II Ală Bơtau 23 - Sră Goh 2018

Jôsia tơnroh bơta duh khoai rùp ràk

¹ Gen bơtau sồr cau pơjum jơh ală cau kwang kra Juda dê mơ Jerusalem.

² Gen, bơtau guh hơ hìu duh khoai Yàng Jehôwa, gơs jơh ală cau Juda, jơh làng bol Jerusalem, ală cau gơnoar ơn phan duh khoai, cau gơnoar hwơr, bal mơ jơh làng bol, cau dềt mơ cau dờng lòt jat khai. Khai sền bol hơ̆ in iat ală jơnau tòm sră ho bal dê, mơ cau neh jòi bàn tòm hìu duh khoai Yàng Jehôwa dê.

³ Bơtau ñă di gah jrong mơ bơtào bơta ho bal di đap Yàng Jehôwa, lòt jat Yàng Jehôwa, jơh nùs jơh hwềng soàn prap gàr ală bơta boh lam, bơta lơh nền, mơ bơta sồr lam Kơnràñ dê, mơ lơh wil tơl jơnau ho bal neh cih tòm sră do. Jơh làng bol geh dô nùs bal bơh jơnau ho pơgon hơ̆.

⁴ Gen bơtau ai gơnoar sồr cau gơnoar dờng ơn phan duh khoai Hilkia, ală cau gơnoar ơn phan duh khoai, mơ ală cau sền gàr mpồng hìu duh khoai, cèng tơlik bơh hìu duh khoai Yàng Jehôwa jơh ală phan cau ngui neh lơh Baal in, Asera, mơ jơh ală sơmañ hơđang trồ. Khai chu ală phan hơ̆ di bơdìh Jerusalem, tòm ƀlàng sre Kidrôn, mơ cèng bùh gơ tus hơ Betel.

⁵ Bơtau kung bơtrơh ală cau gơnoar ơn phan duh khoai ală yàng rùp ràk mơ ală cau bơtau Juda neh bơtào gơs, nàng chu kơlhô hơđang ală tiah jơnhoa tòm ală ƀòn Juda mơ tòm ală tiah gùt dar Jerusalem; kung bơtrơh ală cau gơnoar ơn phan pơdơng Baal, mattơngai, mat kơnhai, mơ jơh ală sơmañ hơđang trồ in.

⁶ Khai tă rùp ràk Asera lik bơh hìu duh khoai Yàng Jehôwa dê, cèng tơlik gơ hơ bơdìh Jerusalem, tus di Thòng Kidrôn, chu pơrguc gơ tềng hơ̆ tơnlề gơ gơlik bùh, gen rsìh bùh hơ̆ hơđang bơtô ƀồc làng bol dê.

⁷ Cau kung phà ală ơdŭ cau klau tìs glài rềs àr mơ cau klau ơm tòm hìu duh khoai Yàng Jehôwa dê, la tiah ală cau ùr tàñ ală sàl rùp ràk Asera in.

⁸ Khai cèng jơh ală cau gơnoar ơn phan duh khoai lik bơh ală ƀòn tòm Juda, tus lơh ƀơ̆ ƀơl ală tiah jơnhoa mơ bol khai neh chu kơlhô, bơh Geba jơl tus Beerseba; khai pòng tơrlah ală tiah jơnhoa bơt di mpồng ƀòn, di gùng mut di mpồng Jôsue kwang at bồ ƀòn dờng dê, đah kiau mpồng mut tòm ƀòn dờng.

⁹ Bulah behơ̆, ală cau gơnoar ơn phan duh khoai ală tiah jơnhoa ò geh tus hơ cơnòng duh khoai Yàng Jehôwa dê tòm Jerusalem; mơya bol khai sa piang lă ò gơs kañ bal mơ oh mi bol khai dê.

¹⁰ Khai kung lơh ƀơ̆ ƀơl Tôphet tòm thòng Ben Hinôm, nàng ò gơs cau lơi chu kòn klau hala kòn ùr he tòm ồs, be dô nơm phan ơn rùp ràk Molok in tai.

¹¹ Khai kung tă sang ală rùp ơseh mơ ală bơtau Juda neh ơn mattơngai in, di mpồng mut tòm hìu duh khoai Yàng Jehôwa, di ơdŭ cau kwang kriau Nathan Melek dê, tiah hơ̆ neh cang mơ pơnggàr, gen khai chu ală rơndeh ơn mattơngai in jơh tòm ồs.

