Esai 62 - Sră Goh 2018

Bơta dong tò mơ bơta dong klàs Siôn dê

¹ Tài bơh Siôn Añ rơp ò ơm mŏ mŏ, tài bơh Jerusalem Añ rơp ò ơm rlô, jơl tus di tŭ bơta dong tò gơ dê sòl pơnđàng be tòm tŭ àng drim, mơ bơta dong klàs gơ dê be dô nơm sơmpòl ồs.

² Ală lơgar rơp gŏ bơta song ring ai dê, mơ jơh ală cau bơtau rơp gŏ bơta gơklŏ ai dê, mơ ai rơp geh hòi mơ sơnđan pa, la sơnđan geh tơmoh ai in bơh bơr Yàng Jehôwa.

³ Ai rơp lơh gơs dô nơm sơgơn bơtau gơklŏ tòm tê Yàng Jehôwa, dô nơm sơgơn bơtau tòm tê Yàng Tom Trồ ai dê.

⁴ Cau rơp ò tai sơnđan ai la Cau kong sang lòi, mơ ù tiah ai dê ò gam lòi srau gòi tai. Mơya ai rơp geh sơnđan la cau Añ kòñ gơboh, mơ ù tiah ai dê la cau gơs bau klau; bơh Yàng Jehôwa rơp kòñ gơboh di ai, mơ ù tiah ai dê rơp geh bau.

⁵ Kung be dô nă cau klau pơnu tòmbau mơ dô nă cau ơruh, gen kung behơ̆ sơl, Bơtau bơt bơtào ai rơp bau mơ ai, mơ kung be cau bơrtơu pa hòn chò bơh bau ùr pa khai dê, gen kung behơ̆ sơl, Yàng Tom Trồ rơp hòn chò bơh di ai.

⁶ Ơ Jerusalem, Añ neh ơn ală cau ling kơp gàr hơđang ală dơrñang ai dê, mang mơ ngai bol khai rơp ò tŭ lơi ơm mŏ mŏ. Ai la cau tơngkah Yàng Jehôwa, bañ ơm rlô.

⁷ Bañ lòi Kơnràñ ơm rlô jơl tus di tŭ Kơnràñ neh bơt bơtào wơl Jerusalem mơ lơh gơ in gơlik gơs bơta tiơng pơnro làm plai ù.

⁸ Yàng Jehôwa neh srat să bơh tê ma Kơnràñ dê mơ bơh tơwòr tê gơnoar pràn Kơnràñ dê lah: “Añ rơp ò tŭ lơi ai kòi mi ai dê lơh gơs phan sa ală cau sò tơm ai in tai, mơ làng bol bơdìh rơp ò geh ñô tơrnòm mơ ai neh kong lơh broă bòl glar;

⁹ mơya ală cau neh toès gơ gen rơp sa gơ mơ jòng ro Yàng Jehôwa; ală cau neh tơrgòm plai ño gen rơp ñô gơ tòm ƀlàng hìu duh khoai Añ jê.”

¹⁰ Lòt gan tĕ, lòt gan tĕ ală mpồng ƀòn! Rcang tĕ gùng lòt làng bol in. Bơt tĕ, bơt tĕ gùng me! Wàs goh tĕ ală pơnai lŭ. Bơtào tĕ dô nơm bồng bi ală làng bol in.

¹¹ Yàng Jehôwa neh tơlik dô jơnau yal tus di ală tiah lồi plai ù lah: “Đơs tĕ mơ Kòn ùr Siôn lah: ‘Sền ne, Bơtau Dong Klàs ai dê tus! Sền ne, phan ƀàn Kơnràñ dê ơm mơ Kơnràñ, mơ phan tơm wơl Kơnràñ dê tus bal mơ Kơnràñ.’”

¹² Bol khai rơp geh sơnđan la “Làng bol Sàng Goh,” la “Ală Cau geh Dong Tơwài Yàng Jehôwa dê”; mơ ai rơp geh sơnđan la “Ƀòn Dờng Cau Jòi Bàn la Dô nơm Ƀòn Dờng Ò Kòl Sang Lòi tai.”