Esai 44 - Sră Goh 2018

Yàng Tom Trồ ai lơngai Israel in

¹ “Mơya tŭ do iat tĕ, ơ Jakôp, cau duh broă Añ jê, Ơ Israel, làng bol Añ neh sac rwah.

² Do la jơnau đơs Yàng Jehôwa dê, la Bơtau neh lơh gơs mê, neh mòn gơs mê tòm kơndul mè, mơ la Bơtau rơp dong kòl mê: Bañ rngòt, ơ Jakôp, cau duh broă Añ jê, mơ Jerusalem la cau Añ neh sac rwah;

³ Bơh Añ rơp tuh dà hơđang ù rañ rsơh, ai ală croh dà tòm tiah ro rañ. Añ rơp tuh Hwềng Añ hơđang jơi bơtiàn mê dê, mơ bơta lơngai lơngò hơđang ală kòn sau mê dê.

⁴ Bol khai rơp hòn niam kung be ñhơt tòm ƀlàng, be chi tơlir hòn rềp di ală croh dà.

⁵ Cau do rơp đơs lah: ‘Añ gơrê bal mơ Yàng Jehôwa,’ cau ne rơp tơmoh să tòm he bơh sơnđan Jakôp; cau ndai tai rơp cih hơđang tê he lah: ‘Añ gơrê bal mơ Yàng Jehôwa,’ mơ rơp tơmoh bơh sơnđan Israel.”

Yàng Jehôwa, ò di rùp ràk

⁶ Yàng Jehôwa la cau Bơtau At Bồ mơ la Bơtau Dong Tơwài Israel dê, la Yàng Jehôwa Gơnap Gơnoar Dờng đơs be do: “Añ la Bơtau sơnròp mơ Añ la Bơtau lồi dut; rlau mơ Añ ò gơs Yàng Tom Trồ lơi.

⁷ Ñcau la ndròm bal be Añ taih? Lòi bol khai yal tơnggit tĕ. Lòi bol khai yal tơnggit mơ ơn gơ di đap Añ. Ñcau neh yal lài bơh ală bơta bơh yau tus tŭ do taih? Lòi bol khai yal bol hi in ală bơta gam gơlik gơs.

⁸ Bañ rơm să, bañ rngòt. Añ ò di neh yal mơ mê bơh yau òr mơ yal tơnggit gơ ò ơ? Bol mê la cau lơh cơng Añ jê. Gơs Yàng Tom Trồ lơi ndai tai rlau mơ Añ sơl? Ò gơs pơnai lŭ lơi ndai; Añ git ò gơs dô nơm lơi ndai!”

⁹ Jơh ală cau chài lơh rùp ràk la roh lơm, ală phan bol khai kòñ gơboh la ò kwơ dô êt lơi. Ală cau lơh cơng bol khai dê ò gŏ mơ kung ò git, behơ̆ bol khai rơp gơkòl tòm bơta ƀàssìl ƀàsso.

¹⁰ Cau mòn gơs dô nơm rùp yàng mơ tŏ gơs dô nơm rùp ràk hơ̆ la lơh ò niam ơ?

¹¹ Sền ne, jơh ală cau bal mơ khai rơp gơkòl tòm bơta ƀàssìl; ală cau chài lơh ală phan hơ̆ mìng la kòn mơnus lơm! Lòi jơh ală bol khai pơjum bal mơ ntào bal! Bol khai rơp gơkòl rngòt rơm să mơ ƀàssìl.

¹² Cau chài tiar mòn gơ mơ lơh broă hơđang ồs rnga; teh gơ mơ mut mòn gơs dô nơm rùp ràk, drèp gơ mơ tơwòr tê pràn khai dê. Khai jơgloh mơ òsô tai; khai ò hùc dà mơ bòl glar.

¹³ Cau chài lơh chi ngui gai was mơ was sơnoa, ngui gai cih mơ treh gùng, khai pac mơ sùng, lơh tềl mơ phan ngui gơ dê. Khai lơh gơs rùp dô nă kòn mơnus, dô nă kòn mơnus bal mơ jơh ală bơta gơklŏ gơ dê, nàng gơ rgơi ơm sùm tòm dô nơm bơmồng.

¹⁴ Khai kơl ală chi pơnàng; hala chi pơnggŏ hala nho rề. Khai neh lòi gơhòn dờng digùl ală chi tòm brê, hala neh tam chi nho, mơ mìu lơh gơ in hòn dờng.

¹⁵ Hơ̆ la lòng khai ngui nàng sing ồs; ƀà ngui nàng ñjơr ram. Khai ngui gơ sing ồs nàng buh piang lă. Mơya khai kung lơh gơs dô nă yàng mơ duh khoai, khai lơh gơs dô nơm rùp ràk mơ cùn khoai di đap gơ.

