Esai 32 - Sră Goh 2018

Jơnau yal lài bơh lơgar bơta song ring dê

¹ Sền ne, dô nă cau bơtau rơp at bồ tòm bơta song ring, ală cau kwang rơp at bồ mơ bơta song ring.

² Kòp nă bol khai rơp kung be dô bă tiah kìng crŭ bơh di càl mơ la jơm gòm bơh di càl rbut, kung be croh dà tòm dô bă tiah rañ rsơh, mơ kung be mƀur pơnai lŭ dờng tòm ù tiah ro rañ.

³ Gen mat cau sền gŏ rơp ò ñềm wơl, ală tồr cau iat rơp kơno loh làng.

⁴ Nùs tồr cau sơrbac sơrbang rơp gơs bơta àng loh nàng cahrña, mơ ală lơmpiat cau gă rơp đơs ƀuơn soh mơ loh làng.

⁵ Dô nă cau tùl gơla rơp ò tai geh sơnđan la cau màng ryŭ, hala dô nă cau lac lèo ò gơs cau lơi ki ngàm.

⁶ Bơh cau bơrngơl gơla đơs jơnau tùl gơla, nùs nhơm bol khai bơtào kai gơrmơ̆i iơh bơsak. Khai lơh bơta ò duh rngòt mơ đơs jơnau tràl sơrbil dê Yàng Jehôwa; khai lòi cau jơgloh ơm kơndul gòi mơ ò ai dà cau tơhìr in hùc.

⁷ Cau lac lèo ngui ală bơta lac lèo, khai bơtào gơs ală kai gơrmơ̆i iơh, ai ală jơnau đơs blac nàng tơnroh cau rƀah lơòi, bulah tòm tŭ jơnau rac dan cau siơ̆u siar dê la di ngan.

⁸ Mơya cau màng ryŭ bơtào gơs ală bơta màng ryŭ, mơ bol khai ntào kơ̆ hơđang ală broă màng ryŭ.

Jơnau yal tơnggit ală cau ùr jòng să bơh bơta rung rài

⁹ Ơ bol ai la ală cau ùr kơlôi hừh nùs is, guh tĕ mơ iat jơnau Añ! Ơ bol ai la ală kòn ùr kơlôi neh hừh nùs, iat tĕ jơnau Añ đơs!

¹⁰ Tòm dô nam mơ dô êt ngai tai, bol ai rơp rơm să, bol ai la ală cau lơh hừh nùs is; bơh kơnhai pic plai ño rơp roh, mơ kơnhai pic plai rơp ò tus tai.

¹¹ Rơm să tĕ, bol ai la ală cau ùr ơm lơngai! Rngòt rơm să tĕ, bol ai la ală kòn ùr kơlôi geh hừh nùs! Hồ tĕ ồi ào bol ai dê mơ ơm să kuh; soh tĕ ƀào sơnò kiat gùt dar but.

¹² Tur tĕ ntơh bol ai dê, tài bơh ƀlàng sre brê ù niam, bơh ală tòm ño bềng plai.

¹³ Bơh ù tiah làng bol Añ jê gơs tòm lò mơ lò mrơt hòn dờng; ơi, bơh jơh ală hìu chò hòp mơ tòm ƀòn dờng hòn chò.

¹⁴ Gơlang rơp kòl sang lòi, ƀòn dờng gal cau rơp kòl sang lòi ngềt ngơt, dòr mơ theng kơp gàr rơp gơlik trồm lòi srau gòi gam sùm sùm, tiah ală ơseh alàng hòn chò, dô nơm ƀlàng ñhơt ală mpồl phan poan jơng in sa.

¹⁵ Jơl tus di tŭ Hwềng bơh tiah jơnhoa tuh hơđang bol he, mơ ƀlàng ngềt ngơt gơlik gơs sre bềng plai, mơ sre bềng plai gơlik gơs be dơr brê.

¹⁶ Bơta song ngan rơp ơm tòm ƀlàng ngềt ngơt, bơta song ring ơm tòm sre bềng plai.

¹⁷ Cồng nha bơta song ring dê la bơta ring lơngai, plai đo bơta song ring dê rơp la ring ngềt mơ dòn kơnòm gam sùm sùm.

¹⁸ Làng bol Añ jê rơp kis tòm tiah ring lơngai, ơm tòm tiah lơngap lơngai, mơ tòm tiah ơm rlô ring ngềt.

¹⁹ Dơr brê rơp roh jơh hir, mơ ală ƀòn dờng rơp kòl tơrlơm jơh.

²⁰ Lơngai bol mê in tòm tŭ sih gar rềp di kòp nơm croh dà, mơ lòi ală kơnrồ mơ alàng lòt sa ñhơt khat gơboh.