II Ală Bơtau 2 - Sră Goh 2018

Eli geh cèng guh hơđang trồ

¹ Tòm tŭ Yàng Jehôwa mòr cèng Eli guh hơđang trồ tòm dô nơm càl wàl bong, Eli mơ Elise gam lòt gùng bơh Gilgal.

² Eli đơs mơ Elise lah: “Ơm tĕ tềng do; bơh Yàng Jehôwa sồr añ lòt tus hơ Betel.” Elise đơs lah: “Añ sơnio Yàng Jehôwa gam kis sùm mơ bơta kis ồng dê lah, añ ò tŭ lơi lik lòt bơh ồng.” Behơ̆, bol khai lòt tus hơ Betel.

³ Mpồl ală cau gơnoar hwơr ơm tòm Betel tus đơs mơ Elise lah: “Bi neh git lah ngai do Yàng Jehôwa rơp tă cau tòm bi dê ngài bơh di bi sơl?” Khai ho: “Ơi añ git; ơm tĕ mŏ mŏ!”

⁴ Eli đơs mơ Elise lah: “Ơ Elise ơm tĕ tềng do, bơh Yàng Jehôwa neh sồr añ lòt tus hơ Jerikô.” Elise đơs tai lah: “Añ sơnio Yàng Jehôwa gam kis sùm mơ sơnio bơta kis ồng dê, añ rơp ò sang lòi ồng.” Behơ̆, bol khai lòt tus hơ Jerikô.

⁵ Mpồl ală cau gơnoar hwơr dê ơm tòm Jerikô tus rềp mơ Elise, đơs mơ khai lah: “Bi neh git sơl ngai do Yàng Jehôwa rơp tă cau tòm bi dê ngài bơh di bi sơl?” Khai ho lah: “Ơi añ git, ơm tĕ mŏ mŏ!”

⁶ Eli đơs mơ khai lah: “Ơm tĕ tềng do, bơh Yàng Jehôwa sồr añ lòt tus hơ Jordan.” Elise đơs lah: “Añ sơnio Yàng Jehôwa gam kis sùm mơ bơta kis ồng dê lah, añ rơp ò sang lòi ồng.” Behơ̆, bàr nă bol khai pơnjat lòt gùng.

⁷ Pram jơt nă tòm ală cau gơnoar hwơr kung lòt sơl, ñă ntào ngài ngài bơh di bol khai, ai bàr nă bol khai gen neh ơm ntào di gah hiòng Jordan.

⁸ Gen Eli ai ào jrùh khai dê, pồt gơ mơ pòng hơđang dà; gen dà cah bàr đah, tian gơs bàr nă bol khai tiă gan hơđang ù rañ.

⁹ Tòm tŭ bol khai neh tiă gan rau, Eli đơs mơ Elise lah: “Yal tĕ mơ añ bơta lơi añ rgơi lơh mê in, lài mơ tŭ añ geh cèng bơh di mê.” Elise yal lah: “Dan ai añ in geh dòp bàr dơ̆ hwềng ồng dê hơđang añ.”

¹⁰ Eli đơs mơ khai lah: “Mê neh dan dô bơta kalke mơya dilah mê gŏ añ tòm tŭ añ geh cèng guh bơh di mê, gơ rơp geh ai mê in; dilah ò gen rơp ò geh.”

¹¹ Tòm tŭ bol khai lòt ndang tòmbơhbơr ndang, gen gơs dô nơm rơndeh ồs mơ ơseh ồs cah is bàr nă bol khai; Eli guh hơ trồ tòm dô nơm càl wàl bong.

¹² Elise kư̆ sền mơ driau lah: “Ơ bèp añ jê! Bèp añ jê! Rơndeh mơ mpồl ling hào ơseh Israel dê!” Mơya tòm tŭ Elise ò sền gŏ Eli tai; khai sơmbat di ào tòm khai dê mơ crè gơs bàr pet.

Elise pơrdòn gơnoar broă Eli

¹³ Gen Elise dòñ ào jrùh dùh bơh di să Eli dê, rê wơl mơ ntào di gah hiòng Jordan.

¹⁴ Khai ai ào jrùh neh dùh bơh să Eli hơ̆, pòng dà mơ đơs lah: “Ntềng đah Jehôwa Yàng Tom Trồ Eli dê?” Tòm tŭ neh pòng dà, gen dà gơcah bàr đah, mơ Elise lòt gan hiòng.

¹⁵ Tòm tŭ ală cau gơnoar hwơr ơm tòm Jerikô, gŏ Elise bơh ngài gen đơs lah: “Hwềng Eli dê ơm hơđang Elise.” Bol khai tus rò Elise, tơmbic să di đap khai.

¹⁶ Mơ đơs mơ khai lah: “Tềng do, bol he gơs pram jơt nă cau pràn kơldang digùl ală cau duh broă ồng dê; dan lòi bol khai in lòt jòi cau tòm ồng dê; digơlan Hwềng Yàng Jehôwa dê cèng khai guh, mơ sơrbì khai hơđang mơnơm lơi hala tòm thòng lơi sơl?” Elise ho: “Ò di, bañ sồr bol khai lòt.”

¹⁷ Mơya bol khai kư̆ chồl bơtrut Elise sùm, tian gơs lơh khai in ƀàssìl, gen đơs lah: “Sồr bol khai lòt tĕ.” Gen bol khai sồr pram jơt nă lòt jòi Eli tòm pe ngai, mơya jòi ò bàn.

¹⁸ Bol khai rê wơl, Elise gam ơm tòm Jerikô; gen khai đơs mơ bol hơ̆ lah: “Añ ò di neh đơs mơ bol mê bañ lòt ò ơ?”

Elise lơh bơta krơi

¹⁹ Tŭ hơ̆ làng bol tòm ƀòn dờng đơs mơ Elise lah: “Tiah bơt bơtào ƀòn dờng do la niam ngan, be cau tòm añ jê neh gŏ; mơya dà gen khih mơ ù tiah gen ò gơlik plai đo.”

²⁰ Khai đơs lah: “Cèng tĕ añ in dô nơm mơngàn pa, mơ ơn boh tòm hơ̆.” Behơ̆ bol khai cèng khai in.

²¹ Gen khai lòt tus di tồ dà, tuh boh tòm dà, mơ đơs lah: “Yàng Jehôwa đơs be do: Añ neh lơh dà do in geh sơmbòi, bơh tŭ do ò gam gơs bơta chơt lơi, hala bơta kơnền lơi tai.”

²² Behơ̆, jat be jơnau Elise yal tơlik, dà geh sơmbòi jơl tus di ngai do.

Ală cau kơnòm kòl jơgơu crè poac

²³ Bơh tềng hơ̆, Elise guh tus hơ Betel; mơ tòm tŭ khai gam lòt rò gùng, gơs ală cau kơnòm klau lik bơh ƀòn dờng bơrsèl tơnhial khai, lah: “Lòt ngài tĕ ơ cau lòl bồ! Lòt ngài tĕ ơ cau lòl bồ!”

²⁴ Khai wơlke mơ gŏ kơnòm hơ̆, mơ khai srat rma ală kơnòm hơ̆ tòm sơnđan Yàng Jehôwa. Gen gơs bàr nơm jơgơu me lik bơh brê, kap crè poan jơt bàr nă kơnòm klau.

²⁵ Bơh tềng hơ̆, Elise lòt tus hơ mơnơm Karmel; mơ rê wơl hơ Samari.