Esai 40 - Sră Goh 2018

Làng bol Yàng Tom Trồ dê geh pơndòm pơniang. – Jơnau ho bơh Bơtau Mesia mơ Jerusalem pa ( 40:1 – 66:24 ) Bơta pơndòm pơniang làng bol Yàng Tom Trồ dê

¹ Yàng Tom Trồ bol mê dê đơs lah: “Pơndòm pơniang tĕ, pơndòm pơniang tĕ làng bol Añ jê.

² Đơs tĕ lơbơn niam mơ Jerusalem, mơ hòi driau mơ khai lah bơta duh broă khai dê neh tơl rau, bơta lơh glài khai dê neh geh tơm rau, khai neh dòp bơh di tê Yàng Jehôwa bàr dơ̆ rlau tài bơh jơh ală tồi glài khai dê.”

³ Gơs jơnau cau hòi driau lah: “Rcang tĕ gùng tòm ƀlàng ngềt ngơt Yàng Jehôwa in; bơsong tĕ gùng me tòm ƀlàng bràs Yàng Tom Trồ bol he in!

⁴ Kòp nơm thòng rơp geh yò tơngguh hơđang, kòp mơnơm mơ dòr rơp lơh liah, ù tiah ò ring rơp geh pơnring, ală tiah kơh tiah mơnơm rơp gơlik gơs ƀlàng ring.

⁵ Gen bơta gơklŏ Yàng Jehôwa dê rơp geh yal tơlik, jơh tơl nă kòn mơnus rơp sền gŏ bơta hơ̆, bơh bơr Yàng Jehôwa dê neh đơs behơ̆.”

⁶ Gơs jơnau đơs lah: “Hòi dờng tĕ!” Mơ añ đơs lah: “Ñchi jơnau añ rơp hòi taih?” “Jơh ală cau kung be ñhơt, jơh ală bơta gơklŏ gơ dê la kung be bơkào tòm ƀlàng.

⁷ Ñhơt ro mơ bơkào jrùh, tài bơh nhơm Yàng Jehôwa khồm hơđang gơ, ngan làng bol la ñhơt.

⁸ Ñhơt ro, bơkào jrùh; mơya jơnau đơs Yàng Tom Trồ bol he dê rơp ơm kơ̆ gam sùm sùm.”

⁹ Mê guh tĕ hơđang mơnơm jơnhoa. Ơ Siôn, Mê la cau cèng jơnau niam, ai tĕ jơh pràn tơngguh sap đơs mê dê! Ơ Jerusalem yal tĕ jơnau niam, driau dờng tĕ, bañ rngòt! Đơs tĕ mơ ală ƀòn dờng Juda dê lah: “Do la Yàng Tom Trồ bol mê dê!”

¹⁰ Sền ne, Yàng Jehôwa at bồ hơđang jơh ai gơnap gơnoar mơ tus, tơwòr tê Kơnràñ dê mơ at bồ. Sền ne, phan ƀàn Kơnràñ dê ơm mơ Kơnràñ, jền tơngai Kơnràñ dê ơm di đap Kơnràñ.

¹¹ Kơnràñ ròng siam mpồl Kơnràñ dê kung be cau ê belàt; Kơnràñ pơjum tơrgòm ală belàt kòn tòm tơwòr tê Kơnràñ dê, mơ kơnđu bol gơ rềp di nùs Kơnràñ dê; Kơnràñ tề lam dô bă lơbơn niam ală belàt me gơs kòn gam pô.

Ò gơs cau lơi ndròm mơ Yàng Tom Trồ Israel dê

¹² Ñcau neh ai kơndồm tê he mơ was dàlềng, mơ ai sơnđàm tê mơ sơnoa ală tap trồ taih? Ñcau neh ơn kơmbuh ù tòm dô nơm sơ̆, hala kơr mơnơm mơ ală dòr hơđang dô nơm phan kơr taih?

¹³ Ñcau neh git wă Hwềng Yàng Tom Trồ dê, mơ lơh gơs cau bơto sơnio Kơnràñ in taih?

¹⁴ Yàng Jehôwa neh lùp ñcau nàng lơh Kơnràñ geh àng loh, mơ bơto Kơnràñ in gùng bơta song ring dê taih? Ñcau neh bơto Kơnràñ in git jak, hala sơnio Kơnràñ in gùng bơta git wă taih?

