Esai 37 - Sră Goh 2018

Jơnau yal lài bơh bơta dong tă Jerusalem

¹ Tòm tŭ bơtau Ejekia kơno jơnau hơ̆ gen crè ào khai dê, soh ƀào sơnò kiat, mơ mut tòm hìu duh khoai Yàng Jehôwa dê.

² Bơtau sồr Eliakim la cau kwang at bồ gơlang, Sepna la cau gơnoar cih mơ ală cau gơnoar at bồ ơn phan duh khoai jòng sơnam, jơh tơl nă soh ƀào sơnò kiat, tus hơ cau gơnoar hwơr Esai, kòn klau Amôs dê.

³ Bol khai đơs mơ khai lah: “Bơtau Ejekia đơs be do: ‘Ngai do la dô ngai rung rài, lah pơrhơng, mơ ƀàssìl; kung be neh tus di tŭ deh kòn rau mơya ò tơl pràn nàng deh.

⁴ Digơlan Jehôwa Yàng Tom Trồ ồng dê neh kơno ală jơnau đơs Rapsake dê mơ cau tòm khai la bơtau Asiri neh sồr tus nàng bơrsèl tơnhial di Yàng Tom Trồ gam kis sùm sùm; Kơnràñ rơp lơh glài khai jat be ală jơnau Jehôwa Yàng Tom Trồ ồng dê neh kơno. Behơ̆ gen hòi dan tĕ ală cau gam ơm wơl mơ gam kis in!’”

⁵ Tòm tŭ ală cau duh broă bơtau Ejekia dê tus mơ Esai,

⁶ gen Esai đơs mơ bol khai lah: “Đơs tĕ mơ cau tòm bol mê dê lah: ‘Do la jơnau đơs Yàng Jehôwa dê: “Bañ rngòt bơh ală jơnau mê neh kơno, la jơnau ală dĭ gơna bơtau Asiri dê ngui nàng đơs tràl sơrbil di Añ.

⁷ Iat tĕ do, Añ rơp ơn dô nơm hwềng tòm khai nàng tòm tŭ khai kơno dô jơnau yal gen khai rơp rê wơl hơ lơgar tòm khai dê; tềng hơ̆ Añ rơp lơh khai in gơplơ̆ hơđơm lơmpiat đào.”’”

⁸ Rapsake rê wơl, kơno la bơtau Asiri neh lik bơh Lakis, mơ bơtau neh lòt tòmlơh mơ Lipna.

⁹ Tòm tŭ hơ̆ bơtau Asiri neh kơno jơnau yal lah Tirhaka, la bơtau Ethiôpi dê neh lik lòt nàng tòmlơh mơ bơtau; gen khai sồr ală cau kong sồr lòt tus đơs mơ Ejekia ală jơnau do:

¹⁰ “Đơs tĕ mơ Ejekia, bơtau Juda dê lah: ‘Bañ lòi Yàng Tom Trồ mơ mê dòn kơnòm pơrlồm mê tòm tŭ đơs lah: Jerusalem rơp ò phi tòm tê bơtau Asiri dê.

¹¹ Ngan, bơtau neh kơno ală bơta mơ ală cau bơtau Asiri neh lơh di jơh ală lơgar, tơnroh bol gơ jơh hir; ai bơtau gen rơp geh dong tă sơl ơ!

¹² Ală yàng ală lơgar dê mơ ồng pàng añ jê neh tơnroh, la ală yàng Gôjan, Caran, Rejep dê, bal mơ làng bol Eden ơm tòm Tellassar, rgơi dong tă bol khai sơl?

¹³ Ntềng đah bơtau Hamas, bơtau Arpat, bơtau ƀòn dờng Sepharbaim hala ƀòn dờng Hena mơ Iwa dê taih?’”

Ejekia hòi dan mơ Yàng Tom Trồ

¹⁴ Ejekia neh dòp sră pơyoa bơh tê cau kong sồr lòt mơ sền gơ, lồc behơ̆ khai guh hơ hìu duh khoai Yàng Jehôwa mơ pò sră hơ̆ di đap Yàng Jehôwa.

¹⁵ Ejekia hòi dan mơ Yàng Jehôwa lah:

¹⁶ “Ơ Yàng Jehôwa Gơnap Gơnoar Dờng la Yàng Tom Trồ Israel dê, la Bơtau nggui hơđang sơbàn digùl ală ceruƀim, mìng dô nă Kơnràñ la Yàng Tom Trồ hơđang ală lơgar tòm ù. Kơnràñ neh crơng gơs trồ mơ tiah.

¹⁷ Ơ Yàng Jehôwa, dan ai tồr iat! Khoai Yàng Jehôwa, dan pò mat mơ sền! Dan iat jơh ală jơnau mơ Sennacerip neh sồr nàng lah sơrpah di Yàng Tom Trồ gam kis sùm sùm!

¹⁸ Khoai Yàng Jehôwa, ngan la ală cau bơtau Asiri neh tơnroh ală làng bol do mơ phà tơrlah ală lơgar bol khai dê,

¹⁹ sơrbì ală yàng bol khai dê tòm ồs mơ tơnroh jơh tài bơh bol gơ ò di la ală yàng ngan, mơya mìng chi mơ lŭ bơh tê kòn mơnus mòn gơs.

²⁰ Tŭ do, khoai Jehôwa Yàng Tom Trồ bol hi dê, dan dong tă bol hi klàs bơh di tê khai dê, tồ jơh ală lơgar tòm plai ù rơp git mìng dô nă Kơnràñ lơm, khoai Yàng Jehôwa, la Yàng Tom Trồ.”

