Esai 16 - Sră Goh 2018

¹ Pơyoa tĕ ală belàt kòn cau at bồ tòm lơgar in, bơh Sela gan ƀlàng ngềt ngơt, tus hơ mơnơm kòn ùr Siôn dê.

² Tòm ală tiah thòl Arnôn dê ală kòn ùr Môap kòl bơtrơh tơlik be mpồl sềm par nrah nring bơh rsòn.

³ Bol khai hòi dan bơta dong tă: “Dan ai jơnau bơto, dan bơta song ngan. Digùl ngai, jơm mƀur mê dê be trồ mang. Pồn tĕ ală cau gơkòl sang lòi, bañ yă ală cau kòl bơtrơh tơlik.

⁴ Lòi tĕ ală cau ntoat dô Môap dê ơm digùl bol mê; lơh gơs tĕ tiah kìng crŭ bol khai in klàs bơh di cau tơnroh.” Tòm tŭ cau rồn bơklơn ò gam tai, gen bơta tơnroh rơp lồi mơ cau jă trơm rơp kòl tơnroh bơh di lơgar.

⁵ Gen dô nơm sơbàn rơp geh bơt bơtào tòm bơta kòñ gơboh kơ̆ dơn tòm sàl Dabit dê, bơta dòn song rơp nggui hơđang hơ̆, dô nă cau at bồ rơp jòi bơta song ring mơ sơrbac sơrbang lơh bơta di ngan.

⁶ Bol he neh kơno bơh bơta pơnhừ să Môap dê, bơta pơnhừ să ir mơ bơta jòng să, bơta pơnhừ să mơ bơta tràl sơrbil khai dê, mơya ală bơta jòng să khai dê la ò kwơ.

⁷ Gen tàng cau Môap rơp ñìm rac, jơh tơl nă ñìm rac bơh Môap. Pơt wòl tĕ mơ moat jrùng bơh piang lă plai ño Kir Hareset dê.

⁸ Bơh ală ƀlàng sre Hesbôn dê ro rañ, mơ ală tòm ño tòm Sipma kung behơ̆. Ală cau cap tơrgòm dô bă nàng lơh phan ñô ală cau at bồ ală lơgar neh tus bơh Jajer, mơ neh nrah tus hơ ƀlàng ngềt ngơt. Ală sơmbut gơcat ngài tus hơ dàlềng.

⁹ Gen tàng añ ñìm bal mơ bơta ñìm rac Jajer dê ñìm bơh ală tòm ño Sipma dê. Ơ Hesbôn, ơ Eleale, Añ rơp tuh hơđang bol mê mơ dà mat Añ jê! Bơh jơnau driau dờng hòn chò tòm kơnhai pic plai, mơ kơnhai toès kòi bol mê dê neh lồi rau.

¹⁰ Bơta chò hòp chò hòn neh tă tơlik bơh ală suơn sa plai; mơ tòm suơn ño ò gơs cau lơi đơs chò hala driau chò; ò gơs cau lơi pơrjă plai ño tòm tiah mpal pat tơrnòm, bơh Añ neh pơndut jơnau driau chò ală cau pơrjă ño dê.

¹¹ Nùs Añ tài bơh Môap mơ rac ròc kung be kơñi rơs, tòm hwềng nùs Añ kung behơ̆ tài bơh Kir Hareset.

¹² Tòm tŭ Môap gơs mat tòm tiah jòng jơnhoa gơ dê, khai mìng lơh bòl glar să tòm khai dê lơm; tòm tŭ khai tus tòm hìu duh khoai khai dê nàng hòi dan, bơta hơ̆ kung ò kwơ.

¹³ Hơ̆ la jơnau mơ Yàng Jehôwa neh đơs bơh Môap jŏ jòng rau.

¹⁴ Mơya tŭ do Yàng Jehôwa đơs lah: “Tòm pe nam, kung be ală nam cau lơh ơpah lơh broă, bơta gơklŏ Môap dê bal mơ mpồl làng bol oă khai dê rơp kòl sền òsơp, mơ khà mpồl cau gam kis la mìng dô êt lơm mơ òsô ò soàn.”