Esai 56 - Sră Goh 2018

Bơta dong klàs ală cau ndai in

¹ Yàng Jehôwa đơs be do: “Prap gàr tĕ bơta song ring, mơ lơh tĕ bơta di ngan, bơh bơta dong klàs Añ jê rơp tus mhar mo, mơ bơta dong tă Añ jê neh geh yal tơlik.

² Lơngai cau lơi in lơh bơta hơ̆, cau lơi đơng kơ̆ bơta hơ̆, cau lơi prap gàr ngai Saƀat, ò gơtup tìs di ngai hơ̆, mơ kơrmap gàr tê khai dê lơh bơta iơh lơi.”

³ Bañ lòi cau làng bol bơdìh lơh gơs dô bă bal mơ Yàng Jehôwa rgơi đơs lah: “Ngan la Yàng Jehôwa rơp tă tơlik Añ bơh di làng bol Kơnràñ!” Mơ bañ lòi dô nă cau neh kriau lơi đơs lah: “Añ mìng la dô nơm chi ro.”

⁴ Bơh Yàng Jehôwa đơs be do: “Ală cau neh kriau prap gàr ală ngai Saƀat Añ jê, sac rwah bơta niam nùs Añ, mơ at kơ̆ bơta ho bal Añ jê,

⁵ Añ rơp ai dô bă tiah tòm hìu duh khoai Añ jê, mơ tòm dơlam ală dơrñang gơ dê, dô bơta kah kirsơnre, dô nơm sơnđan niam rlau mơ ală kòn klau mơ kòn ùr; Añ rơp ai bol khai in dô nơm sơnđan gam sùm sùm mơ rơp ò gơs tŭ lơi lồi.

⁶ Mơ ală cau làng bol bơdìh neh lơh gơs dô bă bal mơ Yàng Jehôwa nàng bol khai duh broă Kơnràñ, nàng kòñ gơboh di sơnđan Kơnràñ, mơ nàng lơh gơs dĭ gơna Kơnràñ dê, jơh ală cau prap gàr ngai Saƀat mơ ò lơh gơtup tìs di ngai hơ̆, mơ prap kơ̆ bơta ho bal Añ jê;

⁷ Gen Añ rơp cèng ală cau hơ̆ guh hơđang mơnơm sàng goh Añ jê, mơ lơh bol khai in bềng bơta hòn chò tòm hìu hòi dan Añ jê. Ală phan ơn chu pơrguc mơ ală phan ơn pơdơng duh khoai bol khai dê rơp geh dòp hơđang cơnòng duh khoai Añ jê; bơh hìu Añ rơp geh sơnđan la dô nơm hìu hòi dan jơh ală làng bol in.”

⁸ Yàng Jehôwa la Yàng Tom Trồ Bơtau pơjum tơrgòm wơl ală cau nrah nring tòm Israel, đơs lah: “Di gah bol khai la ală cau Añ neh pơjum tơrgòm, Añ rơp pơjum tơrgòm ală cau ndai tai tus bal mơ bol khai.”

Jơnau lah pơrhơng cau Israel ò dòn song

⁹ Ơ ală phan poan jơng tòm ƀlàng, tus tĕ. Ơ ală phan poan jơng tòm brê, tus tĕ mơ sa loan!

¹⁰ Ală cau kơp gàr Israel dê jơngo mat, jơh tơl nă bol khai siơ̆u bơta git wă; bol khai jơh tơl nă la ală so kloat; ò rgơi khoal; ơm bic wèng, ơm mpau, jròk bic mat.

¹¹ Bol khai la ală so jròk sa, bol khai ò gơs tŭ lơi hòm. Bol khai la ală cau ê belàt ò gơs bơta git wă; Jơh ală bol khai lòt jat gùng is bol khai dê, kòp nă jòi cồng nha is he in, cau lơi kung behơ̆ lơm.

¹² Bol khai đơs lah: “Tus tĕ, lòi añ ai tơrnòm! Bol he ñô bơñul tĕ mơ tơrnòm pràn! Ngai hìng kung be ngai do, mơ sơlo oă rlau tai.”