bơtau Israel đơs lah: “Ơ hơh! Yàng Jehôwa neh hòi pe nă cau bơtau do tus nàng jào bol he tòm tê Môap.”

¹¹ Mơya Jehôsaphat đơs lah: “Tềng do ò gơs dô nă cau gơnoar hwơr lơi Yàng Jehôwa dê nàng bol he kơnòm di khai mơ lùp Yàng Jehôwa ò ơ?” Dô nă cau dĭ gơna bơtau Israel yal lah: “Tềng do gơs Elise, kòn klau Saphat dê, la cau tuh dà di tê Eli dê.”

¹² Jehôsaphat đơs lah: “Jơnau Yàng Jehôwa ơm mơ khai.” Behơ̆, bơtau Israel, Jehôsaphat, mơ bơtau Edôm, lòt tus hơ khai.

¹³ Elise đơs mơ bơtau Israel lah: “Ñchi bơta gơs digùl añ mơ bơtau taih? Lòt tĕ hòi lùp ală cau gơnoar hwơr mè bèp bơtau dê.” Bơtau Israel ho lah: “Ò di behơ̆; bơh Yàng Jehôwa neh hòi pe nă bơtau do tus, nàng jào bol hi tòm tê Môap.”

¹⁴ Gen Elise đơs: “Kung be Yàng Jehôwa Gơnap Gơnoar Dờng Làm Jơh gam kis sùm, la Bơtau añ duh broă, mơ srat să lah, dilah añ ò sền dờng màng di Jehôsaphat, bơtau Juda, gen añ ò sền bơtau la chi lơi, mơ kung ò bài tìp mat sơl.

¹⁵ Mơya tŭ do, cèng tĕ añ in dô nă cau pĕ kơñi.” Tòm tŭ cau hơ̆ pĕ kơñi, gen tê Yàng Jehôwa ơm hơđang Elise.

¹⁶ Khai đơs: “Yàng Jehôwa đơs be do: ‘Añ rơp lơh bềng tơnau dà tòm thòng do.’

¹⁷ Bơh Yàng Jehôwa đơs be do lah: ‘Bol mê rơp ò gŏ càl, kung ò gŏ mìu, mơya thòng do rơp bềng lìu dà, mơ bol mê, mpồl belàt, bal mơ mpồl phan poan jơng bol mê dê, rơp hùc dà hơ̆.’

¹⁸ Mơya mìng la dô bơta dềt rhền di đap mat Yàng Jehôwa; bơh Kơnràñ kung rơp jào cau Môap tòm tê bol mê tai sơl.

¹⁹ Bol mê rơp phà tơrlah jơh ală ƀòn dờng kơ̆ cê, ală ƀòn màng ryŭ, kơl ală chi niam, bồr wơl ală croh dà, mơ ai lŭ lơh tơnroh ală ƀlàng sre niam.”

²⁰ Àng drim ngai tơnơ̆, di di tŭ cau ơn phan ơn pơdơng drim, nisơna dà sơntòm hòr song bơh Edôm, tian gơs tòm lơgar bềng dà.

²¹ Tòm tŭ jơh cau Môap kơno lah ală bơtau hơ̆ tus nàng lơh bol khai, jơh ală cau rgơi àñ phan tòmlơh, bơh cau kơnòm rlau jơh tus di cau kra rlau jơh, geh hòi lik lòt ntào di tiah nhàr lơgar.

²² Ngai tơnơ̆ tòm tŭ cau Môap guh gòñ ngan bơh drim; mơ mattơngai pơnđàng hơđang dà, cau Môap gŏ dà pơrhê be mhàm di đap bol khai,

²³ gen driau dờng lah: “Do la mhàm! Ală bơtau neh tòmlơh bal, neh tòm tơnchơt bal rau. Gen tŭ do, ơ cau Môap! Lòt tĕ ai phan mơna.”

²⁴ Mơya tòm tŭ bol khai lòt tus di tiah sàl mpồl ling Israel dê; mơya cau Israel guh brồ lơh cau Môap, bol khai ntoat dô di đap cau Israel, bol khai mut brồ lơh cau Môap tòm lơgar.

²⁵ Bol khai phà tơnroh ală ƀòn dờng, jơh tơl nă ai lŭ cơm bồr ală ƀlàng sre niam, jơl tus gơbồr jơh; kòp nơm tồ dà ò hòr tai, mơ bol khai kơl jơh ală chi niam. Mìng tòm Kir Hareset ală dơrñang lŭ gam wơl, jơl tus ală cau ling pañ sơna gơrwàng mơ brồ lơh gơ.

²⁶ Tòm tŭ bơtau Môap gŏ bơta tòmlơh neh tus tòmdră mơ khai, gen cèng jat bal poh rhiang nă cau at đào nàng lik klàs, kòñ brồ lơh di đap bơtau Edôm, mơya bol khai ò rgơi.

²⁷ Gen khai kup kòn klau tơnhoa, la cau pal pơrdòn sơbàn khai, ơn lơh gơs phan pơdơng chu hơđang dơrñang ƀòn. Mơ gơs bơta gơjrañ dờng tus hơđang cau Israel; gen bol khai ruc bơh bơtau Môap mơ rê hơ lơgar bol khai dê.