Đơs Crih 97 - Sră Goh 2018

Gơnoar at bồ hơđang rlau jơh Yàng Jehôwa dê

¹ Yàng Jehôwa at bồ; lòi plai ù hòn chò tĕ, Lòi jơh ală bồt pơlào chò hòp tĕ!

² Mhwal mơ bơta klam jơngo ơm gùt dar Kơnràñ; Bơta song ring mơ bơta song ngan lơh gơs mơnàng sơbàn Kơnràñ dê.

³ Ồs lòt di đap Kơnràñ, Mơ chu pơrguc ală cau sò tơm Kơnràñ bơh kòp đah.

⁴ Puhlèp Kơnràñ dê sòl pơnđàng dunnia; Plai ù gŏ gen lơnggơr.

⁵ Ală mơnơm gơhòr lề be jrềng di đap Yàng Jehôwa, Di đap Yàng jơh plai ù dê.

⁶ Ală tap trồ bơto yal bơta song ring Kơnràñ dê; Jơh ală làng bol sền gŏ bơta gơklŏ Kơnràñ dê.

⁷ Jơh ală cau duh khoai rùp pac sềr rơp kòl ƀàssìl, Bol khai jòng să bơh ală rùp ràk ò kwơ; Jơh ală yàng ndai cùn khoai di đap Kơnràñ.

⁸ Ơ Yàng Tom Trồ, tài bơh bơta cahrña Kơnràñ dê, Siôn kơno gen chò hòp; mơ ală kòn ùr Juda dê hòn chò.

⁹ Ơ Yàng Jehôwa, Kơnràñ la Jơnhoa hơđang rlau jơh hơđang jơh plai ù; Kơnràñ geh bơtào jòng ngan hơđang jơh ală yàng ndai.

¹⁰ Yàng Jehôwa kòñ gơboh ală cau gơjrañ kơuềng di bơta iơh bơsak; Kơnràñ sền gàr bơta kis ală cau sàng goh Kơnràñ dê, Mơ dong tă bol khai klàs bơh di tê cau iơh bơsak dê.

¹¹ Bơta àng sòl pơnđàng cau song ring in, Bơta chò hòp geh ai cau in gơs nùs song ngan.

¹² Ơ bol mê la cau song ring, hòn chò tĕ tòm Yàng Jehôwa, Mơ ưnngài tĕ sơnđan sàng goh Kơnràñ dê.