Ejekiel 41 - Sră Goh 2018

¹ Gen cau hơ̆ cèng añ tus hơ tiah sàng goh ngan mơ was ală jrong; đah ơnàng ală jrong dê kòp đah la pe met.

² Ơnàng gùng mut la pram met, kòp đah gơs bàr met nggùl. Khai kung was đah tiah sàng goh ngan dê; gơ gơs bàr jơt met jòng mơ jơt met ơnàng.

³ Gen khai mut tòm ơdŭ dơlam mơ was ală jrong gùng mut dê, kòp nơm gơs dô met ơnàng. Gùng mut gơs pe met jơnhoa, mơ đah jơnhoa mpồng gơs pe met, mơ ơnàng la dô met nggùl.

⁴ Mơ khai was gah jòng đah dơlam lồi dut tiah sàng goh dê, đah jòng jơt met, mơ gah ơnàng la jơt met. Khai đơs mơ añ lah: “Do la tiah sàng goh ngan.”

⁵ Gen khai was dơrñang hìu duh khoai dê; lơut pe met, mơ kòp nơm ơdŭ gùt dar hìu duh khoai ơnàng bàr met.

⁶ Ală ơdŭ di gah gơs pe tap, kòp tap gơs pe jơt nơm ơdŭ. Ală ơdŭ hơ̆ gơtup mơ dô nơm dơrñang di gah gùt dar hìu duh khoai, ngui be dô nơm ròc sơndră ală ơdŭ di gah in, nàng ală ròc sơndră hơ̆ ò càng tơƀă di dơrñang hìu duh khoai dê.

⁷ Ală ơdŭ di gah hìu duh khoai sơlo jòng hơđang gen geh bơt ơnàng rlau mơ tap hơđơm gơ. Ală ơdŭ bơt bơtào gùt dar hìu duh khoai la bơt sơlo jòng hơđang gen dơrñang sơlo wềt rlau; behơ̆ ală ơdŭ gơlik ơnàng rlau tòm tŭ guh jòng hơđang. Dô nơm ntùng gơguh bơh di tap liah hơđơm jơl tus hơ tap jòng hơđang jơh, lòt gan tap digùl.

⁸ Añ kung sền gŏ hìu duh khoai neh geh bơt hơđang mơnàng jơnhoa, gùt dar ală ơdŭ mơnàng was tơl dô nơm ròc jòng pe met.

⁹ Ală dơrñang đah bơdìh ală ơdŭ di gah lơut la bàr met nggùl. Dơrñang hơ̆ jòng rlau mơ ală ơdŭ di gah la bàr met nggùl, mơ pah gòi digùl ală ơdŭ di gah hìu duh khoai dê

¹⁰ mơ ală ơdŭ tòm ƀlàng gùt dar hìu duh khoai dê ơnàng la jơt met.

¹¹ Ală mpồng ơdŭ di gah pò tơlik wèt hơ đah ù lòi gòi, dô nơm đah đang mơ dô nơm đah đơm; mơ pơnah ù lòi gòi hơ̆ ơnàng bàr met nggùl.

¹² Hìu ơm di đap ƀlàng hìu duh khoai dê hơ đah mattơngai mut ơnàng pe jơt pram met. Dơrñang cang gùt dar hìu hơ̆ lơut bàr met nggùl, mơ jòng la poan jơt pram met.

¹³ Gen khai was hìu duh khoai; gơ gơs jòng pram jơt met; ƀlàng hìu duh khoai, hìu bal mơ ală dơrñang gơ dê kung jòng pram jơt met.

¹⁴ Đah ơnàng đah hơđap hìu mơ ƀlàng hìu duh khoai đah mattơngai lik la pram jơt met.

¹⁵ Gen khai was đah jòng hìu bơt wèt hơ ƀlàng đah ngkòi hìu duh khoai dê, kòp bal ală ƀlàng jơng gùng dê tòm kòp đah, pram jơt met. Đah bơdìh mơ đah dơlam, ală ƀlàng bơdìh di đap ƀlàng jơng gùng dê,

¹⁶ ală mpồng mơ ală mpồng dềt mơ ală pơnggàr cang gùt dar pe tap hìu hơ̆, đah hơđap bơr mpồng jơh ală bơta geh gòm mơ mpàn gùt dar. Bơh ù tus di ală mpồng dềt mơ ală mpồng dềt geh cang wơl.

¹⁷ Hơđang mpồng, đah dơlam mơ đah bơdìh hìu duh khoai, làm ală dơrñang đah bơdìh mơ đah dơlam,

¹⁸ jơh ală cau pac ală rùp ceruƀim mơ ală chi gòl, dô nơm chi gòl digùl dô nơm ceruƀim. Kòp ceruƀim gơs bàr đah mat:

¹⁹ mat kòn mơnus wèt hơ chi gòl đah do, mơ mat klìu triă wèt hơ chi gòl đah ne. Làm jơh gùt dar hìu duh khoai geh pac rùp behơ̆ lơm.

²⁰ Bơh mơnàng hìu tus di tiah hơđang gùng mut, ceruƀim mơ chi gòl geh pac sềr hơđang dơrñang hìu duh khoai dê.

²¹ Ală dơwàng mpồng hìu duh khoai rùp poan mat mơ đah hơđap tiah sàng goh kung behơ̆ sơl.

²² Gơs dô nơm cơnòng duh khoai lơh mơ chi jơnhoa dô met nggùl mơ jòng dô met; ală mum gơ, mơnàng gơ mơ ală gah gơ dê lơh mơ chi lơm. Cau hơ̆ đơs mơ añ lah: “Do la cơnòng ơm di đap mat Yàng Jehôwa.”

²³ Hìu duh khoai mơ Tiah Sàng Goh gơs bàr nơm mpồng.

²⁴ Kòp nơm mpồng gơs bàr blah til wơl, bàr blah di kòp mpồng đah do mơ bàr blah di mpồng đah ne.

²⁵ Hơđang ală mpồng hìu duh khoai mơ geh pac rùp ceruƀim mơ tòm chi gòl, kung be neh pac hơđang ală dơrñang, mơ gơs rơng lơh mơ chi di đap mpồng rơng.

²⁶ Hơđang dơrñang ƀlàng bơdìh la ală mpồng dềt pơnggàr cang, geh pac ală rùp chi gòl bàr đah, ală ơdŭ di gah hìu duh khoai mơ rkàng tìm kung geh bơka behơ̆ sơl.