Esai 63 - Sră Goh 2018

Bơta sal tê hơđang Edôm

¹ Cau do la ñcau mơ tus bơh Edôm, bơh Bôjra, soh ào ñòm dà pơrhê taih? Cau do la ñcau mơ soh ào jrùh ryŭ ryơm, ai gơnoar pràn dờng khai dê mơ cơnđòa khin cha taih? “Hơ̆ la să tòm Añ, la Bơtau đơs bơta song ring, gơs gơnoar pràn nàng dong klàs.”

² Ñchi bơh tài ală ào jrùh Kơnràñ dê pơrhê, mơ ào bơdìh Kơnràñ dê be cau jă mpal pat tơrnòm ño taih?

³ “Mìng dô nă Añ lơm neh jă mpal pat tơrnòm; digùl ală làng bol ò gơs dô nă cau lơi bal mơ Añ. Tòm bơta gơjrañ Añ jê, Añ neh jă hơđang bol khai, mơ tòm bơta gơjrañ dờng Añ jê, Añ neh tơnlề bol khai hơđơm jơng Añ; mhàm bol khai gơđềt di ală ồi ào Añ, mơ Añ neh lơh jơh ală ồi ào Añ gơđềt mơ mhàm lơm.

⁴ Bơh ngai sal tê gơ ơm tòm nùs Añ, mơ nam dong tơwài Añ jê neh tus.

⁵ Añ neh sền, mơya ò gơs cau dong kòl, Añ neh sơntòm mơya ò gơs cau lơi dong đo Añ; behơ̆ tơwòr tề tòm Añ jê neh cèng bơta pha lin Añ in, mơ bơta gơjrañ dờng Añ jê neh yò đo Añ.

⁶ Añ neh jă trơm ală làng bol tòm bơta gơjrañ Añ jê; neh tơnlề bol khai bơh bơta gơjrañ dờng Añ jê, mơ neh tuh tơlik mhàm bol khai dê hơđang ù.”

Bơta nđàc sơngit Yàng Tom Trồ dê

⁷ Añ rơp yal bơh bơta lơbơn niam Yàng Jehôwa dê, bơta jòng ro bơh broă lơh dờng màng Yàng Jehôwa dê, tài bơh jơh ală broă Kơnràñ neh lơh bol he in mơ bơta nđàc dờng mơ Kơnràñ neh ràng tơlik gơwèt mơ hìu Israel jat bơta nđàc sơngit Kơnràñ dê, jat bơta tơngkah tơngkañ nùs kòñ gơboh kơ̆ dơn Kơnràñ dê.

⁸ Bơh Kơnràñ neh đơs lah: “Ngan, bol khai la làng bol Añ jê, la ală kòn sau ò lơh bơta ma blac mơ Añ;” mơ Kơnràñ neh gơlik gơs Bơtau Dong Klàs bol khai dê.

⁹ Tòm jơh ală bơta bòl glar bol khai dê, ò gơs cau kong sồr hala cau gơnrơh, mơya bơta gơs mat Kơnràñ dê neh dong klàs bol khai. Tòm bơta kòñ gơboh mơ kòñ nđàc Kơnràñ dê, Kơnràñ neh dong tơwài bol khai; Kơnràñ neh yò tơngguh bol khai mơ kơnđơt kơnđu bol khai tòm jơh ală ngai yau òr.

¹⁰ Bulah behơ̆, bol khai neh tòmdră, mơ lơh Hwềng Goh Kơnràñ dê moat jrùng. Gen tàng Kơnràñ gơlik gơs cau sò tơm di bol khai, mơ să tòm Kơnràñ tòmlơh nàng tòmdră mơ bol khai.

¹¹ Gen bol khai kah wơl ală ngai yau òr, bơh Môise la cau duh broă Kơnràñ dê. Ntềng đah Bơtau neh cèng bol khai tiă lik bơh dàlềng cau ê bal mơ mpồl belàt Kơnràñ dê taih? Ntềng đah Bơtau neh ơn tòm bol khai Hwềng Goh Kơnràñ dê taih?

¹² La Bơtau neh lơh tơwòr tê gơklŏ Kơnràñ dê, cơnđòa lòt đah ma Môise dê. La Bơtau neh cah dàlềng di đap bol khai, Nàng lơh sơnđan Kơnràñ dê gam sùm sùm;

¹³ ñcau neh tề lam bol khai lòt gan ală tiah jrô taih? Be dô nơm ơseh tòm ƀlàng bràs, bol khai ò gơtup pừ.

¹⁴ Kung be mpồl phan poan jơng mù tòm thòng, Hwềng Yàng Jehôwa dê neh ai bol khai in ơm rlô bòl. Hơ̆ la Kơnràñ neh tề lam làng bol Kơnràñ dê, nàng lơh gơklŏ sơnđan să tòm Kơnràñ in.

Jơnau hòi dan gơjrañ sang glài

¹⁵ Dan Yàng tơmềt sền bơh đang trồ, bơh tiah ơm sàng goh mơ gơklŏ Kơnràñ dê. Ntềng đah bơta ngac ngar mơ gơnoar pràn Kơnràñ dê taih? Nùs lơbơn niam mơ bơta nđàc sơngit Kơnràñ dê neh tă tơlik bơh Añ.

¹⁶ Bơh Kơnràñ la Bèp bol hi dê, bulah Abraham ò git bol hi, Israel ò đal git bol hi; Ơ Yàng Jehôwa, Kơnràñ la Bèp bol hi dê, Sơnđan Kơnràñ la Bơtau Dong Tơwài bol hi dê bơh yau òr.

¹⁷ Ơ Yàng Jehôwa, ñchi bơh tài Kơnràñ lòi bol hi lòt tìs nrah ngài bơh di gùng Kơnràñ dê, mơ lơh kơldang nùs bol hi dê tian gơs bol hi ò ki ngàm di Kơnràñ taih? Dan Yàng rê wơl, tài bơh ală cau duh broă Kơnràñ dê, tài bơh ală jơi bơtiàn la phan jơtài Kơnràñ dê.

¹⁸ Làng bol sàng goh Kơnràñ dê neh dòp geh sre brê tòm dô êt jŏ; mơya tŭ do ală cau sò tơm bol hi dê neh jă trơm tiah sàng goh Kơnràñ dê.

¹⁹ Bol hi neh jŏ jòng rau kung be làng bol Kơnràñ ò at bồ, mơ bol hi be làng bol ò geh hòi jat sơnđan Kơnràñ dê.