¹² Ală cơnòng duh khoai hơđang rkàng ơdŭ Ahas dê mơ ală bơtau Juda neh bơt; mơ ală cơnòng duh khoai mơ Manase neh bơtào gơs tòm bàr đah ơdŭ mpang hìu duh khoai Yàng Jehôwa dê, gen khai tă tơmù bơh tềng hơ̆ mơ jan bơcah lề lac, mơ rsìh thul gơtòm Croh Kidrôn.

¹³ Bơtau kung lơh ƀơ̆ ƀơl ală tiah jơnhoa ơm di đah mattơngai lik Jerusalem, di đah đơm mơnơm Bơta Tơnroh, la ală tiah Salômôn bơtau Israel neh bơt bơtào nàng duh khoai Astarte, rùp ràk cù kìr cau Sidôn dê, Kemôs rùp ràk cù kìr cau Môap dê, mơ Milkôm, rùp ràk cù kìr cau Ammôn dê.

¹⁴ Khai pòng bơcah rpot rpet ală jrong duh khoai, sòr tơrlah ală rùp ràk Asera, mơ rsìh ală ntìng ƀồc bềng hơđang hơ̆.

¹⁵ Rlau mơ hơ̆, cơnòng duh khoai tòm Betel, tiah jơnhoa neh geh bơt bơtào bơh bơtau Jerôbôam kòn klau Nebat, la cau neh lơh Israel in tìs glài — bơtau sòr tơrlah cơnòng duh khoai hơ̆ bal mơ tiah jơnhoa. Bơtau chu jơh tiah jơnhoa, tơnlề gơ gơs bùh, khai kung chu jrong duh khoai Asera sơl.

¹⁶ Tòm tŭ Jôsia wơlke gen khai gŏ ală bơtô ƀồc ơm hơđang mơnơm; gen khai sồr tă ntìng ƀồc tòm ală bơtô hơ̆, chu gơ hơđang cơnòng duh khoai, mơ lơh ƀơ̆ ƀơl gơ, jat be jơnau Yàng Jehôwa, mơ cau Yàng Tom Trồ neh yal lài.

¹⁷ Gen, bơtau lùp lah: “Tềl bơtô ƀồc mơ añ gŏ hơ̆ la ñcau dê taih?” Ală cau ƀòn hơ̆ ho lah: “Hơ̆ la bơtô ƀồc cau Yàng Tom Trồ dê ơm tòm Juda, tus yal lài bơh ală broă mơ bơtau neh lơh cơnòng duh khoai tòm Betel in.”

¹⁸ Khai pơnjat: “Lòi tĕ ntìng ƀồc hơ̆ lơngap lơngai, bañ gơs dô nă cau lơi tă cèng ntìng khai dê.” Behơ̆, bol khai lòi ntìng ƀồc hơ̆, bal mơ ntìng ƀồc cau gơnoar hwơr kra ơm tòm Samari.

¹⁹ Rlau mơ hơ̆, Jôsia kung tă tơlik jơh ală hìu bơmồng tòm ală tiah jơnhoa tòm Samari, mơ ală cau bơtau Israel neh bơtào gơs nàng bơrcek Yàng Jehôwa gơjrañ, khai lơh di ală hìu hơ̆ be neh lơh tòm Betel.

²⁰ Khai tơnchơt ală cau ơn phan duh khoai tiah jơnhoa dê hơđang cơnòng duh khoai, mơ chu ƀồc bol khai hơđang hơ̆. Gen, khai rê wơl hơ Jerusalem.

Prap gàr ngai pơjum lòt gan

²¹ Gen bơtau ai gơnoar sồr jơh làng bol in lah: “Prap gàr tĕ ngai pơjum sa lòt gan Jehôwa Yàng Tom Trồ bol mê dê, jat be ală jơnau neh cih tòm sră bơta ho bal.”

²² Bơh òhềt gơs bơta prap gàr bơta pơjum lòt gan bơh di rài ală kwang cahrña Israel, hala tòm rài ală bơtau Israel mơ bơtau Juda dê,

²³ mơya tòm nam dơ̆ jơt phàm rài at bồ bơtau Jôsia dê, bơta pơjum sa lòt gan do neh geh prap gàr Yàng Jehôwa in tòm Jerusalem.

