Đơs Crih 99 - Sră Goh 2018

Jòng ro Yàng Tom Trồ bơh bơta dòn song Kơnràñ dê gơwèt mơ làng bol Israel

¹ Yàng Jehôwa at bồ; ală làng bol rngòt rơm să tĕ! Kơnràñ nggui hơđang sơbàn digùl ală ceruƀim; plai ù lơnggơr tĕ!

² Yàng Jehôwa la dờng ngan tòm Siôn, Kơnràñ geh bơtào jơnhoa hơđang jơh ală làng bol.

³ Lòi bol khai jòng ro sơnđan Kơnràñ dê la sơnđan dờng ngan mơ pal rngòt ngan! Yàng la sàng goh!

⁴ Ơ Bơtau at bồ gơs gơnap gơnoar, la Bơtau kòñ gơboh di bơta song ngan, Kơnràñ neh bơtào kơ̆ bơta ring bal; Kơnràñ neh lơh jat bơta song ngan mơ bơta song ring tòm Jakôp.

⁵ Jòng ro tĕ Jehôwa Yàng Tom Trồ bol he dê, mơ duh khoai di kơrnòl jơng Kơnràñ dê. Yàng la sàng goh!

⁶ Tòm ală cau ơn phan duh khoai Kơnràñ dê gơs Môise mơ Arôn, Tòm mpồl ală cau hòi dan di sơnđan Kơnràñ dê kung gơs Samuel. Bol khai neh hòi dan di Yàng Jehôwa, mơ Kơnràñ ho wơl bol khai in.

⁷ Kơnràñ ơm tòm jrong mhwal mơ đơs mơ bol khai; Bol khai prap gàr ală jơnau sồr kràñ cê Kơnràñ dê Mơ ală bơta sồr lam mơ Kơnràñ neh ai bol khai in.

⁸ Ơ Jehôwa Yàng Tom Trồ bol hi dê, Yàng neh ho wơl bol khai in; Yàng la Yàng Tom Trồ neh toh glài bol khai in, Mơya Kơnràñ sal wơl bơh ală broă tìs bol khai neh lơh.

⁹ Jòng ro tĕ Jehôwa Yàng Tom Trồ bol he dê, Mơ duh khoai hơđang mơnơm sàng goh Kơnràñ dê; Bơh Jehôwa Yàng Tom Trồ bol he dê la sàng goh!