Esai 28 - Sră Goh 2018

Jơnau đơs hwơr tòmdră mơ Israel, Asiri, mơ Ejiptơ ( 28:1 – 35:10 ) Bòl glar Epraim in

¹ Bòl glar dơwàng bơkào jòng să ală cau bơñul ñô Epraim dê, bòl glar bơkào mhar ro jrùh la bơta hàng mơnĕ gơklŏ gơ dê, ơm hơđang bồ ală cau lơmă bơh phan sa bơkah, ală cau neh gơpừ tài bơh tơrnòm ño!

² Do, Yàng Jehôwa gơs dô nă cau gơs gơnap gơnoar mơ pràn kơldang; be càl rbut dờng mơ mìu piar, dô bơta tơnroh bơh càl dờng; be dà kŏ bam làm bă tiah. Tê Kơnràñ dê sơrbì bol khai tòm ù.

³ Sơgơn dơwàng bơkào jòng să ală cau bơñul ñô Epraim dê, rơp kòl jă lề hơđơm mpàng jơng.

⁴ Dơwàng bơkào mhar ro jrùh la bơta hàng mơnĕ gơklŏ gơ dê, ơm hơđang bồ ală cau lơmă bơh phan sa bơkah, rơp gơlik kung be dô nai plai ƀal dum lài mơ tŭ tus kơnhai duh; cau lơi gŏ gơ gen ai tê pic mơ sa mo.

⁵ Tòm ngai hơ̆, Yàng Jehôwa Gơnap Gơnoar Dờng rơp gơlik gơs sơgơn gơklŏ, mơ sơgơn bơkào hàng mơnĕ làng bol gam wơl Kơnràñ dê.

⁶ Kơnràñ rơp la hwềng song ring cau lơi in nggui di tiah cahrña, bơta pràn kơldang cau lơi in tòmlơh di mpồng ƀòn dờng.

⁷ Mơ ală cau do kung gơsèng bơh tơrnòm ño, gơpơyơng bơh tơrnòm pràn: Cau gơnoar ơn phan duh khoai mơ cau gơnoar hwơr lòt gơtòmsèng bơh tơrnòm pràn, bơñul ñô tơrnòm ño; bol khai sơwing bồ tài bơh tơrnòm pràn, bol khai lu li tòm tŭ sền ală bơta gơtơnggŏ, bol khai gơtup tìs tòm tŭ cahrña.

⁸ Bol khai gơbruh hă ƀơ̆ ƀơl hơđang jơh ală cơnòng yò sào, ò gam tiah lơi goh tai.

⁹ “Ñcau khai rơp bơto bơta git wă taih? Ñcau khai rơp yal tơlik jơnau bơto sồr khai dê taih? Bơto ală kòn dềt pa sang toh, ală kòn se pa lòi pô ơ?”

¹⁰ Bơh hơ̆ lah: “Jơnau sồr bơtơl jơnau sồr, jơnau sồr bơtơl jơnau sồr, sèng bơtơl sèng, sèng bơtơl sèng, dô êt tềng do, dô êt tềng ne.”

¹¹ Gen tàng Yàng Jehôwa rơp ngui sơndồi cau lơgar bơdìh mơ jơnau đơs krơi is nàng đơs mơ làng bol do.

¹² Kơnràñ neh đơs mơ bol khai lah: “Do la tiah rlô bòl, lòi tĕ ală cau bòl glar rlô bòl: do la tiah ơm ring ngềt.” Mơya bol khai ò bài iat.

¹³ Gen tàng jơnau Yàng Jehôwa rơp gơlik gơs bol khai in: “Jơnau sồr hơđang jơnau sồr, jơnau sồr hơđang jơnau sồr; sèng hơđang sèng, sèng hơđang sèng; dô êt tềng do, dô êt tềng ne.” Tồ bol khai rơp lòt mơ gơpừ sơrplàng, kong bơcah lề, yar dă, mơ kòl kup cèng pơrdô.

¹⁴ Gen tàng, iat tĕ jơnau đơs Yàng Jehôwa dê, ơ bol mê la ală cau jak bơrsèl tơnhial, la cau at bồ làng bol do tòm Jerusalem.