¹⁶ Nggùl ală chi hơ̆ khai ngui nàng sing ồs, hơđang ồs hơ̆ khai gơm phan sa, khai buh poac mơ sa hòm. Khai kung ñjơr ồs nàng ram să khai, mơ đơs lah: “Ah, añ ñjơr ram; añ sền gŏ lơmpiat ồs!”

¹⁷ Lòng gam wơl, khai lơh gơs dô nă yàng, hơ̆ la rùp ràk khai dê; khai cùn di đap gơ mơ duh khoai. Khai hòi dan mơ đơs lah: “Dan dong klàs añ, kơnràñ la yàng añ jê.”

¹⁸ Bol khai ò git bơta lơi, bol khai ò git wă bơta lơi; gar mat bol khai gơkòl lềt wơl gen tàng bol khai ò rgơi gŏ, nùs tồr bol khai gơkòl kal wơl gen tàng bol khai ò rgơi git wă.

¹⁹ Ò gơs cau lơi ơm wơl mơ kơlôi sơnơng, ò gơs cau lơi gơs bơta git jak hala git wă nàng đơs lah: “Añ neh ai nggùl lòng hơ̆ mơ sing ồs; añ kung neh buh piang lă hơđang ồs rnga gơ dê; neh buh poac mơ neh sa rau; pơnah gam wơl, añ ngui nàng lơh gơs dô nơm phan cù kìr sơl ơ? Añ rơp kun bồ di đap dô gơl chi sơl ơ?

²⁰ Cau hơ̆ sa bùh, nùs gơkòl pơrlồm neh lam khai lòt tìs; khai ò rgơi dong klàs să tòm khai, hala đơs lah: Ò di phan tòm tê ma añ do la phan ma blac ò ơ?”

Jơnau ho pơgon bơh bơta dong tơwài

²¹ Ơ Jakôp, kah tĕ ală bơta do, ơ Israel, bơh mê la cau duh broă Añ jê. Añ neh lơh gơs mê, mê la cau duh broă Añ jê; ơ Israel, Añ rơp ò hŭi mê.

²² Añ neh jùt sang bơta tìs glài mê dê kung be mhwal lơut, tồi glài mê dê kung be dà tŭ. Rê wơl tĕ mơ Añ, bơh Añ neh dong tơwài mê.

²³ Ơ ală tap trồ, đơs chò hòn chò tĕ, bơh Yàng Jehôwa neh lơh bơta hơ̆; Ơ ù tiah hơđơm, driau dờng tĕ! Ơ ală mơnơm, ală brê dơr bal mơ jơh ală chi che tòm hơ̆, pò tĕ jơnau mơ đơs chò! Bơh Yàng Jehôwa neh dong tơwài Jakôp. Kơnràñ ràng tơlik bơta gơklŏ Kơnràñ dê tòm Israel.

Jerusalem rơp gơs làng bol

²⁴ Yàng Jehôwa la Bơtau Dong Tơwài mê dê la Bơtau neh lơh gơs mê bơh tòm kơndul mè, đơs be do: “Añ la Yàng Jehôwa, la Bơtau neh lơh gơlik gơs jơh ală phan, mìng dô nă Añ neh lì ală tap trồ, mìng dô nă Añ neh lă plai ù.

²⁵ Añ la Bơtau neh tơnroh ală tềl ală cau gơnoar hwơr ma blac, mơ lơh ală cau đơs hwơr gơlik cau bơrngơl gơla; la Bơtau neh tă sang bơta jak chài mơ lơh cau git wă bol khai gơlik gơs tùl gơla,

²⁶ la Bơtau neh lơh gơlik gơs tòm toh be jơnau đơs ală cau duh broă Añ jê, mơ lơh gơlik di ngan ală jơnau đơs lài ală cau kong sồr Añ jê, la Bơtau neh đơs bơh Jerusalem lah: ‘Gơ rơp gơs cau ơm tòm hơ̆,’ bơh ală ƀòn dờng Juda lah: ‘Gơ rơp geh bơt bơtào, Añ rơp bơt bơtào wơl ală tiah hơ̆;’

²⁷ la Bơtau đơs mơ dà jrô lah: ‘Ro rañ tĕ, Añ rơp lơh soat ală croh dà;’

²⁸ đơs bơh Sirus lah: ‘Khai la cau ê belàt Añ jê; mơ rơp lơh gơlik gơs jơh ală bơta Añ niam nùs;’ Kơnràñ rơp đơs bơh Jerusalem lah: ‘Lòi gơ rơp geh bơt bơtào wơl,’ mơ đơs bơh hìu duh khoai lah: ‘Mơnàng mê dê rơp geh bơt.’”