²⁴ Jôsia kung tơnroh ală cau gru bơjơu, ală cau sền dà, mơ ală rùp ràk cù kìr tòm Juda mơ tòm Jerusalem, nàng lơh jat ală bơta boh lam neh cih tòm sră mơ cau gơnoar ơn phan duh khoai Hilkia neh jòi bàn tòm hìu duh khoai Yàng Jehôwa dê.

²⁵ Lài mơ Jôsia, ò gơs bơtau lơi be khai, khai neh wèt hơ Yàng Jehôwa jơh nùs, jơh hwềng soàn, jơh pràn, lơh jat jơh ală bơta boh lam Môise dê; kung ò gơs cau lơi tơnơ̆ mơ khai tòm toh be khai tai.

²⁶ Yàng Jehôwa ò pơrlac bơta gơhào gơjrañ dờng Kơnràñ dê bơh bơta hơ̆ Kơnràñ gơhào gơjrañ tòmdră mơ Juda, tài bơh ală tồi glài dờng Manase dê neh bơrcek Kơnràñ.

²⁷ Yàng Jehôwa neh đơs lah: “Añ rơp tă tơlik Juda bơh di đap Añ be Añ neh tă tơlik Israel sơl, mơ Añ rơp sang lòi ƀòn dờng do, Jerusalem mơ Añ neh sac rwah, mơ hìu duh khoai mơ Añ neh đơs bơh gơ lah: ‘Sơnđan Añ rơp ơm tềng hơ̆.’”

²⁸ Ală bơta ndai Jôsia dê, ală broă khai lơh, gen neh cih tòm sră yal broă kòp nam ală bơtau Juda dê.

Jôsia sang rài

²⁹ Tòm ală ngai hơ̆, Pharaôn Nekô bơtau Ejiptơ, neh guh brồ lơh bơtau Asiri tus hơ hiòng Ơphrat. Gen Jôsia lòt tìp khai. Mơya tòm tŭ Pharaôn Nekô tìp mơ khai tòm Megidô gen tơnchơt khai.

³⁰ Ală cau dĭ gơna khai dê pơdiang ƀồc khai hơđang rơndeh bơh Megidô cèng khai rê hơ Jerusalem, mơ tơp khai tòm bơtô ƀồc khai dê. Làng bol tòm lơgar bơtào Jôaca kòn klau Jôsia, bong mơñà khai in, mơ bơtào khai gơs bơtau ala bèp khai.

Jôaca mơ Jehôyakim at bồ

³¹ Jôaca neh bàr jơt pe sơnam tòm tŭ khai sơntòm at bồ; khai at bồ pe kơnhai tòm Jerusalem. Mè khai sơnđan la Hamutal, kòn ùr Jeremi dê ơm tòm Lipna.

³² Khai lơh bơta iơh di đap Yàng Jehôwa, jat jơh krơh ală ồng pàng khai dê neh lơh.

³³ Pharaôn Nekô kup jàm khai tòm Ripla, tòm tiah Hamat, tồ khai in ò at bồ tòm Jerusalem tai. Mơ bơklơn lơgar ơn dô rhiang talơng priă mơ dô talơng màh.

³⁴ Gen, Pharaôn Nekô bơtào Eliakim kòn klau Jôsia, lơh gơs bơtau ala Jôsia, bèp khai dê, mơ tòmgơl sơnđan khai la Jehôyakim. Ai Jôaca kong kup jàm tòm Ejiptơ, mơ khai chơt tềng hơ̆.

³⁵ Jehôyakim ai priă mơ màh Pharaôn in. Mơya khai tă dia di lơgar nàng tơl khà priă mơ Pharaôn neh sồr ơn. Khai lơh nền tòm toh khà priă mơ màh bơh di làng bol tòm lơgar, kòp nă pal dap; gen jào gơ Pharaôn Nekô in.

³⁶ Jehôyakim neh bàr jơt pram sơnam tòm tŭ sơntòm at bồ; mơ khai at bồ jơt dùl sơnam tòm Jerusalem. Mè khai sơnđan la Jebidah, kòn ùr Phedaya ơm tòm Rumah.

³⁷ Khai lơh bơta iơh di đap Yàng Jehôwa, jat krơh ală ồng pàng khai neh lơh.