¹⁵ Tài bơh bol mê neh đơs lah: “Bol hi neh bơt bơtào dô bơta ho bal mơ bơta chơt, mơ gơs dô nùs bal mơ lơgar làng ƀồc. Tòm tŭ bơta rung rài tơnroh lòt gan mhar, gơ rơp ò tus di bol hi, bơh bol hi ngui bơta đơs blac lơh gơs tiah kìng crŭ, mơ ai bơta ma blac lơh gơs tiah pồn să.”

¹⁶ Behơ̆ tàng, Yàng Jehôwa la Yàng Tom Trồ đơs be do: “Do, Añ ơn tòm Siôn dô pơnai lŭ mơnàng hìu, dô pơnai lŭ neh kong lòng, dô nơm lŭ mum hìu màng ngan nàng lơh kơ̆ nền mơnàng; cau lơi dòn kơnòm gen rơp ò rngòt rngơt.

¹⁷ Añ rơp ai bơta song ngan lơh gơs che rnoas, mơ bơta song ring lơh gơs plai kơr sơnoa; mìu piar rơp tơnroh tiah kìng crŭ ală bơta đơs blac, mơ dà rơp kŏ tiah pồn să bol mê dê.”

¹⁸ Bơta ho bal mơ bơta chơt bol mê rơp kòl tơnroh, bơta bol mê dô nùs bal mơ lơgar làng ƀồc rơp ò gam ntào kơ̆. Tòm tŭ bơta rung rài tơnroh lòt gan, gen bol mê rơp kong gơ jă tơnlề.

¹⁹ Kòp dơ̆ bơta rung rài lòt gan gơ rơp cèng pơrdô bol mê; àng drim do tus àng drim ne, tòm trồ ngai mơ tòm trồ mang, bơta rung rài gơ rơp lòt gan. Mìng bơta rngòt rngơt rgơi lơh bol mê in git wă jơnau bơto sồr do.

²⁰ Cơnòng bic liah ngan ò rgơi bic rò jơng, ồi tơ̆ dềt ngan ò tơl pùt să bol mê.

²¹ Bơh Yàng Jehôwa rơp guh kung be hơđang mơnơm Perajim, Kơnràñ rơp gơhào gơjrañ be tòm thòng Gabaôn, nàng lơh broă Kơnràñ dê la broă krơi is, mơ lơh broă lơh Kơnràñ dê la broă lơh crih crài.

²² Gen tàng tŭ do, bañ bơrsèl tơnhial tai, rngòt che kơt bol mê rơp sơlo pràn rlau mòn! Bơh añ neh kơno dô jơnau gơnoar sồr tơnroh hơđang làm jơh ù tiah do, bơh di Yàng la Yàng Jehôwa Gơnap Gơnoar Dờng.

²³ Ơn tồr iat tĕ jơnau añ; kơrhia tĕ mơ iat jơnau añ đơs.

²⁴ Cau lơòr sre nàng sih kòi, ò di pơnjat lơòr sùm ò ơ? Khai ò di kư̆ pơnjat pŏ mơ tơnrài ù ò ơ?

²⁵ Tòm tŭ khai neh pơnring ù rau, gen khai ò di sih gar kòi ò ơ? Khai ò di tùc kòi mi di tiah rcang gơ in, kòi kròng di tiah lòi gơ in, mơ kòi pràng di tiah ơn is gơ in ò ơ?

²⁶ Hơ̆ la Yàng Tom Trồ neh nting sồr mơ bơto bol khai git gùng pal lơh.

²⁷ Kòi mi ò jă rlai mơ rơndeh kơnrồ, kòi pràng ò di pơrjòt mơ kong rơndeh kơnrồ; mơya kòi mi pal pù mơ gai, ai kòi pràng pal pòng mơ mơng.

²⁸ Kòi mi pal piah nàng trŭ gơs piang, cau ò di kư̆ pơrjòt gơ sùm sùm. Bulah khai ngui rpu kơnrồ nàng pơrjòt kòi, rpu kơnrồ khai dê ò jă tơnlề gar kòi.

²⁹ Jơh ală bơta hơ̆ kung tus bơh Yàng Jehôwa Gơnap Gơnoar Dờng, tơnggume broă Kơnràñ dê crih crài, mơ jak chài lin rlau jơh.