Esai 38 - Sră Goh 2018

Ejekia kòp jê mơ geh sơmbòi. – Jơnau khai jòng ro Yàng

¹ Tòm ală ngai hơ̆, Ejekia gơlik kòp jê mòr chơt. Cau gơnoar hwơr Esai, kòn klau Amôs dê, lòt tus hơ khai mơ đơs lah: “Yàng Jehôwa đơs be do; ‘Rơndap tĕ ală bơta tòm hìu mê dê, bơh mê rơp chơt, ò geh sơmbòi.’”

² Gen Ejekia wèt mat di dơrñang hìu mơ hòi dan mơ Yàng Jehôwa lah:

³ “Khoai Yàng Jehôwa, añ rac dan mơ Yàng, dan kah wơl mbe añ neh dòn song dô bă jơh nùs cơnđòa lòt di đap Yàng, mơ neh lơh ală broă niam di đap Kơnràñ!” Chòp, Ejekia ñìm rac sràt bơtang ngan.

⁴ Gen gơs jơnau Yàng Jehôwa đơs mơ Esai lah:

⁵ “Lòt tĕ đơs mơ Ejekia lah: Yàng Jehôwa la Yàng Tom Trồ Dabit, ồng pàng mê dê, đơs be do: ‘Añ neh kơno jơnau hòi dan mê dê mơ neh gŏ dà mat mê dê, Añ rơp ai bơtơl rài kis mê in jơt pram nam tai.

⁶ Añ rơp dong tă mê bal mơ ƀòn dờng do klàs bơh di tê bơtau Asiri, mơ Añ rơp cang kìng ƀòn dờng do.’

⁷ Do la tềl Yàng Jehôwa ai mê in nàng đal git Yàng Jehôwa rơp lơh jat jơnau Kơnràñ neh ho:

⁸ Sền Añ rơp lơh mƀur mattơngai gơsơrkềng hơđang jơ sền mơ mattơngai Aca dê gơruc wơl jơt kơnă.” Behơ̆ mattơngai ruc wơl hơđang jơ sền mơ mattơngai jơt kơnă bơh di tiah gơ neh sơrkềng.

Bơta đơs chò jòng ro Yàng Ejekia dê

⁹ Do la jơnau Ejekia, bơtau Juda dê, cih tơnơ̆ mơ tŭ kòp jê mơ geh sơmbòi:

¹⁰ Añ neh đơs: “Tòm tŭ nggùl rài kis, añ pal lik lòt; añ neh geh jào tus hơ mpồng lơgar làng ƀồc, tòm ală nam gam wơl añ jê.”

¹¹ Añ neh đơs: “Añ rơp ò tai gŏ Yàng Jehôwa tòm ù cau kis dê; añ rơp ò tai sền gŏ jơi kòn mơnus digùl ală cau tòm lơgar dunnia.

¹² Tiah ơm añ jê kòl tă tơlik bơh di añ kung be dô nơm sàl cau ê belàt dê. Añ neh pồt wơl rài kis añ jê, kung be cau chài tàñ ồi pồt ồi; Yàng neh koh añ bơh bơta lu li; bơh ngai tus di mang, Yàng cèng añ tus dô bă tiah lồi dut.

¹³ Añ ñìm rac bơta dong kòl jơl tus àng drim; be dô nơm klìu triă neh dơrpă jơh ală ntìng añ; bơh ngai tus di mang, Yàng cèng añ tus di tiah lồi dut.

¹⁴ Añ rơnđơh kung be sềm rgut; añ pơt wòl kung be sềm ntòp. Gar mat añ bòl glar tài bơh sền tơnggòr hơđang.” “Ơ Yàng Jehôwa, añ kong rồn bơklơn; dan Yàng dong tă añ!

¹⁵ Mơya, ñchi añ rgơi đơs taih? Bơh Kơnràñ neh đơs mơ añ, mơ să tòm Kơnràñ neh lơh bơta do. Bơta bic añ jê neh dô jơh, tài bơh bơta sràt bơtang tòm hwềng soàn añ.

¹⁶ Ơ Yàng, cau geh kis la kơnòm di ală bơta hơ̆; mơ tòm ală bơta hơ̆ la bơta kis hwềng soàn añ jê. Ơ Yàng dan bơtào wơl añ nàng sơmbòi añ, mơ lơh añ in kis.”

¹⁷ Ngan, añ kong bơta jê sồt moat jrùng añ jê, hơ̆ la bơta lơngai lơngò añ in; mơya Yàng neh sơmbat wơl rài kis añ jê, klàs bơh trồm jrô tơnroh; Yàng neh sơrbì jơh ală tồi glài añ jê, đah ngkòi Kơnràñ dê.

¹⁸ Lơgar làng ƀồc ò rgơi jòng ro Yàng, bơta chơt ò rgơi đơs chò jòng Yàng; ală cau neh mù tòm trồm jrô rau ò rgơi gơn kơnòm di bơta dòn song Kơnràñ dê.

¹⁹ Ală cau kis, mìng cau kis; bol khai jòng ro Kơnràñ kung be añ lơh ngai do; cau bèp rơp yal kòn sau khai in git bơta dòn song Kơnràñ dê.

²⁰ Yàng Jehôwa rơp dong klàs añ, bol hi rơp pĕ kơñi mơ đơs chò, jơh ală ngai tòm rài bol hi dê, tòm hìu duh khoai Yàng Jehôwa dê.

²¹ Tŭ hơ̆ Esai neh đơs lah: “Ai tĕ dô nơm ƀañ chi ƀal ơn hơđang toh mồr gen khai rơp geh bòi.”

²² Ejekia kung neh lùp lah: “Gơs tềl lơi ai añ in git la añ rơp geh guh hơ hìu duh khoai Yàng Jehôwa taih?”