Đơs Crih 92 - Sră Goh 2018

Jòng ro Yàng Jehôwa bơh bơta nđàc niam Kơnràñ dê

Jơnau đơs crih. Bơta đơs chò ngui tòm ngai Saƀat

¹ Ơ Bơtau Hơđang Rlau Jơh, bơta hơ̆ la niam tòm tŭ ưnngài Yàng Jehôwa, Mơ đơs chò jòng ro sơnđan Kơnràñ dê.

² Tòm àng drim yal tơlik bơta kòñ gơboh kơ̆ dơn Yàng dê, Mơ tòm trồ mang bơto yal bơta dòn song Kơnràñ dê,

³ Bal mơ ntas kơñi jơt che, kơñi pĕ bal mơ kơñi gòng,

⁴ Ơ Yàng Jehôwa, bơh Kơnràñ neh lơh añ in chò hòp bơh broă lơh Kơnràñ dê; Añ rơp đơs chò dô bă hòn chò bơh ală broă tê Kơnràñ lơh.

⁵ Ơ Yàng Jehôwa, ală broă lơh Kơnràñ dê la dờng ngan ò git lơh! Ală bơta kơlôi sơnơng Kơnràñ dê la jrô ndơp ngan!

⁶ Cau bơrngơl gơla ò rgơi git, cau tùl gơla kung ò rgơi wă bơta do:

⁷ bulah cau iơh bơsak gơlik dờng mhar be ñhơt, Mơ jơh ală cau lơh iơh bơsak geh bơtào tơngguh, bol khai neh geh lơh nền pal kong tơnroh jơl sùm sùm.

⁸ Mơya, ơ Yàng Jehôwa, Kơnràñ ơm hơđang rlau jơh gam sùm sùm.

⁹ Ơ Yàng Jehôwa, ai ală cau sò tơm Kơnràñ dê, ală cau sò tơm di Kơnràñ; bol khai rơp kong roh rui; Jơh ală cau lơh bơta iơh bơsak rơp kòl gơprah gơpring.

¹⁰ Mơya Yàng neh bơtơl pràn kơldang añ in be dô nơm krŭ; Yàng neh tuh hơđang añ mơ mơñà pa.

¹¹ Mat añ neh gŏ bơta gơpừ cau sò tơm di añ, Tồr añ neh kơno bơh bơta tơnroh cau sòdră di añ.

¹² Cau song ring geh bơtào tơngguh be chi gòl, Gơlik dờng be chi pơnàng hơđang Liban.

¹³ Bol khai geh tam tòm hìu Yàng Jehôwa dê, Gơlik bơkào tòm ƀlàng hìu Yàng Tom Trồ bol he dê.

¹⁴ Bulah să kra sơnam jòng, bol khai gam gơlik plai, Gam bềng dà bơsơt mơ tơlir sùm.

¹⁵ Tồ yal tơlik Yàng Jehôwa la song ngan; Kơnràñ la pơnai lŭ añ jê, tòm Kơnràñ ò gơs bơta ò song ring lơi.