Sennacerip kong alah

²¹ Gen Esai, kòn klau Amôs dê, pơyoa jơnau yal tus hơ bơtau Ejekia lah: “Do la jơnau đơs Jehôwa Yàng Tom Trồ Israel dê: Tài bơh mê neh hòi dan mơ Añ bơh jơnau Sennacerip, bơtau Asiri;

²² gen do la jơnau Yàng Jehôwa neh đơs tòmdră mơ khai: ‘Cau ơruh dềt Siôn dê sền òsơp mơ dơñŏ tơnhial di mê. Kòn ùr Jerusalem rơnggô bồ bơh ngkòi mê.

²³ Mê neh lah sơrpah mơ đơs tràl sơrbil di ñcau taih? Mê neh dờng bơr tòmdră mơ pò mat jòng să mơ ñcau taih? Hơ̆ la tòmdră mơ Bơtau Sàng Goh Israel dê?

²⁴ Mê neh ngui ală cau duh broă mê dê nàng lah sơrpah di Yàng Jehôwa. Mê neh đơs lah: “Añ cèng gal ngan rơndeh lòs tòmlơh mơ neh guh hơđang ală bồ mơnơm, la tiah jơnhoa hơđang rlau jơh Liban dê. Añ neh kơl ală chi pơnàng jơnhoa ngan, ală chi nho rề niam rlau jơh gơ dê. Añ neh guh jơnhoa rlau jơh, tus hơ tiah dơr brê ryŭ ryùm gơ dê.

²⁵ Añ neh tò ală tơrlung mơ neh hùc dà. Añ neh lơh rañ rsơh mơ kơndòl jơng añ jê, jơh ală croh dà Ejiptơ dê.”

²⁶ Mê òhềt kơno ơ? Añ neh lơh nền bơta hơ̆ bơh jŏ rau, Añ neh rơndap bơta hơ̆ bơh rài yau òr; tŭ do Añ neh lơh gơlik gơs, la mê neh lơh ală ƀòn dờng kơ̆ cê gơlik gơs ală gơnru lề lac ngềt ngơt.

²⁷ Làng bol ơm tòm ƀòn hơ̆ neh roh gơnoar, gơdô nùs mơ kong ƀàssìl. Bol khai kung be ală chi che tòm ƀlàng, kung be ală sơmbut lơbơn mơ tơlir, kung be ñhơt hòn hơđang rkàng hìu, ñòp ro lài mơ tŭ gơhòn dờng.

²⁸ Mơya Añ git tŭ mê ñă ntào, mơ tŭ mê nggui, tŭ mê lik mơ tŭ mê mut, mơ tŭ mê gơhào gơjrañ tòmdră di Añ.

²⁹ Tài bơh mê gơhào gơjrañ tòmdră di Añ, mơ jơnau pơnhừ să mê dê neh tus di tồr Añ, gen Añ rơp ơn kơlnĕ Añ jê kwĕ di muh mê, mơ ơn che kèp Añ jê gla di bơr mê, Añ rơp lơh mê in rê wơl jat gùng mê neh lòt tus.’

³⁰ Ơ Ejekia, do rơp la tềl sơnio mê in; Tòm nam do mê rơp sa plai đo hòn is gơ dê, nam tơnơ̆ gam sa phan gơhòn bơh hơ̆. Mơya tus di nam dơ̆ pe, tùc tam tĕ mơ toès kac, tam ală suơn ño mơ sa plai gơ dê.

³¹ Dô dơ̆ tai dô pơnah gam wơl bơh hìu Juda dê, rơp sro ryas hơđơm mơ gơlik plai hơđang.

³² Bơh dô pơnah gam wơl rơp lik bơh Jerusalem, mơ dô mpồl cau gam kis rơp lik bơh mơnơm Siôn. Nùs ngac ngar Yàng Jehôwa Gơnap Gơnoar Dờng dê rơp lơh gơlik gơs bơta hơ̆.

³³ Behơ̆ tàng, do la jơnau Yàng Jehôwa đơs bơh bơtau Asiri: ‘Khai rơp ò mut tòm ƀòn dờng do, kung ò pañ dô nơm kam lơi tềng do, khai rơp ò ngui khèl nàng tus di đap gơ, kung ò bơt dơrñang gơrwàng gùt dar gơ.

³⁴ Khai rơp rê wơl jat gùng khai neh tus, khai rơp ò mut tòm ƀòn dờng do,’ Yàng Jehôwa đơs behơ̆.

³⁵ Añ rơp dong gàr ƀòn dờng do mơ dong tă gơ, tài bơh Añ mơ tài bơh Dabit la cau duh broă Añ jê!”

Bơta chơt Sennacerip dê

³⁶ Gen cau gơnrơh Yàng Jehôwa dê mut tòm sàl ling cau Asiri dê mơ tơnchơt dô rhiang phàm jơt pram rbô nă cau. Tòm tŭ rìng àng drim gŏ bol khai neh chơt jơh.

³⁷ Behơ̆ Sennacerip, bơtau Asiri lòi tiah hơ̆ mơ rê hìu mơ ơm tòm Ninibe.

³⁸ Tòm tŭ khai ơm duh khoai tòm bơmồng Nisrok yàng khai dê, ală kòn klau khai dê la Adrammelek mơ Sarejer tơnchơt khai mơ đào, mơ bol khai dô pleh tòm lơgar Ararat. Gen kòn klau khai dê la Esarhadôn pơrdòn sơbàn khai.