¹⁵ Ngan, ală làng bol ò gơkrơi kung be dô tơioh dà tòm thùng; geh kòp be kơmbuh ù hơđang phan kơr; Kơnràñ kơr ală bồt pơlào kung be kơmbuh ù rhền.

¹⁶ Chi hơđang mơnơm Liban ò tơl sing ồs hơđang cơnòng duh khoai, ală phan poan jơng tềng hơ̆ kung ò tơl lơh gơs phan ơn chu duh khoai.

¹⁷ Jơh ală lơgar di đap Kơnràñ gơlơh kung be ò gơs, Kơnràñ sền bol gơ ò kwơ mơ roh lơm.

¹⁸ Behơ̆ gen bol mê rơp pơndròm Yàng Tom Trồ mơ ñcau taih? Ai rùp să lơi mơ bol mê rơp pơndròm mơ Kơnràñ taih?

¹⁹ Dô nơm rùp ràk, cau chài lơh màh ƀềp gơ mơ màh, mơ lơh ală che rơnjài mơ priă gơ in.

²⁰ Dô nă cau rƀah ò rgơi ơn phan ơn behơ̆, gen khai sac rwah chi kră ò ồm. Khai jòi cau chài pac sềr nàng mòn gơs dô nơm rùp ràk ò gơpừ.

²¹ Bol mê ò git sơl ơ? Bol mê òhềt kơno sơl ơ? Cau òhềt yal bol mê in bơh tŭ sơnròp sơl ơ? Bol mê ò git wă bơh mơnàng plai ù geh crơng gơs sơl ơ?

²² Kơnràñ ơm nggui hơđang dơwàng plai ù dê, làng bol hơđang ù gơlơh kung be srah nting. Kơnràñ pò ală tap trồ kung be bài kơrnìng, mơ lă gơ kung be dô nơm sàl nàng ơm.

²³ Kơnràñ lơh ală cau bơtau in gơlik be gòi, mơ lơh ală cau kwang at bồ tòm dunnia gơlik ò kwơ.

²⁴ Tòm tŭ bol khai pa geh tam, pa geh sih, pa hòn ryas tòm ù, gen Kơnràñ khồm hơđang bol khai mơ bol khai ñòp ro, mơ càl wac brồng cèng pơrdô bol khai kung be rhe.

²⁵ Bơtau Sàng Goh đơs lah: “Bol mê pơndròm Añ mơ ñcau, hala ñcau ndròm be Añ taih?”

²⁶ Pò tĕ mat tơnggòr sền hơđang ală tap trồ: ñcau neh crơng gơs ală phan hơ̆ taih? Hơ̆ la Bơtau neh lơh gơlik gơs ală sơmañ mơ ală khà bol gơ dê, mơ hòi bol gơ jat ală sơnđan is gơ dê; tài bơh bơta pràn Kơnràñ dê la dờng Tòm gơnap gơnoar pràn Kơnràñ dê. Ò lòi hŭi dô nơm lơi.

²⁷ Ơ Jakôp! Ñchi bơh tài mê đơs, Ơ Israel! Ñchi bơh tài mê yoam lah: “Gùng dà añ jê neh cang ndơp bơh di Yàng Jehôwa, mơ bơta song ring añ jê, ò geh Yàng Tom Trồ añ jê wèt sền ơ”?

²⁸ Mê ò git sơl ơ? Mê òhềt kơno sơl ơ? Yàng Jehôwa la Yàng Tom Trồ kis gam sùm sùm, la Bơtau Crơng Gơs ală tiah lồi dut plai ù dê. Kơnràñ ò bòl ò glar, bơta git wă Kơnràñ dê ò gơs cau lơi rgơi jòi bàn.

²⁹ Kơnràñ ai pràn cau bòl glar in, ai bơtơl gơnoar pràn cau lơbơn òsô in.

³⁰ Bulah ơruh pơnu rơp bòl rơp glar, bulah ală klau pơnu rơp gơtup pừ.

³¹ Mơya cau lơi gơn kơnòm di Yàng Jehôwa gen rơp geh pràn pa, bol khai rơp pò pơnđar par jơnhoa hơđang kung be klàng bung; bol khai rơp ntoat mơ ò bòl glar, bol khai rơp lòt mơ ò lơgah lơgañ.